Hoi anenn menge i biblakre laba?

1. Hoske hunte well menge tchimoni pendes?

Maro Dewel hi gosweda ha mer. Ha i gamlo dad dell job men kowa, hoi men hunte wella. O Dewel gerdas men jaake, gai hunte well men les an maro djipen (Remarja 9:20, 21). Jaake, ha i tikno tarnepen an peskro djipen hunte wella bud kooma sikedo, hunte sikerell o Dewel men an maro djipen ninna bud kooma (Gilja 25:8, 9). I biblakre laba penenn menge, hoi te krass an maro djipen. Ko hi i bacht, hoi o Dewel menge della. — Dikh pala an 2. Timoteo 3:16.

O fedestar djipen – kanne, ninna an o tsiro glan mende – well menge dran i Jehoweskre laba tsikemen. Mer wam i Dewlestar gerdes. Doleske hi kowa ninna tchatches, gai lah mer leskre laba an mende pre un djiwah pal lende. Mer hunte awass barkedes, gai penell maro Dewel Jehowah menge hallauter dran peskro djieskro gamlepen. — Dikh pala an Gilja 19:7, 8, 11, 12; Debleskro tsiro 4:11.

2. Ha sikerell i bibla menge o drom?

I biblakre laba hi o tchatchepen. An i bibla denn laba, gai wan an situatione tchindes, gai penell o Dewel menge direkt, hoi job mendar khamella (Bitchepangre 15:29). Denn ninna laba, kola hunte mukass mer an maro shero trujal te djal (Efesarja 5:15). Ha krah mer kowa? Tu kreh les jaake: An i bibla hi tardo, gai das o Dewel men o djipen. Hoi sikerell men ko tchatchepen? Te dass garda ap o djipen ap hako drom, gai mer ham. — Dikh pala an Gilja 36:9, 10.

3. Hawe dui laba hi kola baresta?

O Jesus penas, gai denna dui laba, gai bareda hi, ha kola tsele wawar laba. O jekto lab tsikerella, hoske mer djiwah: Te brindjerass o Dewles, te gamass les, ninna te krass leske hallauter. Ko lab hunte rikerass mer men an hake tsire glan mare jakka (Josua 1:7). Kola, gai pal i biblakre laba djiwenna, nai wenna maala i Dewlestar, ninna lenn le bachtlepen un i djipen hake tsireske. — Dikh pala an Mateo 22:36-38.

O dujto lab sikerell menge o drom, te nai wass maala wawarentsa (1. Korintarja 13:4-7). Te krah mer kowa, ham mer jaake latcho ap i wawarende, ha maro Dewel ninna latcho ap mende hi. — Dikh pala an Mateo 7:12; 22:39, 40.

4. Hoi anenn menge i biblakre laba?

O Dewleskro lab sikerell i familjat, hoi lat ketene rikerella: Gamlepen (Kolossarja 3:12-14). I biblakre laba, gai hunte atchell i rom un i romni ketene, hi i tseli familjake mishto. — Dikh pala an 1. Mose 2:24.

Te krah mer kowa, hoi i bibla penella, djal les menge an hallauter mishto. Putch tut kokeres: Khamals tu i buhtepaskro pash tute, gai tchorella un chochella? Ap koleste, gai sawo kooma gar krella, dikenn le mishto. I bibla penell menge, te wass jaake (1. Tessalonikarja 4:11; Hebrearja 13:18). O Dewleskro lab penell menge, te wass bachtelo pral kowa, hoi men hi. Ninna sikerell li, gai kowa budeda moldo hi, te hi jek i maal o Dewlestar, ha te wals les bud brawlepen. — Dikh pala an Mateo 6:24, 25, 33; 1. Timoteo 6:8-10.

Te shunah mer ap i biblakre laba, atchah mer sassteda (4. Mose 19:7; 1. Timoteo 4:8). Tchip tut jek kola biblakre labentsar glan i jakka: Te pijell jek budeda ha bud, nai lell lo i nasslepen, gai merell lo. Ninna te merell lo gar, nai anell lo bud bibacht ap peste (Efesarja 5:18). O Jehowah penas gar te mukass o pipen krik – job penas, te ma pijass men mato (Tchatchepangre mursha 9:13; 1. Petro 4:3). I Dewleskre biblakre laba hi menge an bud situatione mishto. Jon sikerenn men, te krass kek tchilatchepen. Jon sikerenn men ninna, ha te mukass kek tchilatchepen an maro shero dre (Gilja 40:8, 9). Tchatche Christe rikerenn kowa dren, hoi o Dewel lendar khamella. Jon krenn kowa gar kokeres, te djal les lenge mishto; jon krenn les, te nai sharenn le i Jehowes. — Dikh pala an Mateo 5:14-16.