O baro bollepaskreskro pani – Koon shunas un koon shunas gar?

Ha o Noa djiwas, hins i budesta manusha tchilatcho. 1. Mose 6:5

O Adam un i Ewa lan tchawe. Kek rar tsiro dureda djiwan bud manusha ap i phub. An kowa tsiro djan bud bollepangre ap i bengeskri rig.

Kola bollepangre wan ap i phub, te lenn le penge djuwja. Jon risran pen dran i bollepaskro an i morshes un lan penge haki djuwel, gai jon khaman. Lengre romja lan morsh-tchawe, gai jaake bares un sorles hins, ha i rukh. Jon hins tchilatche tchingepangre un dehpangre.

Jaake was i phub pherdo i tchilatche manushentsa. I bibla penella, o manushengro tchilatchepen his bares, un hallauter, hoi jon haiwan, his tchilatchepen.

O Noa shunas ap o Dewleste un gerdas i archa. Kowa his i baro panjeskro kher. 1. Mose 6:13, 14, 18, 19, 22

O Noa his i latcho morsh. O Jehowah penas leske, gai i baro bollepaskreskro pani wella, te merenn i tsele tchilatche.

O Noa shunas ap o Dewleste un gerdas i archa – i panjeskro kher. Job, leskri romni, leskre tchawe un kolengre romja, djan ketene i direntsa kote dren.

O Noa penas i manushenge, gai o baro bollepaskreskro pani pral i phub wella. Jon san pral kowa un shunan gar ap leste. Bud hins jaake tchilatcho, ha te chatchans le ap leste.

Ha i archa gerdo his, anas o Noa ninna i dire dren.