LEKTIONA 23
I Panjeskri Ceremonia krell tiro djipen bachtleder!
O Jesus penas, kai hunte mukenn pen christe te taufrell (Dik pal an Mateo 28:19, 20). Un hoi hi kanna i Panjeskri Ceremonia? Un hoi te krell jek, te nai well lo an i Panjeskri Ceremonia?
1. Hoi well an i Panjeskri Ceremonia kerdo?
Ko griechtiko lab, hoi an maro rakepen “te bolell” oder “te taufrell” hi, kharella “tel o pani tchiwedo”. Har mukas pes o Jesus te taufrell, his lo ninna tel o pani, un hadas “pes dran o pani” win (Marko 1:9, 10). Tchatche christe mukenn pen jaake har o Jesus tseles tel o pani te tchiwell, te mukenn le pen te bolell.
2. Hoi sikreh tu, tu te djah an i Panjeskri Ceremonia?
I Panjeskri Ceremonia sikrella tiri Sowel, hoi dal i Jehowes. Un har kreh tu kowa? Tu te rakreh i Jehoweha, penn leske, kai kameh kokres leske te djiwell, un kai mangeh kokres ap leste. Penn leske ninna, kai tchiweh tu halauter, hoi job tutar kamella, glanstunes an tiro djipen. Tu hunte bistress, “hoi [tuke] kokres mishto hi” — tu hunte nashess i Jeseske pal, un hunte djiwess pal kowa, hoi job penas un kras (Mateo 16:24). Koi Sowel un i Panjeskri Ceremonia krenn, kai nai weh i latcho maal i Jehowestar un ninna kolendar, kai mangenn ap leste.
3. Hoi hunte kress tu, te nai djass an i Panjeskri Ceremonia?
Tu hunte prindjress i Jehowes mishto, un hunte kress tiro patsepen sorleder (Dik pal an Hebrearja 11:6). Te djineh budeder pral i Jehoweste, well tiro patsepen un tiro kamlepen ap leste bareder. Palle kameh ninna wawarentsa pral leste te rakrell, un pal leskre standards te djiwell (2. Timoteo 4:2; 1. Johanni 5:3). Te djiwell jek jaake, kai “well o Dewel sharedo, un [krell] lauter, hoi hi latcho un mishto glan leskre jaka”, wella an o dji, kai dell lo i Jehowes i sowel, un te mukell lo pes te bolell (Kolossarja 1:9, 10).a
RODAS DUREDER
Kanna dikeh, har o Jesus taufemen was, un hoi menge kowa sikrella. Ninna dikeh, hoi tu hunte kress, te nai mukess tut te taufrell.
4. Hoi well menge sikedo, te dikah ap i Jeseskri Panjeskri Ceremonia
Te nai djiness budeder pral i Jeseskri Panjeskri Ceremonia, dikenn pal an Mateo 3:13-17, un rakrenn khetne pral:
His o Jesus i ternepen, har job taufemen was?
Har was job taufemen? Was kokres pani pral leskro shero tchoredo?
O Jesus las o Deblestar peskri budi ap i phub, har mukas job pes te bolell. Dikenn pal an Luka 3:21-23 un Johanni 6:38, un rakrenn khetne pral:
Har o Jesus taufemen his, hawi budi tchiwas job glanstunes an peskro djipen?
5. Ma dare glan i Panjeskri Ceremonia
Well tuke kowa phares glan, te dess i Jehowes koi sowel, kai kameh kokres leske te djiwell, un te djas an i Panjeskri Ceremonia? Palle ma dare! Tu te kreh tiro malepen i Jehoweha sorleder un te rodeh pal o tchatchepen, palle well kowa, kai peneh, ’Kanna kamau kowa te krell’. Pash wawarende his kowa ninna jaake. Dikenn o VIDEO.
Dikenn pal an Johanni 17:3 un Jakobo 1:5, un rakrenn khetne pral:
Hoi krell tut sorles an kowa, te djas an i Panjeskri Ceremonia?
Pash i Sowel peneh tu an i mangepen ap i Jehoweste, kai kameh tu hake tsireske kokres leske te djiwell
An i Panjeskri Ceremonia mukeh tu tut te bolell un jaake sikreh tu hakeneske, kai dal tu tiro djipen i Jehoweske
6. Tu te mukeh tut te taufrell, weh tu an i Jehoweskri familja
Dran i Panjeskri Ceremonia lell o Jehowah tut an peskri familja pre — jek bari familja ap i phub. An mari familja hin menshe, kai wenn dran hako them, hakeno mendar patsell ap o tchatchepen dran i bibla un djiwell pal late. Dikenn pal an Gilja 25:14 un Gilja 133:1 un rakrenn khetne pral:
Hoi hal tu an i Jehoweskre jaka, tu te mukeh tut te taufrell, un hoi hal tu an i jaka kolendar, kai patsenn ninna ap leste?
BUD PENENNA: “Me hum gar jaake dur, te mukap man te taufrell.”
Te hin kola laba ninna an tiro shero, putch tut: Patsau me, kai well miro djipen pal i Panjeskri Ceremonia bachtleder?
HOI KATE PENLO WAS
O Jesus sikras men, kai hunte mukenn pen christe te bolell. Glanstunes hunte well men i sorlo patsepen ap i Jehoweste, mer hunte djiwas pal leskre standards, un mer hunte das leske an i mangepen sowel, kai djiwah kokres leske.
Hoi penals tu?
Hoi hi i Panjeskri Ceremonia, un hoske hunte mukas mer men te taufrell?
Hoi sikrell koi Sowel un i Panjeskri Ceremonia?
Hoi hunte kress tu glanstunes, te kameh i Jehowes i Sowel te dell un an i Panjeskri Ceremonia te djal?
BUDEDER
Kate nai hatseh, hoi i bibla pral i Panjeskri Ceremonia penella, un hoi li gar penella.
Kate hatseh, hoi hunte kress glanstunes, te nai mukess tut te bolell.
“Kamlepen un parkepen ap i Jehoweste anenn an i Panjeskri Ceremonia” (O Gardeskro Kheer, März 2020)
Kate drawereh pral i morsheste, hoske job pes mukas te taufrell. Pash leste his kowa kek emotionaltiko koowa.
“Jon kaman, te djinap kokres hoi o tchatchepen hi” (O Gardeskro Kheer, Februar 1, 2013)
Kate drawereh: Hoske hi i Panjeskri Ceremonia jaake bud moldo? Un har te djinap, kai hum jaake dur, te mukap man te taufrell?
“Mukap me man te bolell?” (Hoi terne pen putchenn — O praktiko tchatchepen, Kotar 2, Lektiona 37)
a Te was jek an i wawar religiona taufemen, hunte mukell lo pes pale te taufrell. Hoske? Kote was gar o tchatchepen dran i bibla sikedo (Dik pal an Bitchepangre 19:1-5, un an i Lektiona 13).