LEKTIONA 51
Har nai krah mer i Jehowes bachteles mare labentsa?
Har o Jehowah men kerdas, das lo menge tchomone kutch: Job kras, kai haiwah mer te rakrell. Dikell lo ninna ap kowa, hoi un har mer rakrah? Awa (Dik pal an Jakobo 1:26). Putchas men doleske: Har nai rakrah mer jaake, kai sharah i Jehowes?
1. Har te rakras wawarentsa?
I bibla penella, te rakras jaake, “te dell jek o wawares soor” (1. Tessalonikarja 5:11). Prindjreh tu jekes, koles kek soor buder hi? Har nai kreh tu, te well lo pale sorleder? Penn leske, kai hi lo tuke bud moldo, un hoi tuke ap leskri shinia shukar hi. Djineh tu i shukar biblakro lab? Kote denn jaake bud verse, hoi soor denna! Un ma biste: Har mer tchomone penah, hi jaake bud moldo, har kowa, hoi mer penah. Rakras doleske an latchepen un kamlepen (Gosewe Laba 15:1).
2. Har te rakras gar?
I bibla penella: “Rakrenn kek tchilatche un djungle laba” (Dik pal an Efesarja 4:29)! Har sikrell pes kowa? Mer praassah gar, lah kek wi ladjede laba an o mui, un dukrah wawaren witar gar kola labentsa, hoi mer penah. Mer tchamrah witar gar pral wawarende oder kowa, hoi jon menge tchorchanes penan, un anah kek chochepen ap wawarende (Dik pal an Gosewe Laba 16:28).
3. Har nai rakrah jaake, kai wenn wawar pale sorleder?
Kowa, pral hoi mer rakrah, sikrella, hoi men an maro dji hi (Luka 6:45). Doleske hunte trainieras mer men, te dikas ap kowa, hoi positiv hi: Kowa, hoi tchatcho, djudjo un kamlo hi, un hoi sharemen wella (Filiparja 4:8). Te nai dikas ap sawo koowa, hunte rodas mer menge mishto win, hoi mer an o TV un o Internet dikah, hawo bashepen mer shunah, un koon mare mala hin (Gosewe Laba 13:20). I bibla penell ninna: “Laba, hoi sik win rakedo wenna, nai denn tchurje har i charo. O rakepen i gosewe menshendar anell sastepen” (Gosewe Laba 12:18). Doleske hunte putchas mer men ninna, te kamah mer tchomone te penell, ob te krell kowa lab jekes sorles, oder ob te tsardell les kowa tele.
RODAS DUREDER
Kanna dikeh, har te rakress, te nai well o Jehowah bachteles, un te nai lenn wawar pale soor.
4. Rike i kontrolla pral tiri tchip
Mer prindjrah kowa: I lab wella dran o mui, un palle khaitell menge kowa (Jakobo 3:2). Dikenn pal an Galatarja 5:22, 23, un rakrenn khetne pral:
Pal hawo latchepen nai mangals tu, te nai well tuke i kontrolla pral tiri tchip? Har nai well ko latchepen dran ko biblakro verso tuke mishto?
Dikenn pal an Gosewe Laba 13:20, un rakrenn khetne pral:
Har sikrell pes an tiro rakepen, koon tire mala hin, hoi tu dikeh un shuneh?
Hoske sikrell pes an tiro rakepen, hoi tu kreh, un koneha tu khetne hal?
Dikenn pal an Sikepaskro 3:7, un rakrenn khetne pral:
An hawe situatione wals kowa feteder, te penas tchi, oder te luras ap i feteder tsiro, te penas tchomone?
5. Rake latches pral wawarende
Har nai rikrah mer men pale, te penas tchi, hoi wawaren dukella? Dikenn o VIDEO, un rakrenn khetne pral:
Hoske kamas ko phraal buder gar jaake te rakrell, har job kowa glanstunes kras?
Hoi kras lo wawartchandes?
Dikenn pal an Sikepaskro 7:16, un rakrenn khetne pral:
Hoi hunte rikras mer men glan i jaka, mer te kamah tchilatches pral wawarende te rakrell?
Dikenn pal an Sikepaskro 7:21, 22, un rakrenn khetne pral:
Har nai wenn tuke kola dui verse mishto, te wess gar chojedo, te rakrenn wawar tchilatches pral tute?
6. Ab latcho, te rakreh tiri familjah
O Jehowah kamell, te rakras mari familjah latche un kamle labentsa. Dikenn o VIDEO, un rakrenn khetne pral:
Hoi hi tuke mishto, te nai rakress latche labentsa tiri familjah?
Dikenn pal an Efesarja 4:31, 32, un rakrenn khetne pral:
Hawe labentsa hunte rakras mer mari familjah?
O Jehowah penas, hoi leskro tchawo peske hi. Dikenn pal an Mateo 17:5, un rakrenn khetne pral:
Har nai rakrah mer an mari familja latches un kamles, jaake har o Jehowah kowa kras?
Rode pal kowa, te nai peness jekeske tchomone latches
BUD PENENNA: “Me penau hakeneske, hoi man an m’o shero hi. Te kamenn le kowa gar te hunell, hi mange kowa jek.”
Hoi penals tu: Hi kowa tchatcho? Hoske peneh tu kowa jaake?
HOI KATE PENLO WAS
An mare laba hi i bari soor. Doleske hunte kras mer menge i shero pral kowa, hoi, kaana, un ninna har mer tchomone penah.
Hoi penals tu?
Har nai dah mer wawaren mare labentsa soor?
Har kameh tu gar te rakrell?
Hoi hi menge mishto, te rakras an hako tsiro latche, kamle un sawe labentsa, hoi soor denna?
BUDEDER
Kate huneh, hoi menge mishto hi, te rakras positiv.
Kate drawereh, har te less kek tchilatche laba an tiro mui.
“Hi o praassepen tchatchepah jaake tchilatcho?” (I artikla online)
Kate dikeh, hoi te kress nai, te well dran i rakepen kek tchilatcho tchamepen.
Kate penell i morsh, har job i Jehoweskri sorjah o praassepen nai mukas.
“Me putchum man, kai te anell man miro djipen” (O Gardeskro Kheer, August 1, 2013)