LEKTIONA 54
Koon hi o loyaltiko un gosewo budepaskro, un hoi krell lo?
O Jesus hi o shero an i christiki versammlunga (Efesarja 5:23). O Jesus — kai an maro tsiro an o bolepen hi — sikrell dran ko loyaltiko un gosewo budepaskro kolen o drom, kai nashenn leske kate ap i phub pal (Dik pal an Mateo 24:45). Ninna te rodas o Jesus kowa budepaskres win, un kai das lo les penepaske, atchell job o Jeseskro “budepaskro”, un budrell i Christeskre phralenge. Koon hi kowa budepaskro, un hoi krell lo menge halauter?
1. Koon hi ko loyaltiko un gosewo budepaskro?
O Jehowah lajas an hako tsiro menshen — morsha oder ninna i tikni gruppa morshendar — te penenn jon peskre menshenge o tchatcho drom (Maleachi 2:7; Hebrearja 1:1). Pal o Jeseskro merepen kran kowa i Jeseskre bitchepangre un i Phureste an i Jerusalem (Bitchepangre 15:2). Jaake har an ko phuro tsiro dell an maro tsiro ninna i tikni gruppa Phurendar, kai denn menge o duchtiko chapen. Jon organisierenn ninna mari Debleskri Budi. Koi tikni gruppa kharella: I Pralstune Sikepangre i Jehoweskre Rakepangrendar. Khetne hin jon o loyaltiko un gosewo “budepaskro … [un o Jesus] das peskre tsele budepangren an leskre wasta” (Mateo 24:45). Hakeno kola Pralstune Sikepangrendar was o Debleskro duchestar makkemen. Jon hin bachteles, kai wenn le pal pengro merepen raja an o Debleskro Them. Palle djiwenn le an o bolepen langs i Jeseskri rig.
2. Hawo duchtiko chapen dell men o loyaltiko un gosewo budepaskro?
O Jesus penas ninna, kai dell ko loyaltiko un gosewo budepaskro kola wawar christen “hako diwes kowa, hoi len hunte well djipaske” (Mateo 24:45). Jaake har o tchatcho chapen mari soor un maro sasstepen rikrella, krell ko duchtiko chapen — kola laba dran o Debleskro Lab — kai hi men koi soor, hoi men hunte well, te nai atchas i Jehoweske loyaltikes, un te nai kras koi budi, hoi o Jesus menge penas, te kras (1. Timoteo 4:6). Kowa duchtiko chapen lah mer, te ham an o Khetnepen, ap mare Kongresse un ninna dran koja biblakri literatura un kola biblakre videos. Kowa halauter krella, kai haiwah mer feteder, hoi o Jehowah mendar kamella, un krell maro malepen leha sorleder.
RODAS DUREDER
Kanna dikeh, hoske men ko loyaltiko un gosewo budepaskro — kola Pralstune Sikepangre — hunte wella.
I Pralstune Sikepangre denn jak ap i Jehoweskre Rakepangrende ap i tseli phub: Jon denn lenge duchtiko chapen, sikrenn lenge o drom un organisieren praktische Hilfe
3. I Jehoweskre menshe hunte wenna organisieremen
Tel o Jeseskro wast organisierenn kola Pralstune Sikepangre koi budi i Jehoweskre Rakepangrendar. Jaake his kowa ninna pash kola christe an o ersto sheeleskro bersh. Dikenn o VIDEO.
Dikenn pal an 1. Korintarja 14:33, 40, un rakrenn khetne pral:
Har sikrenn kola laba, kai kamell o Jehowah, kai hin peskre menshe organisieredo?
4. O loyaltiko un gosewo budepaskro organisierell mari Debleskri Budi
Kol christenge an o ersto sheeleskro bersh his i Debleskri Budi koi moldester un barester budi. Dikenn pal an Bitchepangre 8:14, 25, un rakrenn khetne pral:
Koon penas an o ersto sheeleskro bersh, har te krenn le i Debleskri Budi?
Har reagieran o Petro un o Johanni ap kola laba, hoi kola wawar bitchepangre lenge penan?
Ninna an maro tsiro hi i Debleskri Budi koi moldester un barester budi, hoi i Pralstune Sikepangre organisierenna. Dikenn o VIDEO.
O Jesus penas menge, hoske kowa jaake bud moldo hi, te anas o latcho lab pash i menshende. Dikenn pal an Marko 13:10, un rakrenn khetne pral:
Hoske hi i Debleskri Budi kol Pralstune Sikepangrenge jaake bud moldo?
Hoske hunte well men ko loyaltiko un gosewo budepaskro pash koi Debleskri Budi, hoi ap i tseli phub kerdes wella?
5. O loyaltiko un gosewo budepaskro sikrell men
Te djala pral o patsepen, sikrenn kola Pralstune Sikepangre menge ap i tseli phub o drom. Har djinenn le, ap hawo drom te djas mer? Dik, har kola pralstune sikepangre kowa pash kola christe an o ersto sheeleskro bersh kran. Dikenn pal an Bitchepangre 15:1, 2, un rakrenn khetne pral:
Hoi anas mang kola christe an o ersto sheeleskro bersh i tchingepen?
Pash koneste djan o Paulo, o Barnabas un kola wawar, te penenn le lenge, hoi te krenn le?
Dikenn pal an Bitchepangre 15:12-18, 23-29, un rakrenn khetne pral:
Hoi kran kola pralstune sikepangre, te nai haiwenn le, hoi o Dewel kamas? (Dikenn pal an i verse 12, 15, un 28.)
Dikenn pal an Bitchepangre 15:30, 31, un 16:4, 5, un rakrenn khetne pral:
Har reagieran kola christe an o ersto sheeleskro bersh ap kola laba, hoi kol pralstune sikepangre lenge penan?
Har prossewas o Jehowah len doleske, kai shunan le ap lengre laba?
Dikenn pal an 2. Timoteo 3:16, un Jakobo 1:5, un rakrenn khetne pral:
Hoi krenn i Pralstune Sikepangre an maro tsiro, te nai haiwenn le, hoi o Dewel kamella?
BUD PENENNA: “Tumare Pralstune Sikepangre hin kokres menshe. Te shunenn tumer ap lende, nashenn tumer menshenge pal.”
Hoske patseh tu, kai hin i Pralstune Sikepangre tel o Jeseskro wast?
HOI KATE PENLO WAS
I Pralstune Sikepangre hin ko loyaltiko un gosewo budepaskro, hoi o Jesus win rodas. Te djala pral o patsepen, sikrenn jon i Jehoweskre budepangrenge ap i tseli phub o drom, un denn lenge ninna o duchtiko chapen.
Hoi penals tu?
Koon rodas o loyaltiko un gosewo budepaskres win?
Hoi krenn menge i Pralstune Sikepangre halauter?
Patseh tu, kai hin i Pralstune Sikepangre o loyaltiko un gosewo budepaskro, hoi wajas o Jesestar win rodemen?
BUDEDER
Kate hatseh budeder informatione pral kowa, hoi i Pralstune Sikepangre krenna.
“Koon hin kola Pralstune Sikepangre i Jehoweskre Rakepangrendar?” (I artikla online)
Kate huneh, hoi i Pralstune Sikepangre krenna, te nai las mer duchtiko chapen, hoi tchatchepah o tchatchepen sikrella.
Kate shuneh, har i Pralstune Sikepangre ap koi budi dikenna, hoi jon i Jesestar lajan.
Kate dikeh, har maro Khetnepen un mare Kongresse sikrenna, kai penell o Jehowah kol Pralstune Sikepangrenge, hoi te krenn le.