Hoi hi o Dewleskro Them?

1. Hoi hi o Them o Dewlestar?

O Dewleskro Them hi i pralstuni an o bollepen. Joj lell haki wawar pralstuni krik, te anell li kowa, hoi o Dewel khamella – jaake, ha an o bollepen, ninna ap kai phub. Hallauter, hoi i latchi pralstuni men hunte anella, lah mer an i tikno tsiro dran i Dewleskri pralstuni. Koon mendar khamell kowa gar? Balle ham mer hallauter jek bari familja. Ko hi tchatchepaha i latcho lab! — Dikh pala an Mateo 6:9, 10; 24:14.

An i pralstuni hunte well jek o pralstuno. O Jehowah rodas peskro tchawes win, te well job o krahloa an o Dewleskro Them. Jaake haiwah mer: O Jesus hi o rai an koja pralstuni. — Dikh pala an Debleskro tsiro 11:15.

Kate hatseh ninna o Video Hoi hi o Dewleskro Them?

2. Hoske hi o Jesus o fedesta rai, hoi della?

O Jesus hi gamles. Job hi ninna pal o tchatchepen tardo. Doleske hi lo o fedesta rai, hoi nai della (Mateo 11:28-30). Te hi job an o bollepen o rai pral i phub, hi les ninna soor doha, te djal les i manushen fededa. Ha djangeras o Dewel les pre, hadas lo les pral an o bollepen. Kote atchas job ap i Dewleskri tchatchi rig beshto (Hebrearja 10:12, 13). Balle das o Dewel i Jeses koi rajeskri soor, te well job o krahlo an o Dewleskro Them. — Dikh pala an Luka 1:32, 33.

3. Hi o Jesus kokeres o krahlo an o Dewleskro Them?

O Jesus penas ap peskre 11 bitchepangrende, gai khamell lo, te rajenn jon leha ketene an o Dewleskro Them (Luka 22:28, 29). O Jehowah rodas an hake tsire patsle morshen un djuwjen win, te rajenn le pral i manushende. Te wenn le an o bollepen, wenn le duchengre, jaake, ha o Jesus ninna i duchengro was, ha was lo an o bollepen hadedo. — Dikh pala an Johanni 14:1-3; 1. Korintarja 15:44.

Ha bud wenna an o bollepen? O Jesus penas, gai gar bud an o bollepen wenna (Luka 12:32). I bibla penell menge, ha bud jon hi: 144.000. Jon rajenn ketene i Jeseha pral i phub. — Dikh pala an Debleskro tsiro 14:1.

4. Hoi djas, ha was o Jesus o krahlo?

An o bersh 1914b was o Dewleskro Them boldo. Hoi kras o Jesus glanstunes, ha was lo o krahlo? Job witseras i benges un leskre tchilatche bollepangren dran o bollepen win. O beng was diwijo i choljatar un anas i bari bibacht ap i phub (Debleskro tsiro 12:7-10). Pal kowa was i bibacht bareda un bareda. Khurepen, bokh, nasslepen, ninna kola bud koppe, gai well i phub sorles trisslemen, hi ko “koowa”, ap hoi mer nai dikah, gai well o Dewleskro Them. — Dikh pala an Luka 21:7, 10, 11, 31.

5. Hoi krell o Dewleskro Them?

O Dewleskro Them anell an maro tsiro bud manushen dran haki nationa ketene. I Dewleskri Buhti, te djan le kher-pal-kher, rikerell len ketene. Bud millione, gai o gamlepen gamenna, tchiwenn pen tel o rajeskro wast. Te lell o Dewleskro Them haki pralstuni krik, dell lo ap lende garda. Te khamah mer i wasta pral mende te haiwell, hunte shunass mer ap i Jeseskri laba. — Dikh pala an Debleskro tsiro 7:9, 14, 16, 17.

Kowa, hoi o Dewel glanstunes i manushenge khamas – te well i tseli phub i paradiso – well dran o Dewleskro Them an 1.000 bersha gerdes. Pal ko tsiro dell o Jesus o Them peskro dades papale (1. Korintarja 15:24-26). Kooneha khamals tu pral o Dewleskro Them te rakerell? — Dikh pala an Gilja 37:10, 11, 29.