LEKTIONA 28
Sike tiro parkedo dji ap kowa, hoi o Jehowah un o Jesus tuke kran
Har hi tuke kowa, te dell i maal tuke tchomone shukar? Tu hal bachteles un sikreh leske tiro parkedo dji. O Jehowah un o Jesus dan menge ko barester, hoi menge nai wals. Hoi hi kowa un har nai sikrah mer i parkedo dji?
1. Har nai sikrah mer maro parkepen ap kowa, hoi o Jehowah un o Christo menge kran?
I bibla penell menge, kai “hakeno, koon patsell ap [i Jeseste]” nai djiwell hake tsireske (Johanni 3:16). Har nai sikrah mer, kai patsah ap leste? Ko hi budeder, har te penas kokres, me patsau ap i Jeseste. Mer hunte sikras maro patsepen an kowa hoi krah, un hoi mer kamah te krell (Jakobo 2:17). Mer te sikrah maro patsepen an kowa, hoi mer penah un krah, well maro malepen i Jeseha un leskro dadeha Jehowah sorleder (Dikenn pal an Johanni 14:21).
2. Ap hawo baro diwes nai sikrah mer i Jehowes un i Jeses maro parkedo dji?
Jek rati glan o Jeseskro merepen penas o Jesus ap peskre nashepangrende, har te sikrenn le nai, kai hi len i parkedo dji doleske, hoi job krella. Job penas ap lende, te krenn le i khetnepen, hoi bud moldo hi. I bibla kharell ko khetnepen “o Jeseskro chapen”. Ap o Rajeskro Ratsjakro Chapen penenn bud ninna: O lepepen ap o Jeseskro merepen (1. Korintarja 11:20). O Jesus kras kowa, te lepewenn i bitchepangre — un ninna i tsele tchatche christe — ap kowa, hoi job lenge krella. Job kamas, te bistrell kek mendar, kai das job peskro djipen menge. Pral ko baro diwes penas o Jesus: “Krenn kowa pale un pale, te well tumenge an tumaro shero, hoi me krum tumenge” (Luka 22:19). Tu te djah an ko Khetnepen, sikreh tu tiro parkedo dji ap ko kamlepen, hoi o Jehowah un o Jesus tuke sikran.
RODAS DUREDER
Kanna dikeh, har te sikress nai i Jehowes un i Jeses gomme, kai hi tut i parkedo dji ap ko kamlepen, hoi len tuke hi. Tuke well sikedo, hoske kowa bud moldo hi, te lepewas ap o Jeseskro merepen.
3. Te hi men i parkedo dji, krah mer ninna tchomone
Tu te tassals un jek lals tut dran o pani win: Hoi krals tu koleske? Bistrals tu kowa an tiro djipen, hoi job tuke kras? Oder rodals tu pal i chanca, te nai sikrals leske tiro parkedo dji doleske, hoi job tuke kras?
Mer kamah gar te bistrell, kai lam mer maro djipen i Jehowestar. Dikenn pal an 1. Johanni 4:8-10, un rakrenn khetne pral:
Hoske hi menge kowa i baro prossepen, kai das o Jesus peskro djipen menge?
Har hi tuke kowa, kai djineh kanna, hoi o Jehowah un o Jesus tuke kran?
Har nai sikrah mer i parkedo dji ap kowa, hoi o Jehowah un o Jesus menge kran? Dikenn pal an 2. Korintarja 5:15, an 1. Johanni 4:11 un 5:3. Rakrenn khetne pal hako biblakro verso pral:
Hoi sikrell tuke ko lab, har te sikress nai tiro parkedo dji?
4. Kre i Jeses pal
Mer te krah i Jeses pal, sikrah mer an maro djipen, kai hi men i parkedo dji. Dikenn pal an 1. Petro 2:21, un rakrenn khetne pral:
Har nai sikrau me, kai nashau me i Jeseske pala?
I laba o Deblestar hins an o Jeseskro dji. Doleske anas job o latcho lab pash i menshende un his wawarenge koi
5. Dja an ko Khetnepen: O lepepen ap o Jeseskro merepen
Djineh tu, har o ersto Rajeskro Ratsjakro Chapen tele nashas? Dikenn pal an Luka 22:14, 19, 20, un rakrenn khetne pral:
Har nashas o ersto Rajeskro Ratsjakro Chapen tele?
Hoi hi ko maro un hoi hi koi mool (Dikenn pal an i verse 19 un 20)?
O Jesus kamas, te krenn le o Rajeskro Ratsjakro Chapen jek kopo an o bersh — ap ko diwes, kai job meras. Doleske wah mer — Jehoweskre Rakepangre — hako bersh khetne, te ma bistras o Jeseskro merepen, jaake har job kowa penas. Kamals tu budeder pral ko baro diwes te djinell? Te dikan o VIDEO, rakrenn khetne pral:
Har lepewenn i Jehoweskre Rakepangre ap ko baro diwes?
Ko maro un koi mool hin symbole. O maro sikrell ap o Jeseskro djudjo mass, an koleste kek doosh his un hoi job menge das. Un i mool sikrell ap leskro kutch rat
BUD PENENNA: “Tu te patseh ap i Jeseste, hi kowa doha.”
Har nai sikrals tu i labentsa an Johanni 3:16 un Jakobo 2:17, kai hunte kras mer budeder, har te penas kokres, mer patsah?
HOI KATE PENLO WAS
Mer sikrah maro parkedo dji ap kowa, hoi o Jesus menge kras, te sikrah mer an maro djipen, kai patsah ap leste, un te djah an ko baro Khetnepen, te bistras gar leskro merepen.
Hoi penals tu?
Har nai sikrah mer an maro djipen, kai patsah ap i Jeseste?
Har kamals tu tiro parkedo dji ap kowa te sikrell, hoi o Jehowah un o Jesus tuke kran?
Hoske hunte was mer ap ko diwes khetne, kai o Jesus menge meras?
BUDEDER
Kate dikeh i rakepen pral ko putchepen: Hoi kamah mer doleske te krell, kai das o Jesus peskro djipen?
Kate drawereh nai, hoi patsepen hi un har mer maro patsepen sikrah.
“Tu hunte patsess ap i Jehoweskre laba” (O Gardeskro Kheer, Oktober 2016)
Kate hi pral i djuwjate tchinlo, kai kras pes intensiv i shero pral o win-gindo-lowe. Pal kowa nai penas li: “Man hi i newo djipen.”
“I bibla krell o djipen newes” (O Gardeskro Kheer, August 1, 2011)
Kate well tuke sikedo, hoske gar bud o marestar chana un i mooljatar pijenna.