LEKTIONA 19
Hin Jehoweskre Rakepangre tchatche christe?
Mer patsah, kai ham tchatche christe. Hoske? An kaja lektiona well tuke sikedo, hoi maro patsepaskro fundamento hi, hoske mer Jehoweskre Rakepangre kharah, un har mer maro kamlepen tel mende sikrah.
1. Hoi hi maro fundamento an o patsepen?
O Jesus penas: “[O Debleskro] lab hi o tchatchepen” (Johanni 17:17). Har pash i Jeseste, hi maro fundamento o Debleskro lab i bibla. An o 19. sheeleskro bersh his kowa jaake: I tikni gruppa rodas pal kowa, hoi i bibla tchatchepah penella. Jon rikran pen ap kowa, hoi jon dran i bibla haiwan, ninna, te penas i kangri tchomone wawar. Palle sikran jon wawaren kowa, hoi jon haiwan.a
2. Hoske kharah mer Jehoweskre Rakepangre?
O Jehowah penas ap peskre menshende, te rakrenn le wawarentsa pral kowa, hoi job kras, un te penenn le wawarenge o tchatchepen pral leste (Hebrearja 11:4–12:1). An o phuro tsiro penas o Dewel ap lende: “Tumer han mire rakepangre [NWT].” Doleske, kai jon djinan, hoi o Dewel halauter kras, penas lo: “Kowa nai penenn tumer i wawarenge” (Dik pal an Jesaja 43:10, 12). Ninna o Jesus rakras “hako tsiro o tchatchepen” pral o Debleste (Debleskro Tsiro 3:14). Doleske kharah mer seit o bersh 1931 Jehoweskre Rakepangre. Mer ham bachteles, kai nai hidjrah ko lab.
3. Har sikrah mer ko kamlepen, hoi i Jeses his?
O Jesus kamas peskre nashepangren jaake bud, kai hins jon leske har i familja (Dik pal an Marko 3:35). Mer, Jehoweskre Rakepangre, ham ap kai phub ninna jek bari familja, un penah doleske phrala un phena ap mende (Filemon 1, 2). Mer djiwah ninna pal ko lab: “Koon o Debles kamella, kowa hunte kamell ninna peskro phrales o tselo djiestar,” un sikrah maro kamlepen (1. Johanni 4:21). Mer ham mare phralenge un phenjenge ap i tseli phub koi, te djal lenge i bibacht.
RODAS DUREDER
Kanna dikeh, har o glanstuno tsiro pash i Jehoweskre Rakepangre his. Tu hatseh ninna wawar koowa, hoi sikrella, kai ham tchatche christe.
O tchatcho christengro patsepen hunte well dran i bibla. Jon rakrenn ninna wawarentsa pral kowa
4. Maro fundamento hi i bibla
O Jehowah penas, kai wella i tsiro, kote haiwenn le o biblakro tchatchepen bud un budeder. Dikenn pal an Daniel 12:4, un rakrenn khetne pral:
Hoi nai haiwenn i Debleskre menshe, te rodenn le bud an i bibla?
Kote das i tikni gruppa, kote his o Charles Russell pashel, un kola rodan ninna bud an o Debleskro lab. Te dikan o VIDEO, rakrenn khetne pral:
Har djan o Charles Russell un kola wawar glan, har jon an i bibla rodan?
Djinal tu kowa?
Kote dan tsire, kai passram mer maro patsepen an. Hoske? Jaake, har nai dikah budeder un budeder, te djala o kham pre, jaake mukell o Dewel peskro lab ninna feteder un feteder te haiwell (Dik pal an Gosewe Laba 4:18). Jaake haiwah: Kowa, hoi i bibla penella, atchella. Te haiwah mer tchomone dran i bibla feteder, hunte passras mer kowa, ap hoi mer patsah, ap kowa an, hoi i bibla penella.
5. Mer djiwah pal kowa, hoi maro lab penella
Hoske kharah mer men Jehoweskre Rakepangre? Te dikan o VIDEO, rakrenn khetne pral:
Hoske hi ko lab Jehoweskre Rakepangre jaake mishto?
Hoske rodas pes o Jehowah menshen win, kai pral leste rakrenna? Pral o Debleste well jaake bud chochepen penlo. Leskre Rakepangre djinenn pral leste o tchatchepen un kowa penenn le wawarenge. Dikas kanna ap dui sawe labendar.
An bud religione well penlo, kai hi mishto, te tchiwah figure oder tchomone wawar glan i jaka, te mangah ap i Debleste. Kanna dikenn pal an 3. Mose 26:1, un rakrenn khetne pral:
Har hi i Jehoweske kowa, te tchiwah mer men figure oder tchomone wawar glan i jaka?
Bud rashaja penenn, kai hi o Jesus o Dewel. Kanna dikenn pal an Johanni 20:17, un rakrenn khetne pral:
Hin o Dewel un o Jesus jek persona?
Har dikeh tu ap kowa, kai bitchrell o Jehowah peskre Rakepangren, te penenn le o tchatchepen pral leste un peskro tchaweste?
6. Mer kamah men o djiestar
I bibla penella, kai hunte wenn christe jek, jaake har i tsele kotja ap i mensheste jek mensho krenna. Dikenn pal an 1. Korintarja 12:25, 26, un rakrenn khetne pral:
Hoi hunte krenn tchatche christe, te well bibacht ap pengre patsle phralende?
Ap hoi sikrell pes tuke, kai kamenn pen Jehoweskre Rakepangre o djiestar?
Te well i bibacht ap Jehoweskre Rakepangrende, hin lengre patsle phrala lenge sik koi, ninna te hin le ap i wawar rig i phubjatar. Te dikan o VIDEO, rakrenn khetne pral:
Har sikrenn Jehoweskre Rakepangre pengro kamlepen, te well i katastrofa ap lengre phralende?
Tchatche christe sikrenn pengro kamlepen wawarenge
BUD PENENNA: “I Jehoweskre Rakepangre penenn i menshenge gar o tchatchepen.”
Hoi penals tu ap kowa?
HOI KATE PENLO WAS
Jehoweskre Rakepangre hin tchatche christe. Mer ham jek bari familja ap i phub un maro fundamento, ap hoi mer patsah, hi i bibla. Mer rakrah i menshentsa un penah lenge o tchatchepen pral i Jehoweste.
Hoi penals tu?
Hoske kharah mer men Jehoweskre Rakepangre?
Har sikrah mer menge maro kamlepen?
Hoi penals tu: Hin Jehoweskre Rakepangre tchatche christe?
BUDEDER
Kate nai dikeh budeder pral mari historia.
Jehoweskre Rakepangre — O patsepen an i aktiona, Kotar 1: Dran o tamlepen win (1:00:53)
Kate nai huneh o tchatchepen pral jek chocheno lab.
Kate hatseh tu o tchatchepen pral kowa, hoi pen bud pral i Jehoweskre Rakepangrende putchenna.
“Hoi Pen Bud Pral i Jehoweskre Rakepangrende Putchenn” (I rubrika ap jw.org)
O Stephen dikas tchilatches ap wi-themarja un das len ninna. Kate nai drawereh, hoske i kontakta i Jehoweskre Rakepangrentsa leskro djipen newes kras.
a An o bersh 1879 dan le O Gardeskro Kheer wri. Kote was — un well ninna an maro tsiro — o biblakro tchatchepen sikedo.