LEKTIONA 20

Har i Versammlunga organisieredo hi

Kate nai druckreh kowa

O Jehowah kamell, kai nashell halauter mishto tele (1. Korintarja 14:33). Jaake haiwah, kai hunte nashell pash kolende, kai ap leste patsenna, ninna halauter mishto tele. Jon hunte wenn organisieredo. Har hi i Versammlunga organisieredo? Hoi nai krah mer, te nashell halauter shukar un mishto tele?

1. Koon hi o rai pral i Versammlunga?

O Jesus Christo hi “o rai pral i tsele patslende” (Efesarja 5:23). Dran o bolepen dikell lo, hoi i Jehoweskre menshe ap i phub krenna. “O latcho budepaskro” — ko hi jek gruppa morshender, kai Phureste hin — las i Jesestar koi budi, te dell lo garda ap i Debleskri Versammlunga ap i phub. Jon wenn ninna Pralstune Sikepangre kharedo (Dik pal an Mateo 24:45-47). An o phuro tsiro kran i Phureste an i Jerusalem kowa ninna jaake. Jon sikran un penan i patslenge, hoi te krenn le (Bitchepangre 15:2). I Pralstune Sikepangre hin gar i raja an mari organisationa. Jon dikenn pal kowa, hoi o Jehowah an i bibla mukas te tchinell un atchenn tel o wast maro rajestar Jesus.

2. Hoi krenn kola, kai kharenn Phuresta?

I Phureste hin loyaltike morsha, kai hin bud bersha an o patsepen. Jon sikrenn, hoi i bibla penella, hin i Jehoweskre menshenge koi un krenn len sorles, jaake har i bakrengro kowa pash peskre bakre krella. Jon len kek lowe, jon “krenn koi budi dran o kamlepen un gar, te wenn [le] plaissedo” (1. Petro 5:1, 2). Kote denn ninna Budepangre an i Versammlunga, kola djan i Phurenge ap o wast. Te hin le an o patsepen jaake dur, nai wenn jon ninna Phureste.

I Pralstune Sikepangre rodenn ninna Phureste win, kai wenn Ulepaskreskre Phureste. Kola djan an budeder Versammlunge, te krenn le o patsepen pengre phralendar sorleder. I Ulepaskreskro Phuresta putchell ninna pal: Hi i phraal an peskro patsepen jaake dur, te nai well lo i Budepaskro an i Versammlunga oder i Phuresta? Te hin le an o patsepen jaake dur, dell lo len koi budi (1. Timoteo 3:1-10, 12; Tito 1:5-9).

3. Hawi budi hi hako Rakepangres i Jehowestar?

I tsele an i Versammlunga “sharenn o baro Debleskro lab.” Jon engagierenn pen an o Khetnepen un krenn i Debleskri Budi jaake bud, har jon nai krenna (Dik pal an Gilja 148:12, 13).

RODAS DUREDER

Kanna dikeh, har o Jesus peskri budi krella, har i Phureste i Jeseske pal krenna un har mer i Jeseha un i Phurentsa nai khetne budrah.

4. O Jesus hi i latcho rai

O Jesus dell menge i latcho lab. Dikenn pal an Mateo 11:28-30, un rakrenn khetne pral:

Hawo rai hi o Jesus un har kamell lo, te djal menge?

Har krenn Phureste i Jeseskri shinia pal? Dikenn o VIDEO.

VIDEO: I Phureste reagierenn ap ko phubjakro trisslepen an Nepal (4:56)

An i bibla hi tardo, har i Phureste pengri budi hunte krenn.

Dikenn pal an Jesaja 32:2, an Jeremia 23:4 un an 1. Petro 5:1-3, un rakrenn khetne pral:

Har hi tuke kowa, kai djineh kanna, kai kamenn i Phureste jaake latcho te well, har o Jesus?
Har nai krenn i Phureste i Jeses gomme pal?

5. Dran pengro djipen sikrenn i Phureste men o Debleskro drom

Har kamas o Jesus, te dikenn Phureste ap pengri budi? Dikenn o VIDEO.

VIDEO: I Phureste hunte djiwenn o Debleskro drom! (7:39)

O Jesus das kolenge o standard, kai sikrenn i patslen an i Versammlunga o Debleskro drom. Dikenn pal an Mateo 23:8-12, un rakrenn khetne pral:

An i bibla hi o biblakro standard i Phurenge tchinlo. Penals tu, wawar rashaja un pastore rikrenn pen ap ko biblakro lab?

A. Collage: I Phuresta rikrell pes un penskri familja sorles an patsepen. 1. Job mangell glan o rodepen an i bibla. 2. Job sikrell peskri romjah peskri tikni tchai.

B. Ko phraal hi peskri romjah pash i nasseli pheen, kai hi an o nasslengro kheer.

Phureste rikrenn pen un pengri familja sorles an o patsepen
Phureste hin i phralenge un phenjenge an i Versammlunga koi
Phureste djan an i Debleskri Budi
Phureste hin sikepangre. Jon krenn an o Jehoweskro Kheer ninna djudjo un krenn wawar koowa

6. Mer nai budrah i Phurentsa khetne

I bibla penell menge, hoske te budras i Phurentsa khetne. Dikenn pal an Hebrearja 13:17, un rakrenn khetne pral:

Hoske penell i bibla, kai hunte shunas mer ap kowa, hoi i Phureste penenna? Hoske peneh tu kowa jaake?

Dikenn pal an Luka 16:10, un rakrenn khetne pral:

Hoske hunte budras mer i Phurentsa khetne, ninna te dikell kowa an mare jaka jaake wi, har te wals ko i tikno koowa?

BUD PENENNA: “Me nai patsau ninna jaake ap o Debleste. Me hunte djap an kek organisationa dre.”

Hoske nai well tuke kowa mishto, tu te hal an i Debleskri organisationa?

HOI KATE PENLO WAS

O Jesus hi o rai pral i Debleskri Versammlunga. I Phureste atchenn tel o Jeseskro wast, denn garda ap i Versammlunga un sikrenn an pengro djipen, kai djiwenn le o Debleskro drom. Doleske budrah lentsa ninna o djiestar khetne.