LEKTIONA 13
I patsepen, hoi gar tchatcho hi, anell ladj ap o Debleste
Te hi o Dewel kamlepen, hoske krenn le an i religione jaake bud tchilatchepen un penenn, kai o Dewel kowa kamella? O tchatchepen hi: Jon hi chochene. Jon anenn i bari ladj ap o Debleste. Har krenn le kowa? Har hi o Debleske kowa un hoi krell lo doleske?
1. Har kola chochene religione ladj ap o Debleste dran kowa anenna, hoi jon sikrenna
I chocheno patsepen tchiwell “o Debleskro tchatchepen ap i rig” (Remarja 1:25). Jaake kran le kowa o Debleskro labeha. Ninna, kai penell i bibla menge, te kharas o baro Debleskro lab an, penenn bud religione gar, har o Dewel kharella (Zefanja 3:9). Te djas i bibacht, penenn bud rashaja un pastore, kai o Dewel kowa jaake kamas. Hawo baro chochepen! An kek tsiro well o Deblestar tchilatcho koowa (Dik pal an Hiob 34:12). Lengro chochepen kras, kai tserdan pen bud o Deblestar pale.
2. Har jon ladj ap i Debleste anenna dran kowa, hoi jon krenna
Chochene religione djan i menshentsa gar jaake trujel, har o Jehowah kowa kamella. I bibla penell pral chochene religione, lengri “doosh hi jaake baro, te djal koi doosh an o bolepen pre” (Debleskro tsiro 18:5). Pral bud sheel bersha denn pen rashaja an i politika dre, djan kolenge pash o wast, kai krenn kurepen, un doleske hi len i bari doosh ap o merepen kitse menshendar. Bud rashaja tserdenn pengre patslendar lowe, te nai djiwenn le i djipen an brawlepen. Kowa halauter sikrell, kai prindjrenn le o Debles gar, kai tchiwenn le ladj ap leste un doleske nashte lenn le leskro koowa gar an o wast (Dik pal an 1. Johanni 4:8).
3. Har dikell o Dewel ap kola chochene religione?
Krell tut kowa chojedo, hoi kola chochene religione kran? Te djal tuke jaake, har hunte well kowa i Jehoweske? Job kamell i menshen, doleske hi lo pral kola rashaja un pastore chojedo, kai anenn chochepen ap leste un kai hin tchilatcho ap pengre patslende. Job das menge peskro lab, kai dell lo i chochene religionen paash “un tchi buder atchell” lendar (Debleskro tsiro 18:21). Sik lell o Dewel hako chocheno patsepen krik (Debleskro tsiro 18:8).
RODAS DUREDER
Kanna well tuke sikedo, har o Dewel ap kola chochene religione dikella, kai kran jaake bud paash. Tuke well ninna penlo, hoske tuke kowa mishto hi, te mukeh kanna gar tele, te kress dureder.
4. O Dewel dikell gar ap hako patsepen latches
Bud patsenn, religione hin jaake har budeder droma. Anenn jon halauter pash o Debleste? Dikenn pal an Mateo 7:13, 14, un rakrenn khetne pral:
Hoi penell i bibla pral ko drom, kai i menshe o djipen hatsenn?
Te dikan o VIDEO, rakrenn khetne pral:
Penell i bibla, kai hi hako patsepen an i Debleskre jaka mishto?
5. Chochene religione sikrenn gar o Debleskro kamlepen
An jaake bud situatione sikrell pes: I religione sikrenn gar, har o Dewel tchatchepah hi. Jek baro tchilatchepen hi, kai denn jon pen an o kurepen dre. Te dikan o VIDEO, rakrenn khetne pral:
Hoi kran bud kangja an o 2. Swetteskro Kurepen?
Har hi tuke kanna, kai djineh, hoi jon kran?
Dikenn pal an Johanni 13:34, 35 un 17:16, un rakrenn khetne pral:
Hoi penals tu: Har hi i Jehoweske kowa, te dell pes i patsepen an o kurepen dre?
O chocheno patsepen kras bud tchilatcho koowa. Ap hawo koowa haiweh tu, kai sikrenn jon gar o Debleskro kamlepen?
O chocheno patsepen sikrell gar, har kamlo o Dewel hi
6. O Dewel kamell i menshen dran o chocheno patsepen win te lell
Dikenn pal an Debleskro Tsiro 18:4,a un rakrenn khetne pral:
Har hi tuke kowa, kai kamell o Dewel menshen dran pengro chocheno patsepen win te lell, kai wan an pengri religiona chochedo?
7. Dik, te brindjress o tchatcho Debles feteder
Hal tu chojedo ap o Debleste doleske, kai krell o chocheno patsepen jaake bud tchilatcho koowa? Tchip tuke kowa glan i jaka: Kote hi i tchawo, kai mukell pes peskro dadestar tchi te penell, tserdell dran peskro dadeskro kheer win un krell bud tchilatcho koowa. Te akzeptierell o dad peskro tchaweskro djipen gar, wals kowa mendar fair, mer te penams, kai hi i dades doosh ap ko tselo tchilatcho koowa, hoi o tchawo krella?
Wals kowa fair, te dams mer i Jehowes doosh ap kowa, hoi o chocheno patsepen krella un te tserdams mer men doleske lestar pale?
BUD PENENNA: “Me kamau tchi o Deblestar te djinell, job un i religione anan jaake bud bibacht ap mende.”
Dikeh tu kowa ninna jaake?
Hoske te was mer gar chojedo ap i Jehoweste doleske, hoi i chochene religione krenna?
HOI KATE PENLO WAS
O chocheno patsepen anell ladj ap o Debleste dran kowa, hoi job sikrella un dran kowa, hoi job krella. O Dewel tchiwell kola chochene religionen krik.
Hoi penals tu?
Hoi peneh tu pral kowa, hoi o chocheno patsepen sikrella un krella?
Har hi i Jehoweske kowa, te dikell lo ap kola chochene religione?
Hoi krell o Dewel lentsa?
BUDEDER
Kate nai hatseh, hoi bud religione krenna, hoi o Dewel gar kamella.
“Hi hako patsepen mishto? Anell haki religiona pash o Debleste?” (I artikla online)
Kate nai drawereh, hoske o Jehowah kamella, te was wawarentsa khetne.
Kate hi pral i rashaj tchinlo, kai haiwas, kai his leskro patsepen gar tchatcho. Kowa rikras les gar pale, te rodell lo dureder pal o tchatcho Debleste.
“I rashaj djal dran peskri kangri win” (Djangrenna!, Februar 2015)
Bud sheel bersha anan religione chochepen ap o Debleste pre. Kate hatseh o tchatchepen pral triin chochene laba.
“Chochepen, hoi pral i kamlo Debleste penlo was” (O Gardeskro Kheer, November 1, 2013)
a Te kameh te djinell, hoske o chocheno patsepen an o biblakro liil Debleskro Tsiro Babilon, koi bari kharedo wella, dik an O Palstuno Tchinepen 1.