Mate

7 Majdur na shinen kris pe kaverende, te na shinen kris vi pe tumende, 2 ke soski kris shinen, kasavi kris shinena vi pe tumende, haj sar keren kaverenca, vi tumenca kade kerna. 3 Sostar dikhes o kanro ande tye phraleske jakha, thaj ande tye jakha chi les sama o kasht? 4 Vaj sar shaj phenes tye phraleske: »Mukh te lav avri anda tye jakha o kanro«, kana ande tye jakha o kasht si? 5 Tu char makhlo! Majanglal le avri o kasht anda tye jakha, haj atunchi uzhes dikhesa, sar te les avri o kanro ande tye phraleske jakha. 6 Na den le zhuklenge kodo, so suntoj, haj chi tumari bisora, te na shuden angla le bale, te na ushtyaven pe lende, haj pala kado karing tumende boldenapen, te shingren tumen. 7 Mindig mangen, thaj dena tumenge, mindig roden, thaj rakhena, mindig maren o vudar, thaj puterdyola. 8 Ke sakon, kon mangel, lel, kon rodel, rakhel, haj kon marel o vudar, kodoleske puterdyol kodo. 9 Mashkar tumende kon si kodo, kana lesko shavo manro mangel, barr del les? 10 Vaj kana mashes mangel, atunchi sapes del les? 11 Anda kado, ke tume, kon bezexale san, zhanen lasho te den tumare shavorenge, atunchi sodevar majfeder del lasho tumaro cheresko Dad kodolenge, kon mangen les. 12 Sakofelo, so kamen te keren tumenca le manusha, vi tume kade te keren lenca, ke pe kado tordyol e Krisi, thaj le Profeti. 13 Zhan andre pe o sano vudar, ke o bulho thaj o lungo drom ando meripe ingrel, thaj butzhene zhan andre pe kodo. 14 De sano si o vudar, thaj o drom, so pe o trajo ingrel, thaj cerra zhene rakhena les. 15 Len sama kathar le xoxamne profeti, kon ande bakrenge gada aven karing tumende, de andral bokhale ruva si. 16 Pa lenge fruktura pinzharena len opre. Pe xanreste chi kiden drakh, vaj pe o burra fuge? 17 Vi kade sako lasho kasht lasho frukto anel, de sako kerno kasht chorro frukto anel; 18 lasho kasht nashtig anel chorro frukto, thaj chi o kerno kasht nashtig anel lasho frukto. 19 Sako kashtes, savo chi anel lasho frukto, avri shinen thaj ande jag shuden. 20 Kade, pa lenge fruktura pinzharena opre kadale manushen. 21 Na sakon zhala andre ande le cheresko krajipe, kon kodo phenel mange: »Raja, Raja«, numa kodo, kon kerel so muro cheresko Dad kamel. 22 Butzhene phenena mange pe kodo dyes: »Raja, Raja, na ande tyiro anav vorbindam, nashadam avri demonon, thaj kerdam but chudi?« 23 De me atunchi phenav lenge: »Khanchi grizha chi xalma tumenca! Zhantar mandar, tume, kon phagen e krisi! 24 Kade pale sakono, kon shunel kadala vorbi, thaj vi andre inkrel le, kasavo si, sar o godyaver manush, kon po barr kerdas pesko kher. 25 Delas o brishind, avlas o paji, phurdelas e balval, sa leske gele le khereske, de chi rumusardas kodo, ke po barr cirdine opre. 26 Kon ashunel kadala vorbi, de chi kerel kodo, atunchi voj kasavoj, sar o dilo manush, kon pesko kher po kishaj kerdas. 27 Delas o brishind, avlas o paji, phurdelas e balval, sa leske gele le khereske, thaj kodo rumusardas, thaj kethane phagerdyilas.” 28 Kana o Jezush kodola vorbi phendas, o nipo chudisajlas pe kodo, sar voj sityarel, 29 ke kade sityarelas, sar kas zor si, thaj na kade, sar le iskiritori.