1Janosh
2 Mure shavora, anda kado iskirinav tumenge, te na keren bezex. De vi te kerela varikon bezex, si amen jekh zhutori kaj o Dad: o Jezush Kristush, kon chacho. 2 Voj peske trajo das, te slobodisaras amen anda amare bezexa, de na feri amenge, feder vi anda le intrego lumako bezexa. 3 Anda kado zhanas, ke pinzhardam les, ke vi majdur keras leski vorba. 4 Kon kodo phenel: „Aba pinzharav les”, de chi kerel leski vorba, kodo xoxamnoj, thaj o chachipe naj ande lesko jilo. 5 De kon inkrel leski vorba, ande lesko jilo chaches doshalo si le Devlesko kamipo. Anda kado zhanas, ke ame jekh jilesa sam lesa. 6 Kon kodo phenel, ke vi majdur jekh jilesa avla lesa, voj vi majdur musaj kadej te trajil, sar voj trajindas. 7 Mure kamade! Chi dav tume jekh nyevi vorba, de jekh phuro vorba, pe soste po dulmutani vrama sityarden tumen. Kadi phuro vorba kado, so tume ashundan. 8 De vi nyevo vorba kado, pe soste me iskirij tumenge, thaj kado vi voj inkerdas, thaj vi tumenge inkren kado, ke zhaltar e tunyariko, thaj chaches pekel o kham. 9 Kon kodo phenel, ke voj kothe si, kaj pekel o kham, de xojajvel pe pesko phral, voj inke anda tunyariko si. 10 Kon kamel peske phrales, voj kothe ashel kaj pekel o kham, thaj chi peravel anda khancheste. 11 De kon xojajvel pe pesko phral, voj anda tunyariko si, thaj anda tunyariko phirel. Voj chi zhanel kaj zhal, ke o tunyariko korrardas leske jakha. 12 Anda kado iskirinav tumenge mure shavora, ke tumare bezexa jertime si anda lesko anav. 13 Anda kado iskirinav tumenge dada, ke tume pinzharen les, kon anglunes sas. Anda kado iskirinav tumenge, ternale, ke tume marde o nasul. Anda kado iskirinav tumenge shavore, ke pinzharde le Dades. 14 Anda kado iskirinav tumenge dada, ke pinzharen les, kon kathar le angluni vrami si. Anda kado iskirinav tumenge, ternale, ke tume zurale san. E Devleski vorba vi majdur beshel anda tumaro jilo, thaj marden o nasul. 15 Te na kamen e luma thaj chi kodola, so ande luma si. Varikon te kamel e luma, chi kamel le Dades. 16 Ke khanchi na kathar o Dad si, so ande luma si: chi kodo so o teshto kamel, chi kodo so le jakha kamel, thaj chi kodo, ke o manush barimangoj ande kodo, so si les. Kadal sa kathar e luma si. 17 Thaj e luma nacholtar, thaj vi kodo so kamel, de kon kodo kerel, so o Del kamel, kodo chi merel. 18 Mure shavora, kado si o paluno chaso. Ashunde ke avel o Antikristush, thaj aba vi akanak but antikristushura sikadyon. Anda kado zhanas, ke kado si o paluno chaso. 19 Von maskhar amende geline avri, de na kasave sasle, sar ame. Ke te kasave avenasas, sar ame, atunchi amenca ashilinesas. De von avri geline, thaj kado sikavel, ke na sakon kasavoj, sar ame. 20 Tumen opre makhle o sunto, thaj mashkar tumende sakoneske si pinzharipe. 21 Na anda kodo iskirinav tumenge, ke chi pinzharen o chachipo, feder anda kodo, ke tumen pinzharen o chachipo, thaj ke chi avel khanchi xoxamnipo anda o chachipo.