Jakab
2 Bare losshasa dikhen, phralale, kana sakofelo zumaimata si tumen, 3 ke zhanen kodo, ke tumare patyamosko zumaimo, zhutil avri te inkren. 4 O avri inkripe mukh te resel so trubul, ke gata thaj ande sakofelo saste te aven, thaj sakofelo t’avel tume. 5 Kana varisaveske godyaveripo trubul, zurales te mangel les kathar o Del - ke voj chache jilesa del sakoneske -, thaj avla les. 6 De patyamosa te mangel, thaj te inkrel avri anda kado, thaj na cino patyamosa, ke kon chi patyal, kodo kasavoj, sar kana e balval kathe-kothe tradel o paji. 7 Kasavo manush te na gindil, ke lela variso kathar o Jehova. 8 Ke voj chi zhanel, so kamel, thaj chi zhal vorta pe pesko drom. 12 Baxtaloj kodo manush, kon avritordyol ando zumajipe, ke pala kado, fajil le Devleske, xutyilel le trajoski korona, so o Jehova kodolenge shinadas, kon sako vrama kamen les. 13 Khonyik te na phenel kana zumaven les: „O Del zumavel man”. Nasulimasa nashtig zumaven le Devles, thaj chi voj chi zumavel kasavesa khanyikas. 14 Sakono kade si zumado, sar lesko kamipe ingrel les thaj andre cirdel les. 15 Kana pala kodo o kamipe kerdyilas, bezex anel, o bezex pale, kana keren les, meripe anel pe luma. 17 Sako lashi butyi, thaj sako bidoshalo davipo kathar le cheresko Dad avel tele, kon chi boldelpes, sar o ushajin. 18 Ke voj kodo kamelas, ke ande luma te anel amenge perdal pe chachimaski vorba, ke sar angluno frukto t’avas anda lesko kerdyimata. 19 Te zhanen kado, mure kamade phrala: Sakono sigo te shunel, lokhes te phenel, lokhes te xojajvel. 20 ke le manusheski xoji, chi kerel butyi kethane le Devlesko chachiposa. 21 Anda kado shuden tumendar sakono biuzhipe, haj le butfelura nasulimata, haj te mukhen, kana o Del ande tumende shuvel kodi vorba, so zhanel te muntusarel tumen. 22 De vi mukhen tume la vorbake, na feri te shunen la, ke xoxamno gindonca rigate te ingren tumen. 23 Ke kana varikon shunel e vorba, de chi mukhel pe leske, kodo kasavo si, sar kodo manush, kon pesko muj dikhel ande glinda. 24 Ke dikhelpe, pala kodo zhaltar, thaj aba bistrel sosko manush si voj. 25 De kon andre dikhel ande chachi krisi, so slobodisarel, thaj pasha leste ashel, kodo chi bistrel e vorba, thaj mukhel pe leske, thaj baxtalo avla, ke andre inkrel les. 26 Te varikon kodo gindil, voj le Devles slugil, de pe peski shib chi lel sama, atunchi voj rigate ingrel pesko jilo, haj lesko patyamo chi mol khanchi. 27 Anglal amaro Del, haj Dad kado si o uzho, haj bidoshalo patyamo: anda lengo pharimata te len sama pe kodola shavora, kas naj dada, haj deja, haj kon xasardas peske romes, vaj romnya, haj kather e luma te ashas uzhes.