Izaiash

11 Rovji barol avri anda Ishaiveski buchuma, thaj frukto anel jekh kranga, so andar leski buchuma barol avri. 2 Le Jehovasko duxo ashel pe leste, le godyaveripesko thaj le uzhe dikhlimasko duxo, la vorbako thaj la zorako duxo, le zhanimasko thaj le Jehovasko bara patyivako duxo. 3 Rakhela peski voja ande kodo, ke zurales patyivil le Jehovas. Na kade shinel krisi, so dikhel, thaj chi na kade lasharel, pe soste shunel. 4 Chachikanes shinela krisi le chorrenge, thaj kade lasharela le manushen, ke chi tordyol chi pe jekh rig, thaj kado kodolenge avla lasho, kasko jilo pachakoj. Thaj leske vorbi kasave avna, sar e rovji, sosa marel e phuv, thaj peske mujesa mudarel le nasulen. 5 Chachipo avla o brechinari pe lesko mashkar, thaj patyiv avla pe lesko mashkar. 6 O ruv kethane beshela le bakresa, o leopardo la cina buznyasa pashjol, e cini guruvnyi, e vadno muca thaj o thulo allato sa kethane avna, thaj jekh cino shavoro lela pe lende sama. 7 E guruvnyi thaj e medve kethane xana, thaj kethane pashjon tele lenge cine. E vadno muca sulum xala, sar o guruv. 8 O cino shavoro, kon inke thud pel, pasha sapeski gropa khelelape, thaj o shavoro, kon aba chi pel thud, opre shola pesko vast pa le sapeski gropa. 9 Chi azbana, thaj chi pustitina khatik pe muro sunto plaj, ke pe intrego phuv pinzharena le Jehovas, sar le paja pherdyaren o baro paji. 10 Pe kodo dyes le Ishaiveski buchuma opre tordyola, somno te avel le niponge. Kaj leste bolden le nipura, te sikavel o drom, thaj baro avla kodo than, kaj voj beshel.