Janosh

4 Kana o Raj zhanglas, ke le farizeushura shunde, ke voj majbut sityarden kidel, haj bolavel, sar o Janosh, 2 – de o chachipo kodoj, ke na o Jezush bolavelas, feri leske sityarde –, 3 mukhlas e Judea, haj palpale gelas ande Galilea. 4 Anda kado, pherdal trubundas te zhal pa e Samaria. 5 Reslas kaj jekh Samariako foro, savo anav o Sikar sas, pasha kodi phuv, so o Jakob das peske shaveske, le Jozhefeske. 6 Kothe sas le Jakobeski xajing. O Jezush khinyardo sas kathar o drom, haj tele beshlas kaj e xajing. Kado karing le shovto chasura sas. 7 Kothe avilas jekh samariaki romnyi, ke paji te cirdel. O Jezush kado phendas lake: „De man te pav!” 8 (Ke leske sityarde gelinetar ando foro, xamasko te kinen.) 9 E samariaki romnyi kodo phendas leske: „Sostar manges mandar te pes, kana tu biboldo san, haj me samariaki romnyi sim?” (Ke le bibolde chi vorbin le samariakenca.) 10 O Jezush kado phendas: „Te pinzharesas le Devleski davipo, haj ke kon si kodo, kon kado phenel tuke: »De man te pav«, atunchi tu manglanas les, haj voj trajimasko paji dinosas tut.” 11 E romnyi kade das duma: „Raja, naj tut khanchi sosa paji cirdesas, e xajing pale milnoj. Kathar lesas apol o trajimasko paji? 12 Vaj tu majbaro san kathar amaro dad, kathar o Jakob, kon e xajing das amenge, haj anda soste vi voj, vi leske shave, haj vi leske allatura pile? 13 O Jezush kado phendas: „Sa kon anda kado paji pel, pale trushajvela. 14 De kon anda kodo paji pela, so me dav leske, kodo soha chi trushajvela, feder o paji, so dav les, kodo jekh kasavi xajing avla anda leste, so biagoresko trajo del.” 15 Pe kado e romnyi kade das duma: „Raja, de mange kodo paji, ke tena trushajvav, haj tena trubul majbut kathe te phirav, haj te cirdav o paji!” 16 O Jezush kado phendas lake: „Zha, haj akhar tye romes, haj av kathe lesa!” 17 E romnyi pe kado kodo phendas: „Naj man rom.” O Jezush kado phendas lake: „Mishto phendan, ke naj tut rom. 18 Ke panzh rom sas tut, haj kon akanak si tut, kodo naj tyo rom. Anda kado chachipo phendan.” 19 E romnyi atunchi kade das duma: „Raja, dikhav ke profeta san. 20 Amare dada pe kado plaj rudyinas le Devles, tume pale kodo phenen, ke ando Jeruzhalemo trubul te rudyin les.” 21 O Jezush kado phendas lake: „Patya mange romnye, ke avlatar o chaso, kana chi pe kado plaj, haj chi ando Jeruzhalemo na rudyina le Dades. 22 Tume karing kodo rudyin, kas chi pinzharen, ame karing kodo rudyinas, kas pinzharas, ke o muntusaripo anglunes kathar le bibolde avel. 23 Avela kodo chaso, thaj kado akanak si, ke le chache, duxosa, thaj chachimasa patyivin le Dades, ke vi o Dad kasaven rodel, te patyivin les. 24 O Del Duxo si, thaj kon patyivin les, kodolenge duxosa, thaj chachimasa si te patyivin les. 25 E romnyi pe kado kodo phendas: „Zhanav, ke avelatar o Messhiasho, kon si o Kristush, haj kana voj avelatar, avri phenela amenge sakofalo.” 26 O Jezush kado phendas lake: „Me som kodo, kon tusa vorbij.” 27 Atunchi kothe resline leske sityarde, haj chudinaspe pe leste, ke romnyasa vorbil. De chi jekh chi pushlas les: „So kames latar?” vaj: „Sostar vorbis lasa?” 28 E romnyi pale kothe mukhlas pesko khoro, gelastar ando foro, haj duma das le manushenge: 29 „Aven, dikhen le manushes, kon phendas mange sakofalo, so kerdem. Hajkam, na voj si o Kristush?” 30 Kodola pe kado avrigeline anda foro, haj kothe geline leste. 31 Tela kado vrama leske sityarde mangenas les: „Rabbi, xa!” 32 Voj kodo phendas lenge: „Si man xamasko, pa soste tume chi zhanen.” 33 Atunchi le sityarde jekhavres pushenas: „Shajke andas leske varikon, te xal?” 34 O Jezush, kodo phendas lenge: „Muro xaben kodoj, te kerav so kodo kamel, kon bishaldasma, thaj te kerav leski butyi.