Janosh

13 Aba angla paskako baro dyes o Jezush zhanelas, ke avilastar lesko chaso, te zhal anda kadi luma kaj pesko Dad. Kamelas peske manushen, kon ande luma sasle, zhi kaj o agor kamelas len. 2 Kana le ratyako xamasko sas, o Beng andre das ande le Iskariot Judasheske jilo kodo, ke te purrisarel les. 3 O Jezush zhanelas, ke sakofalo leske das o Dad, haj ke kathar o Del avilastar, haj kaj o Del zhal palpale, 4 opre ushtyilas kathar o xamasko, tele shutas peske opralutne gada, xutyildas jekh dikhlo, haj angla peste phanglasles. 5 Pala kodo paji shordas ande jekh thovjimasko vaso, haj las te thovel le sityardenge punre, pala kodo khoslasle kodole dikhlesa, so pe lesko mashkar sas phanglo. 6 Kana kothe reslas kaj o Shimon Peter, kodo kado phendas: „Raja, tu thoves mure punre?” 7 O Jezush kodo phendas leske: „So me kerav, kodo tu akanak chi hatyares, de majpalal hatyaresales.” 8 O Peter pe kado, kade das duma: „Mure punre apol chi thovesa!” O Jezush kodo phendas leske: „Tena thovav tut, chi avla tut rig manca.” 9 Atunchi o Shimon Peter kodo phendas: „Raja, atunchi na feri mure punre, de thov vi mure vast, haj vi muro shero!” 10 O Jezush kodo phendas pe kado: „Kon najilas, kodaleske dostaj feri leske punre te thoven, atunchi intregones uzhoj. Vi tume uzhe san, de na savorazhene.” 11 Ke zhanelas, ke kon si, kon purril les, anda kodo phendas: „Chi san savorazhene uzhe.” 12 Pala soste thodas lenge punre, opre las peske oprune gada, pale tele beshlas kaj e mesaja, haj kodo phendas lenge: „Zhanen tume, ke so kerdom tumenca? 13 Tume kade akharen man: »Sityardo«, thaj »Raj«, thaj mishto phenen, ke kodo som. 14 Anda kado, te me o Raj, thaj o Sityardo thodom tumare punre, vi tumenge trubuj te thoven jekhavreske punre. 15 Ke sikadom tumenge sar te keren, ke so me kerdom tumenca, vi tume kade te keren. 16 Chaches phenav tumenge: Naj majbaro o sluga kathar pesko raj, haj chi o bishaldo naj majbaro kathar kodo, kon bishaldas les. 17 Akanak, aba zhanen kadala, de atunchi avena losshasa, vi te kerena les. 34 Nyevi vorba dav tumen: te kamen jekhkaveres. Sar me kamav tumen, vi tume kade te kamen jekhkaveres. 35 Pe kodo zhanela sakono, ke mure sityarde san, kana kamipe si mashkar tumende.