Janosh
17 Pala kadal vorbi o Jezush po cheri vazdas peske jakha, thaj kado phendas: „Muro Dad, reslas o chaso. Te barares tye Shaves, ke vi tyo Shavo te bararel tut. 2 Zor dan les pe sako manush, ke biagoresko trajo te del sakoneske, kas leske dan. 3 Pasha kodo, varikon mindig te trajil, kodo trubul, te pinzharen tut, le korkoro chache Devles, thaj kodoles, kas bishaldan, le Jezush Kristushes. 4 Me barardem tyo anav pe phuv, thaj kerdem e butyi, so dan man. 5 Akanak pale Dade, de man patyiv, mukh t’avav pasha tute, thaj te shaj avel muri kodi patyiv, so atunchi sas man, kana pasha tute simas, angla soste e luma kerdyilas. 6 Pinzharavadem tyo anav kodole manushenca, kas mange dan ande luma. Ke tyire sas, tu pale mange dan le, thaj inkerde tyiri vorba. 7 Aba akanak zhanen, ke sogodi, so mange dan, tutar si, 8 ke o sityaripe, so tutar lom, pherdal dom lenge. Von line len kadala, haj vi chaches pinzharde kodo, ke tutar avilom, haj patyajline kodo, ke tu bishaldan man. 9 Anda lende mangav. Na anda e luma mangav, feder anda kodola, kas mange dan, ke von tyire si. 10 Haj sa kodo, so muroj, kodo tyiroj, haj so tyiroj, kodo muroj, haj von asharde man. 11 Haj me chi som majdur ande e luma, de von ande e luma si, de me pale kaj tute zhav. Muro Sunto Dad, le sama pe lende anda tyiro anav, so mange dan, ke von jekh te aven, sar amen jekh sam. 12 Kana lenca somas, garadem len anda tyiro anav, kas mange dan. Garadem len, haj chi jekh chi xasajlas mashkar lende, feri o pustimasko shavo, ke pecisajlas kodo, so iskirinde si. 13 Akanak palpale zhav tute, kadala anda kodo phenav ande luma, ke lengi lossh kasavo t’avel, sar muri lossh. 14 Phendem lenge sakofelo, so tu phendan, de e luma xojalvel pe lende, ke von naj andre ande luma, sar chi me chi som andre ande luma. 15 Chi mangav tut, ke te les len avri anda luma, feder te inkres dur len kathar o nasul. 16 Von naj andre anda kadi luma, sar so chi me chi som andre anda kadi luma. 17 Suntosar len le chachimasa, tyiri vorba chachimo si. 18 Sar tu bishaldan man ande e luma, kade vi me bishavav len ande e luma. 19 Anda lende suntosarav man, ke vi von sunto t’aven ando chachipo. 20 Na feri anda lende mangav tut, vi anda kodola, kon pe lengi vorba patyan ande mande, 21 ke savorazhene jekh te aven, sar so tu, muro Dad, jekh san manca, thaj me jekh sim tusa, thaj vi von jekh te aven amenca, te patyal e lume, ke tu bishaldan ma. 22 Uladom lenca o asharipe, so dan man, ke jekh te aven, sar ame jekh samle. 23 Me jekh jilesa som lenca, haj tu jekh jilesa san manca, haj kade vi von chachikanes jekh aven. Anda kado zhanel e luma, ke tu bishaldan man, haj kade kamlan len, sar man kamlan. 24 Muro Dad, kodo kamav, ke vi von, kas mange dan, kothe t’aven manca, kaj me som, ke te dikhen muro barimo, so mange dan, ke kamesas man angla kadi vrama, kana e luma kerdyilas. 25 Muro chacho Dad! E luma chi pinzhardas tut, de me pinzharav tut, haj von pinzhardine, ke tu bishaldan man. 26 Thaj pinzharavadem lenca tyiro anav, thaj vi pinzharavo les, ke vi von kade te kamen kaveren, sar so tu kamesas man, thaj jekh t’avav lenca.