Mate

6 Sama len pe kodo tumaro lashipe na angla manusha te keren, anda kodo te dikhen tumen, ke o Del chi dela tumen khanchi. 2 Anda kado, kana le chorren des, na cipin avri khanyikaske, sar so le charde makhle keren ande zhinagoga, thaj pe vulici, te asharen len le manusha. Patyan, ke aba dine lengo intrego potyinimo. 3 Kana le chorren des, tena zhanel tyiro stungo vast, so kerel o chacho, 4 ke so le chorren des garade t’ashon, atunchi tyiro Dad, kon choral dikhel, del tyiro potyinimo. 5 Kana rudyinen, te na aven kasave, sar so le charde makhle, ke von kamen te rudyin ande zhinagoga thaj pe bare vulici, te dikhen len le manusha. Patyan, ke aba dine lengo intrego potyinimo. 6 Tu pale, kana rudyis, zha andre ande tyo kher, thaj pala phandade vudara rudyin kaj tyo Del, kas khonyik chi dikhel. Atunchi tyo Del, kon choral dikhel, palpale potyinela tuke. 7 Kana pale rudyinen, na phenen pale thaj pale kodi vorba, sar le nipura keren, ke von kodo gindinen, ke ande lenge but vorbi shunen len. 8 Te na aven kasave, sar von, ke tumaro Del zhanel, so trubul tumen angla soste mangenas les. 9 Tume kade rudyinen: »Amaro Dad, kon san ando cheri, te suntosardyol tyiro anav. 10 Te avel tyiro krajipo. Te kerdyol so tu kames, sar ando cheri, kade vi pe phuv. 11 De amenge adyes, kadale dyesesko manro, 12 thaj jertisar amare bezexa, sarso vi ame jertisaras, kon bezex keren amenge. 13 Thaj na inger amen ando zumavipe, feri muntun amen kathar o nasul.« 14 Ke te jertisarena le manushenge lenge dosha, vi tumaro Dad ando cheri jertisarela tumenge, 15 te na pale chi jertisarena le manushenge dosha, chi tumaro Dad chi jertisarela tumare dosha. 16 Kana postin, te na avel brigako tumaro muj, sar le xoxamnenge, ke von brigako keren pengo muj, te dikhen le manusha, ke von postin. Patyan, ke aba intrego palpale potyinde lenge. 17 Tu pale, kana postis, makh tyo shero ulejesa, thaj thov tyo muj, 18 te na le manusha te dikhen, ke postis, pale tyo Del, kon sakofelo dikhel. Atunchi tyo Del, kon choral dikhel palpale potyinela tuke. 19 Na kiden tumenge kethane majdur kinchura pe phuv, kaj xan le le kerme thaj e vrama, thaj kaj choren le le chora. 20 Feder ando cheri kiden tumenge kethane kinchura, kaj chi xan le chi le kerme, chi e vrama, thaj kaj chi choren le le chora. 21 Ke kaj so si tyo kincho, kothe avla vi tyo jilo. 22 Le teshtosko lampashi le jakhaj. Kana pale tyi jakh feri pe jekh butyi dikhel, tyo intrego teshto uzho avla. 23 De kana tyi jakh purunoj, tyo intrego teshto ando tunyariko avla. Kana so ande tute si uzhipe chachikanes tunyarikoj, sosko baroj kodo tunyariko! 24 Khonyik nashtig slugil duje rajen, ke kodo avla, ke le jekhes armaja del thaj le kaveres kamel, vaj kodo, ke kaj o jekh cirdel thaj le kaveres del armaja. Nashtig shaj slugin vi le Devleske, thaj vi le barvalimaske. 25 Ande kado kodo phenav tumenge, te na daran majdur anda o trajo, ke so xana, so pijena, so lena opre. Chi kerel majbut o trajo, sar o xamasko, thaj so opre len? 26 Dikhen mishto le chereske chirikjan, ke chi beshajaren, chi kiden kethane, tumaro Del inke del le te xan. Haj tume chi keren majbut lendar? 27 Kon si mashkar tumende, kon peska darasa, vi jekh cino, lungo zhanel te kerel pesko trajo? 28 Thaj sostar daran anda le gada? Sityon kathar le majake luludya. Dikhen, sar baron: chi khinyon, thaj chi na chi phanden, 29 de phenav tumenge, ke o Salamon kana o majbaro sas, chi uradaspe kade, sar ande kadala jekh. 30 Kana pale la majake luludyan, so adyes kathe si, thaj tehara ande bov shuden len, kade uravel o Del, atunchi na butesa majfeder tumen, tume cerrapatyamoske? 31 Soha te na daran, thaj te na phenen, ke »so xasa?«, »so pasa?«, vaj »so lasa opre?«. 32 Ke sa anda kadala le nipura phagrenpe. Tumare cheresko Del zhanel, ke sa kadala trubun tume. 33 Kade pale vi majdur roden majanglal o krajipo thaj le Devlesko chachimo, thaj kadala kaver butya opral del tumenge o Del. 34 Te na daran apol andar o kaver dyes, ke o kaver dyes darala anda peste. Sako dyeseske dostaj pesko gindo.