Lukach

4 O Jezush pherdo sas sunto duxosa, thaj kothe mukhlas o Jordano, thaj o duxo ingerdas les ande pusta 2 zhi kaj 40 dyesa, thaj kothe o Beng zumadas les. Thaj chi xalas khanchi anda kadal dyesa, anda kado, po agor bokhajlas. 3 O Beng atunchi kado phendas leske: „Le Devlesko Shavo te san, phen kadale barrenge, te kerdyon manre.” 4 De o Jezush kado phendas leske: „Iskirime si: »Na feri manresa te trajil o manush.«” 5 Atunchi o Beng opre ingerdas les pe jekh ucho than, thaj sigo sikadas leske la phuvake sako krajipe. 6 Pala kado kodo phendas leske o Beng: „Sa kadala zora thaj barimata tuke dav, ke kadal sa me xutyildem, thaj kodoleske dav len, kaske me kamav. 7 Apol te des changa angla mande, sa tyire avna.” 8 O Jezush kadi vorba das pale: „Iskirime si: »Le Jehovas, tye Devles patyivin, thaj feri leske ker sunto slugipe.«” 9 Pala kodo o Beng, ando Jeruzhalemo ingerdas les, thaj pe khangerako opruno than tordyardas les, thaj kado phendas leske: „Le Devlesko Shavo te san, shudetu tele, 10 ke iskirinde si: »Vorba del pe peske andyalonge, ke te len sama pe tute«, 11 thaj »pe pengi palmi inkrena tut, te na malaves tye punre ando barr«.” 12 O Jezush kado phendas leske: „Iskirime si: »Te na zumav le Jehovas, tye Devles.«” 13 Kade, o Beng chi zumadas les majdur, thaj gelastar, thaj kaver vrama zhukardas, te zumavel les. 14 O Jezush ande Duhoski zor palpale gelas ande Galilea. Thaj but lashi vorbi phende le manusha pa leste. 15 Sityarelas ande lengi zhinagogi, haj sakon patyivinas les. 16 Pala kodo ando Nazaret gelas, kaj opre barilas. Sar so sityilas, andre gelas savatone ande zhinagoga, haj opre tordyilas te ginavel. 17 Kothe dine leske le Izaiash profetasko lil. Kana puterdasla, avri rodine kodo than, kaj kado si iskirime: 18 „Le Jehovasko duxo si pe mande, ke voj makhlas man opre, te phenav e lashi vorba le chorrorenge. Voj anda kodo bishaldas man, muntujipe te phenav le phanglenge, haj le korrenge, ke pale dikhena. Thaj vi anda kodo bishaldas man, slobodeske te mukhav kodolen, kasko jilo phagerdoj, 19 thaj te vorbisarav pa o bersh, so lashoj angla o Jehova.” 20 Pala kodo kethane patyardas e hertija, palpale dasla le slugaske, thaj tele beshlas. Ande zhinagoga apol sakon pe leste dikhenas. 21 Voj atunchi kade das duma karing lende: „Adyes pherdyilas andre kado iskiripe, so majanglal ashunde.” 43 De voj kado phendas lenge: „Vi ande kaver forura trubul te vorbisarav pa le Devleski krajipeski lashi vorba, ke o Del anda kado bishaldas man.”