Mate

24 Kana o Jezush avri avilas anda e khangeri, leske sityarde kothe geline leste, te sikaven leske la khangerake barra. 2 Pe kadi voj kodo phendas lenge: „Dikhen kadala? Te patyan, ke chi ashela kathe barr pe barreste, so tele na pustisaren.” 3 Kana pe le Ulejenge Kashtengo plaj beshelas, le sityarde kothe gele leste, thaj kodo phende: „Phen amenge, kana avna kadala, thaj so avla so sikavel, ke aba kathe san, thaj kathej la lumako agor?” 4 O Jezush kade das len palpale vorba: „Sama len, ke khonyik te na xoxavel tumen; 5 ke butzhene avena ande muro anav, thaj kodo phenen: »Me som o Kristush«, thaj buten xoxavena. 6 Le marimatengo hango shunena, thaj pe marimata shunena vorbi, de te na darajven, ke kadalenge trubul t’aven. De kado inke naj o agor. 7 Ke nipo zhala niposke, thaj krajipe krajipeske, thaj avla bokh thaj mishkilape e phuv pe o jekh than pe o kaver. 8 Kadalenca aven le bare dukha. 9 Atunchi pe o chorrimo den tume, thaj mudaren tumen, thaj nashavena tumen ande sako nipo anda muro anav. 10 Haj atunchi butzhene perenatar thaj andre purrina jekhekavres, thaj xojajvena pe jekhekavres. 11 Thaj but xoxamne profeti avna, thaj buten andre xoxavena; 12 Thaj anda kodo ke chi inkrena ande e krisi ande le majbut manusha avri shudrola o kamipe. 13 De kon zhi kaj o agor avri inkrel, kodoles muntuna. 14 Thaj le krajipeski lashi vorba phenena pe intrego phuv, ke sako nipo te shunel pe leste, thaj atunchi aveltar o agor. 15 Kana apol dikhena, ke o pustisardo zhungalimata, pa soste o Daniel profeta vorbilas, po sunto than tordyola (kon ginavel les, godyaver trubul t’avel, te hatyarel les), 16 Atunchi kodala, kon ande Judea si, te nashen ande plaja. 17 Kon pe kheresko opralutnipe si, te na zhal tele ando kher, te avri te anel variso, 18 kon pale pe mal si, tena avel palpale kothar, te ingrel peske gada! 19 Chorre le phare, haj chuchi dine romnyange ande kodol dyesa! 20 Inkren avri anda rudyimo, ke te na jivende, haj te na savatone te trubula te nashen. 21 Ke atunchi baro chorrimo avla, kasavo, sosko inke nas kathar la lumako angluni dyesa zhi akanak; nas thaj chi na chi avla majbut. 22 Ova, o Del te na skurtosarela kodole dyesen, chi muntulaspe chi jekh manush; de anda le chache, kas voj avri vazde, majskurto kerela kodole dyesen. 23 Atunchi, te varikon kodo phenela tumenge: »Dikhen! Kathej o Kristush«, vaj »Kothej«, te na patyan kodo. 24 Ke xoxamne Kristushura, haj xoxamne profeti avena, kon bare somnura, haj chudimata kerena, ke te shaj, inke vi kodolen zumaven rigate te ingren, kon avri si vazdime. 25 Angle phendom tumenge, te len sama. 26 Te apol kodo te phenena tumenge, ke »ande pusta si«, na zhan avri, vaj »ande andralutni soba si«, te na patyan. 27 Sar e jag anda cheri, kasavo avla vi le Manushesko Shavesko vrama, kana kathe avla. Kathar le chacho rig, zhi kaj le stungo rig dichol po cheri. 28 Kaj o mulo si, vi le chirikja kothe aven kethane. 29 Sigo pala kadale dyesengo kikidyipe o kham tunyariko avla, thaj vi o shonitiko, le cherhaja tele perena pa cheri, haj mishkinape le chereske zora. 30 Atunchi dichola po cheri le Manushesko Shavesko somno, haj la phuvako sakono nipura pesko kojin marena, haj dikhena le Manushesko Shaves, sar avelatar pe chereske felhovura, bari zorasa, haj barimasa. 31 Thaj bishalela peske andyalon bare bashajimatasa, haj kodola kethane kidena kodolen, kas leske vazdine avri pa le lumake shtar riga, kathar le chereski jekh rig, zhi kaj e kaver. 32 Te hatyaren e pelda pa le figenge kasht: kana aba avela leski kovle krangi, haj leske patra avri puterdyiline, zhanen, ke pashe si o milaj. 33 Kade vi tume, kana sa kadal dikhena, zhanen, ke voj pashe si, aba ando vudar. 34 Chaches phenav tumenge, chi nacholtar kado generaciovo, zhi kaj kadal sa chi pecinape. 35 O cheri thaj e phuv nachonatar, de muri vorbi chi nachonatar. 36 Khonyik chi zhanel kodo dyes, haj kodo chaso, inke chi le chereske andyala, chi o Shavo, feri o Dad. 37 Ke soske le Noeske dyesa sas, kasavo avla vi atunchi, kana le Manushesko Shavo kathe avla. 38 Ke soske sas le dyesa angla o shordyimasko paji - le manusha xanas thaj penas, colaxarenas thaj romeste zhanas, zhi kaj kodo dyes, kana o Noe andre gelas ande barka, 39 thaj khanchi chi line sama, zhi kaj chi avilastar o shordyimasko paji, thaj chi mudardas savorazhenen -, kasavo avla vi atunchi, kana kathe avla le Manushesko Shavo. 40 Atunchi duj mursha avna avri pe mal: le jekhes ingrena, le kaveres kothe mukhena. 41 Haj duj romnya avna, kon aro keren: jekha ingrena, la kavera kothe mukhena. 42 Anda kodo vi majdur len sama, ke chi zhanen, savo dyes aveltar tumaro Raj. 43 De gindin tume andre, te zhanelas kaskoj o kher, ke kana avel o chor, chi sutotar, thaj chi mukhlo te phagen andre ande lesko kher. 44 Ande kado vi tume te aven gata, ke ande kodo chaso aveltar le Manushesko Shavo, kana chi gindinen. 45 Kon si o chacho, thaj godyaver sluga, kas lesko raj shutas opral pa le majbut slugi, te den len xamasko kana trubul? 46 Baxtaloj kodo sluga, kas lesko raj ande kasavi butyi rakhel, kana aveltar. 47 Shaj patyan, ke sakofelo tela lesko vast del. 48 De e sluga te nasul si, thaj ande pesko jilo kodo phenel: »Chi avel sigo muro raj«, 49 haj lela te marel le kavera slugen, thaj kethanes xal, thaj pel le matenca, 50 Atunchi kasavo dyes avela lesko raj, pe savo chi zhukarela les, haj ande kasavo chaso, so chi zhanela, 51 thaj zuralo krisi shinela pe leste, thaj pe kodo than shudela les, kaj le charde makhle si. Kothe rovela, haj kircipe pesko dand!