Izaiash

55 Aven, sa tume, kon trushale san! Aven kaj o paji! Tume, kas naj love, aven, len thaj xan! Ova, aven, len mol thaj thud bilovengo, jive! 2 Sostar maren tele tumare love pe kasaveste, so naj manro, thaj sostar maren tele tumare love pe kodo, sosa chi avla tumenge dosta? Shunen man, thaj xan, so lashoj, thaj but lossh rakhena ande kodo, so shukar si, thaj zor del. 3 Bolden kathe tumaro kan, thaj aven mande. Shunen, thaj ashel tumaro trajo, me pale gata sim te phandav tumenca colaxarimo, so chi nachol, kade, sar so shinadem kamipesa, patyivales le Davideske. 6 Roden le Jehovas, zhi kaj shaj rakhen les. Cipinen leste, zhi kaj pasha si! 7 Te mukhel o nasul pesko drom, thaj o buzhanglo manush peske gindura! Te zhal palpale kaj o Jehova, kon sunuja les, kaj amaro Del, ke voj andar jilo jertil! 8 „Ke mure gindura, naj tumare gindura, thaj tumare droma, naj mure droma” – kado phenel o Jehova. 9 „Ke sar o cheri majuchoj sar e phuv, kade vi mure droma majuchej, sar tumare droma, thaj mure gindura, sar tumare gindura. 10 Ke sar o brishind thaj o jiv perel andar o cheri, thaj chi zhal kothe palpale. Feri pala kodo, ke pijadas e phuv, ke le zelenimata te baron, thaj fruktura te anen, ke t’avel dyiv le butyareske, thaj manro kodoleske, kon kamel te xal, 11 vi kade avla muri vorbasa, so me phenav. Chi avel palpale kaj mande shushes, de kodo kerel, so me kamav, thaj andre pherdyarela, anda soste bishadom les.