Sikadyimaski

17 O jekh mashkar le efta andyala, kaste le efta kucha sas, kothe avilas, thaj kodo phendas mange: „Av, sikavav tuke, sar keren krisi pe e bari lubnyi, kon pe bute paja beshel, 2 kasa zhungale sexualisha butya kerde la phuvake kraja, la phuvake manusha pale matyile kathar laki zhungale sexualisha butyaki mol.” 3 Apol e duxoske zorasa ingerdasma ande pusta, kothe dikhlem jekh romnyi, kon besheles pe jekh lolo vadno allato, so pherdo sas le bidevleske anavenca, haj kas efta shero, haj desh shinga sas. 4 E romnyi ando lolo sas uradi, haj pe late but somnakaj, kuchikane barra haj bisora sas, ande pesko vast somnakuno pohari inkrelas, savo pherdo sas zhungalipesa, haj lake sexualisha biuzhipenca. 5 Pe lako chikat jekh garado anav sas iskirime: „Baro Babilono, la lubnyangi thaj la phuvaki zhungalimatongi dej.” 6 Haj dikhlem, ke e romnyi matij kathar le suntongo rat, thaj kathar kodolengo rat, kon vorbin pa o Jezush. Kana dikhlemla, bares chudisajlem. 7 Apol o andyali kado phendas mange: „Sostar chudistu? Phenav tuke pa romnyi jekh garadi vorba, thaj pa vadno allato, kon la ingrel, kas efta shero si, haj desh shinga: 8 O vadno allato, kas dikhlan, sas, thaj naj, thaj vi atunchi opre kamel t’avel anda telalutnipe, thaj karing o meripe zhal. La phuvake manusha, kaske anava kathar la lumako kerdyipe naj ande iskirime ande le trajoski hertija, chudinape kana dikhena, ke o vadno allato sas, thaj naj, thaj vi atunchi kothe avla. 9 Anda kado trubuj o godyaveripo, thaj o hatyaripo: O efta shero efta plaja si, haj e romnyi pe kadala beshel. 10 Haj efta kraj si: Panzh pelastar, jekh si, o kaver inke chi avilas. Kana avlatar, feri cerra vrama ashola. 11 O vadno allato so sas, thaj naj, vi voj kraj si, o oxtoto, de anda efta avel, thaj karing o meripe zhal. 16 Le desh shinga pale, so diklan, thaj o vadno allato, kodola zurales xojajvena pe lubnyi, thaj chorena la, thaj tele nandyarena la, xana lake mas, thaj phabarena la ande jag. 17 Ke o Del das ande lengo jilo, te keren leske gindura, ova, te keren penge gindura kade, ke lengo krajipe le vadne allatoske te den, zhi kaj chi pherdyon andre le Devleske vorbi. 18 E romnyi, kas dikhlan, kodo o baro foro sikavel, so krajilpe pe phuvake kraja”.