Aposhtola

2 Kana pale avilas la rusajako dyes, savore zhene kethane sas pe jekh than. 2 jekhvarsa kasavo hango shundyolas andar o cheri, sar e bari balval, so andre pherdyardas le intregone kheres, kaj beshenas. 3 Pala kodo kasave jaga dikhle angla pende, sar le shiba, uladyile, thaj pe sakonesko shero beshenas. 4 Savore zhene pherdyile sunto duxosa, thaj pe kavera shiba line te vorbin, kade, sar o duxo das lenge, te vorbinen. 5 Ande kodi vrama, andar sako nipo, so feri tela cheri si, sas bibolde ando Jeruzhalemo, kon daran le Devles. 6 Kana pale shundyolas kado hango, but manusha avile kethane, thaj chudinaspe, ke sakon pe pengi shib shunenas lenge vorbi. 7 Ova, zurales chudinaspe, thaj kado phende: „Dikhen aba, ke na sa anda Galilea si kadala, kon vorbin? 8 Atunchi sar si kodo, ke savorazhene pe amari shib shunas? 9 Partusha, medura, elamiti, thaj ame, kon ande Mezopotamia beshas, thaj ande Judea, thaj ande Kappadocia, ando Pontuso thaj ande Azhia, 10 ande Frigia thaj ande Pamfilia, ando Edyiptomo, thaj ande la Libiake kotora so pasha Cirene si, thaj kon anda Roma avilam, thaj kathe sam, bibolde thaj prozeliti, 11 kretake thaj arabura – pe amari shib shunas len, ke vorbin pe le Devleske bare butya.” 12 Ova, savorazhene chudinaspe, thaj chi zhanenas so te gindin, thaj kado phenenas jekhavreske: „So si kado?” 13 De kavera prassande len, thaj kado phenenas: „Matej kathar e gugli mol!” 14 Atunchi o Peter, kon le deshujekhenca kothe tordyolas, oprevazdas peski vorba, haj las te vorbil karing lende: „Judeake mursha, haj sakon, kon ande le Jeruzhalemo beshen! Te zhanen kado, haj ashunen muri vorbi! 15 Naj le mate kadale manusha, sar tume gindisaren, ke le dyeseske inke feri lesko trito chaso si. 16 Feri kodo pecisajlas, so o Joel profeta angla phendas: 17 »’Haj ande le palune dyesa – kado phenel o Del –, avri mukhav muro duxo pe sakofelo manush, haj tumare shave, haj sheja profetalina, tumare terne sikadyimata dikhena, haj tumare phure dikhena sune. 18 Inke, pe mure slugi, vi pe mursha, haj vi pe zhuvja slugi, avri mukhav muro duxo ande kodala dyesa, haj profetalina. 19 Chudimata kerav opre po cheri, haj somnura tele pe phuv, rat, jag, haj thuvjimata. 20 O kham tunyariko avla, o shonitiko pale rateske kerdyola, majanglal, sar avelatar le Jehovasko baro, haj patyivalo dyes. 21 Haj sakono, kon akharel le Jehovasko anav, te zhutil, kodoles muntuna.’« 22 Izraeliti mursha, shunen kadal vorbi: o nazareticko Jezush kasavo manush sas, kas o Del bishaldas. Kado uzhes sikadas, ke o Del perdal o Jezush bare butya, thaj chudimata kerdas, sar vi tume zhanen. 29 Murshale, phralale! Mukhen te phenav tumenge jilesa pa o David, kon amari niposko baro shero sas! Voj mulas, haj vi praxosardine les, haj leski gropa mashkar amende si zhi adyes. 30 Sar voj profeta sas, haj zhanelas, ke o Del colaxasa phendas leske, ke jekh anda leske shavora beshela pe lesko krajesko skamin, 31 anda kodo voj anglal dikhelas pa Kristosko opre ushtyimo, thaj vorbilas pe kodo, ke chi ande gropa chi mukhlela, haj chi lesko mas chi rumusarela. 32 Kadale Jezushes o Del opre ushtyardas, thaj ame kado savorazhene dikhlam. 33 Kade, ke opre vazde les pasha Devleski chachi rig, thaj dine les o shinado sunto duxo, kathar o Dad, avri shordas kodo, sar so dikhen thaj shunen. 34 O David chi gelas opre ando cheri, de voj phenel: »Kade das duma o Jehova, kaj muro Raj: ’Besh pe muri chachi rig, 35 zhi kaj tye xojarden tela tyiro punro chi shuvav.’« 36 Anda kado le Izraelesko intrego nipo te zhanel chachimasa, ke o Del Rajeske haj Kristusheske shutas les, kodole Jezushes, kas tume po kasht cirdine!” 37 Sa, so ashunde, reslas lengo jilo, thaj kade dine duma kaj o Peter haj kaj le majbut aposhtolura: „So te keras, murshale, phralale?” 38 O Peter kodo phendas lenge: „Bunun tumare bezexa, thaj te bolardyol savorazhene mashkar tumende ando Jezush Kristushesko anav, ke jertinen tumare bezexa, thaj atunchi tume lena o sunto duxo. 42 Thaj von vi majdur sityonas kathar le aposhtola, kethane avenas te rudyin, thaj te xan. 43 Thaj kathar kado dyes sakon zurales darajle, kon dikhle le but chudimata haj somnura, so le aposhtolura kerdine. 44 Thaj kodola, kon patyamneske kerdyine, kethane sasle, haj sako butya, so sasle, ulavenas jekhavresa. 45 Bikindine penge phuva thaj barvalimata, haj lengi ahor uladine, sakoneske kattyi, sode trubundas les. 46 Sako dyes jekhe jilesa sasle kothe ande khangeri. Ande lengo kher kethane xanas, haj losshasa, haj uzhe jilesa uladine jekhaverasa pengo xamasko, 47 thaj ashardine le Devles. Thaj o intrego nipo lashe jilesa dikhenas len. O Jehova pale, zhutindas len te baron, thaj kodola, kon muntunde, sako dyes mujbutzhene sas.