1Timoteus

3 Kadi vorba chachij: Varikon te kamel phuro t’avel, lashi butyi kamel peske. 2 Kade o phuro t’avel patyivalo, kas jekh romnyi si, te phiravel pe mishto, te gindilpe mishto, te trajil shukares, te akharel kaveren kaj pesko kher, te zhanel te sityarel, 3 te na avel matyakerno, te na marelpe, feder kovlo jilesko t’avel, te na avel kecitori, thaj te na kamel le love. 4 Kasavo t’avel, kon mishto tradel peska familija, thaj kaske shavora mukhenpe thaj mishto phiravenpe. 5 (Kana varikon chi zhanel te tradel peska familija, atunchi sar zhanela te grizhil pe le Devleski khangeri?) 6 Te na avel kasavo, kon na dulmut kerdyilas kristiano, te na kerdyol phutyardo, thaj te na shinen pe leste kasavi krisi, sar po Beng. 7 Pala kado vi kodol mishto te vorbin pe leste, kon naj ando chachimo, te na resel les lazhavo, thaj na xutyilel les o Beng. 8 Vi le zhutori slugi te aven godyavera, te na aven chardemakhle, te na pen but mol, te na zhan opre pe love, 9 thaj te tordyon zurales ando patyamo, so jekh sunto garadoj, te len sama po uzho jilo. 10 Pala kado anglunes te zumaven len avri, te dikhen, ke lashej pe kadi butyi, thaj feri pala kado t’aven zhutora slugi, kana chi phenen pe lende khanchi nasul. 11 Vi le zhuvja t’aven godyavera, te na xoxaven pe kaverende, mishto te phiravenpe, t’aven patyivale ande sakofelo. 12 Le zhutori slugen jekh romnyi t’avel, thaj mishto te traden penga familija thaj penge shavoren. 13 Ke kon mishto keren pengo slugimo, zurali patyiv avla len, thaj uzhes shaj vorbin pa pengo patyamo ando Kristush Jezush.