Aposhtola

24 De chi inkrav kucheske muro trajo, feri kodi butyi si mange kuch, thaj kodo slugipo, so o Raj, o Jezush das mange. Zurales te vorbinav pasha e lashi vorba, so jive del o Del, anda pesko dragimo. 25 Haj akanak zhanav, ke mashkar tumende khonyik chi dikhela man, kaske vorbindom pa o krajipo. 26 Anda kado pe kado dyes opre mangav tume, te tordyon pasha ma, ande kodo, ke kathar sakonesko rat uzho sim, 27 ke chi inkrerdem man palpale kathar kodo, te phenav avri tumenge sakofelo, so kamel te kerel o Del. 28 Len sama pe tumende, haj po intrego kethanipe, pe saveste o sunto duxo phurenge shutas tumen, ke te lasharen le Devleski khangeri, so perdal peske Shaveske ratesa kindas. 29 Zhanav, ke pala soste zhavtar, kasave manusha avena mashkar tumende, sar e ruv, haj chi grizhina dragimasa le bakrenca. 30 Haj vi mashkar tumende avna mursha, kon boldine vorbi phenena, ke pala pende te cirden le sityarden. 31 Len sama anda kado, haj chi bistren kodo, ke tala trin bersh ratyi thaj dyese le asvenca sityaros tumen. 32 Akanak pale perdal dav tumen le Devleske, haj pe kado lashi vorba, so lesko dragimo sikavel, so chi phirel amen. Kado zhanel te zurarel tumen, thaj te del tumen, so tumaroj mashkar le intrega suntosardine. 33 Haj me chi kamlom khanyikasko rupo, somnakaj, vaj gada. 34 Vi tumen zhanen, ke kadala vasta kerdine butyi anda kodo, so trubusardas man, haj kodalen, kon manca si. 35 Ando sakofelo sikadem tumenge, sar te keren zurali butyi pe kodo, te zhutinen le kovlen, thaj te avel ande tumare godyi, so o Jezush phendas: »Majbari lossh si kana tu des, sar kana tut den.«” 36 Pala soste kadala phendas, changa das savorazhenenca, haj kethane lenca rudyindas. 37 Kodala pale savorazhene zurales rovenas, ande leski kor boldine, haj chumidine les, 38 ke kodo vorba dukhajlas lenge majfeder, ke chi dikhena aba majbut les. Pala kado lesa geline kaj o hajovo.