1Janosh
5 Sakon, kon patyal ke o Jezush si o Kristush, kathar o Del kerdyilas. Thaj sakon, kon kamel le dades, vi leske shaves kamel. 2 Anda kado zhanas, ke kamas le Devleske shavoren, te kamas le Devles, thaj te inkras leski vorba. 3 Ke te kamas le Devles, andre inkras leski vorba. Haj leski vorbi naj phare. 4 Ke sa, kon kerdyilas kathar o Del, tele marel e luma. Thaj amare patyamesa tele mardam la luma. 5 Kon zhanel tele te marel e luma? Feri kodo, kon patyal, ke o Jezush si le Devlesko Shavo. 6 Voj si kodo, kon avilas le pajesa, haj le ratesa, o Jezush Kristush. De na feri pajesa, feder vi pajesa, haj vi ratesa. Thaj o duxo pasha leste tordyol, ke o duxo chacho si. 7 Ke trin si, so pasha o chachipo tordyon, 8 o duxo, haj o paji, haj o rat, haj kadala trin, sa jekh phenen. 9 Ame las le manushengi vorbi, de le Devleski vorba majbaro si. Haj o Del, peska chachi vorbasa pasha pesko Shavo tordyol. 10 Kon patyal anda le Devlesko Shavo, anda lesko jilo le Devlesko chachi vorba si. De kodo, kon chi patyal ando Del, xoxamneske shutas les, ke chi patyandas ande kodo chachipo, so o Del phendas, pa pesko Shavo. 11 Haj kado chachi vorba si, ke o Del kasavo trajo das amen, so chi nacholtar, haj kado trajo ande lesko Shavo si. 12 Kon kethane si le Shavesa, kodo shaj zhukarel pe kado trajo, de kon naj kethane le Devleske Shavesa, kodo nashtig te zhukarel pe kado trajo. 13 Anda kado iskirisarav tumenge kadala, te zhanen, ke si tumen trajo, so chi nacholtar, tumenge, kon patyan anda le Devlesko Shavesko anav. 14 Thaj patyas ande leste, kana mangas lestar variso, ande soste voja rakhel, atunchi voj shunel amen. 15 Haj te zhanas, ke voj ashunel amen, kana mangas variso kathar leste, atunchi vi kado zhanas, ke xutyilas kado, ke manglam lestar. 16 Te varikon dikhel peske phrales, ke kerel kasavo bezex, anda soste chi phirel meripo, atunchi te rudyil anda leste, haj o Del, trajo dela les, ova, kodolenge, kon chi keren kasave bezex, anda soste meripo phirel. De si kasavo bezex, anda soste meripo phirel. Te kerel varikon kasavo bezex, me chi mangav te rudyil anda leste. 17 Sako bichachipe bezex si, de si kasavo bezex, anda soste chi phirel meripo. 18 Ame zhanas, kon kathar o Del kerdyilas, chi kerel bezex pale, haj pale, haj kodo, kon kathar o Del kerdyilas, sama lel pe leste, anda kado o nasul chi zhanel te marel les. 19 Zhanas, ke kathar o Del sam, de e intrego luma ande le bengesko vast si. 20 Apol ame zhanas, ke avilas le Devlesko Shavo, haj godyaverimo das amen, te pinzharas kodoles, kon chachoj. Haj amen kethane sam kodolesa, kon chachoj, perdal pe lesko Shavo, pa o Jezush Kristush. Kado o chacho Del, haj kathar leste avel o biagoresko trajo. 21 Mure shavora, inkren tumen dur kathar le xoxamne dela!