Mate

5 Kana dikhlas le but manushen, opre gelas po plaj. Tele beshlas, thaj leske sityarde kothe geline leste. 2 Apol o Jezush sityardas len, thaj kado phendas: 3 Baxtalej kodola, kon hatyaren ke pashal trubul te zhan karing o Del, ke lengoj le cheresko krajipe. 4 Baxtalej kodola, kon roven, ke lengo jilo zor lena. 5 Baxtalej kodola, kasko jilo pachakoj, ke lengi avla e phuv. 6 Baxtalej kodola, kon bokhajven thaj trushajven po chachipe, ke o Del dela kado lenge, thaj dostarde avna. 7 Baxtalej kodola, kasko jilo lasho si, ke vi von lasho zhutimo lena. 8 Baxtalej kodola, kasko jilo uzho si, ke dikhena le Devles. 9 Baxtalej le pachake manusha, ke le Devleske shavenge akharna len. 10 Baxtalej kodola, kas nashaven anda o chachipe, ke lengoj le cheresko krajipe. 11 Baxtale san le, kana anda mande armaja den tumen, thaj nashaven tumen, thaj xoxamnes sakofelo nasulipo phenen pe tumende. 12 T’aven baxtale, thaj zureles losshan, ke baro avla tumaro potyinipo ando cheri, ke dulmut vi le profeton kade nashadenas. 13 Tume sanle la lumako lon. Te o lon xasarel pesko londyipe, sar den palpale kodo? Aba atunchi naj lasho pe khancheste, feri pe kodo, avri te shuden les, ke le manusha pe leste te phiren. 14 Tume san la lumako kham. Nashtig garaven o foro so pe o plaj si. 15 Le manusha, kana lampa phabaren, na tela e balaji shuven la, te phabarel kodolenge, kon ando kher si. 16 Vi kade mukhen te dikhen tumaro kham le manusha, te dikhen tumare lashe butya, thaj te asharen tumare Dades ando cheri. 17 Na gindin, ke anda kodo avilom te nacharav e kris haj le profeton. Na anda kado avilom, te nacharav, feder anda kodo, andre te pherdyarav len. 18 Patyan mange, ke o cheri, thaj e phuv majanglal nacholatar, sar te na pherdyola andre inke le majcino kotor ande kris. 19 Kodo, kon chi inkrel jekh vorba mashkar le majcino kris, haj vi kaverenge kado sityarel, kodo chi avla dosta lasho pe le cheresko krajipo. De kodo, kon andre inkrela, haj vi sityarel kodo krisi, kodo lasho avla pe le cheresko krajipo. 20 Ke phenav tumenge, ke te na sanle majchache kathar le iskiritora, thaj kathar le farizeushura, atunchi chi zhana andre ande le cheresko krajipo. 21 Ashunde, ke phende le dulmutanenge: »Na mudar! De kon mudarel, kodoles angla e kris tordyarena.« 22 De me kodo phenav tumenge, ke sakon, kon chi mukhel peski xoji, thaj chi jertil peske phraleske, kodo angla e kris trubul te tordyol. Thaj te varikon peske phrales prassal, kodo angla o majbaro kris trubul te tordyol. Thaj ke varikon kodo phenel: »Tu chalado, dilo!«, atunchi lesko than ande le Gehennaki jag si. 23 Kana angla oltari ingres tyo davipo, thaj kothe seros pe kodo, ke tyire prhales si variso dukh karing tute, 24 mukh kothe tyo davipo angla o oltari, thaj majanglal zha, thaj ker pacha tye phralesa, thaj apol av palpale, thaj shu po oltaro tyo davipo. 25 Av gata, sigo te keres pacha kodolesa, kon angla e kris kamel te ingrel tut, de zhikaj po drom lesa zhas pe e kris, le sama, te na del tut perdal e krisareske, voj pale le krisake slugeske, haj kade ande temlica peresa. 26 O chachipo phenav tuke, ke nashtig avesa avri kothar, zhikaj sa chi potyinesa palpale. 27 Ashunde, ke kado phendine: »Na phag colax!« 28 De me kodo phenav tumenge, ke sakon, kon butaig kade dikhel pe romnyi, ke jag te phabardyol ande leste, aba colax phaglas lasa ande pesko jilo. 29 Kana tyi chachi jakh ingrel tut ande bezex, shinla avri, thaj shudela. Majmishto te tyi jakh xasajvel, sar tyo intrego teshto ande le Gehenna te shuden. 30 Vi kade, kana tyo chacho vast ingrel tut ande bezex, shinles tele, thaj shude les. Ke majfeder te xasajves tyo vast, sar tyiro intrego teshto ande le Gehenna te resel. 31 Vi kadi phende: »Kon bishavel peska romnya, te de la mukhlimasko lil.« 32 Me apol kodo phenav tumenge, kon mukhel peska romnya, de e romnyi chi kerdas zhungale sexualisha butya, atunchi avri shol peska romnya kodolake, te phagel e colax, thaj kon kasavi zhuvja lel romnyake, kas lako rom mukhlas, kodo phagel e colax. 33 Vi kodo ashunde, ke kodo phende le dulmutanenge: »Na colaxar xoxamnes, feder inker tyiro colaxarimo le Jehovaske.« 34 Me pale kodo phenav tumenge, chi sar na colaxaren. Chi po cheri, ke kodo le Devlesko trono si, 35 chi pe phuv, ke kodo leske punresko skamin si, chi po Jeruzhalemo, ke kodo le bare krajesko foroj. 36 Chi pe tyo trajo na colaxar, ke chi jekh bal chi zhanes parneske, vaj kaleske te keres. 37 T’avel tumari ova, ova, thaj tumari na, na. Ke so pe kadal opral si, kathar o nasul si. 38 Ashunde, ke kodo phende: »Jakh anda jakh, haj dand anda dand«. 39 De me kodo phenav tumenge, na xan tumen, kodolesa, kon nasul si, feder, kon malavel tut pe jekh rig, bolde kothe leske vi o kaver rig. 40 Ke varikon ande krisate kamel te xutyilel tut, ke te lel tutar tye gada, de kothe vi e majbut, so pe tute si. 41 Haj te varikon pe jekh lungo drom kamel te ingrel tut zorasa, atunchi zha lesa duvar kattyi drom. 42 Kon mangel tutar, kodales de, haj na bolde tut kathar kodo, kon unzhule kamel te mangel tutar. 43 Ashundine, ke phendine: »Kam le manushen, de gracon len, kon xojajven pe tute.« 44 Me apol kodo phenav tumenge, ke te kamen, kon xojajven pe tumende, thaj rudyinen anda kodola, kon nashaven tumen. 45 ke shave te aven tumare cheresko Dadeske, ke voj opre anel o kham vi pe nasula, haj vi pe lashe, haj brishind del vi le chacheske haj vi le nasuleske. 46 Ke kana feri kodolen kamen, kon vi tumen kamen, so avla tumaro potyinipe? Na kade keren vi kodola, kon le themeske kiden love? 47 Thaj kana feri tumare phralen den dyes, so baro keren? Na kade keren vi kodola, kon anda le nipura si? 48 Anda kado t’aven bidoshale, sar vi tumaro cheresko Dad bidoshalo.