Filippi

5 Sako manush pe kodo te pinzharel tume, ke kovle jileske san. O Raj pashe si. 6 Na daran khanchestar, ke so avla, feri mindig te phenen le Devleske so kamen, kade, ke rudyinen thaj zurales mangen lestar, thaj vi najisaren leske. 7 Kade le Devleski pacha, so majbaro si sar sako gindimo, sama lela pe tumaro jilo, thaj pe tumari godyi, ando Kristush Jezush. 8 Po agor, phralale, so feri chachoj, so sama trubul te las, so feri chachikanej, so feri uzhej, so feri kamimoj, pa soste feri lasho phenen, so feri patyivaloj, thaj so feri asharen, vi majdur kodola te keren. 9 Kodo keren, so sityile, thaj vi patyajle, shunde, thaj vi dikhle mandar, thaj la pachako Del tumenca avla. 10 Losshav, sar e Rajesko sluga, ke pale grizhin p’amande. Chaches vi dulmut grizhisarde, feri chi zhangle avri te sikaven. 11 Na anda kodo te phenav kado, ke trubul man variso, ke sityilem, ke dosta t’avel mange kodo, so si man. 12 Zhanav, soskoj, kana cerra si le manushes, thaj soskoj kodo, kana but sakofelo si les. Sityilem kodo, sar t’avel mange dosta sakofelo, ande sako vrama, vi kana chajilo sim, vi kana bokhalo sim, vi kana si man sakofelo, vi kana cerra si man. 13 Pe sakofelo sima zor, thaj najisarav kodoleske, kon zor del man. 14 Mistho kerde, kana zhutisardema ande muro choripe. 15 Vi tume zhanen Filippicka, ke kana anglunes ashunde pa e lashi vorba, kana gelemtar anda Makedonia, chi jekh khangeri chi zhutindas man, vaj chi mukhle te zhutij lenge, feri tume korkori. 16 Ke tume bishalde mange so trubujasma, na feri jokhar, feder vi duvar, kana ande Tessalonika simas. 17 Na davipe zhukaros tumendar, feri kodo kamos, lasho te keren, anda soste maj lasho avla tumenge. 18 So kathar o Epafroditus bishalde mange, sakofalo sima, so trubul, inke vi majbut. Kado, sar e lashi sung, kamloj angla Del. 19 Apol muro Del, kaske patyivalo barvalimo si les, perdal pa Kristush Jezush, sakofelo dela tume, so trubul tumen. 20 Amare Devleske, thaj Dadeske t’avel o barimo, thaj patyivalimo biagores! Amen. 21 Phen le but suntonge, kon le Kristush Jezushesa phiren, ke kamipesa gindinav pe lende, thaj vi kodola phrala, kon manca si. 22 Zor, thaj sastyimo bishaven tumenge le suntura sa, majfeder kodola, kon anda le Chasaresko kher si. 23 O Raj, Jezush Kristushesko kamipo, thaj dragimo t’avel tumenca, anda soste mistho keren tumare butya!