1Peter
3 Vi kade vi tume, romnyale, bandyon angla tumare roma, te si kasave, kon na bandyon la vorbake, len, penga romnyako trajo, bivorbako te tordyarel pasha pengi romnyi, 2 pala soste dikhle tumaro uzho, thaj patyivalo trajo. 3 Tumaro shukarimo na anda kado te sikadyol, ke sar keren tumare bala, thaj anda somnakaj, thaj anda kuch gada te phiren, 4 feder anda kado te sikadyol tumaro shukarimo, so anda tumaro jilo si garudo, so chi romusarel, kado o kovlo, thaj o pachako jilo. Thaj kado igen kuch si ande Devleske jakha. 5 Vi dulmut kade kerde pen shukarenge le suntone romnya, kon zhukarenas, thaj patyanas ando Del, thaj von mukhlen pen penge romenge, 6 sar e Sara mukhelaspe le Abrahameske, thaj peske rajeske phendas les. Apol tumen lake shavora kerdyile, ke vi majdur lashimo kerena, thaj te na daran khanchestar. 7 Vi kade, tume roma, vi pala kado kade trajin lenca, sar sityile. Patyivin len sar majkovlen – le zhuvjan -, ke lenca kethane avla tumaro o trajo, te na tordyol angla tumaro rudyimo khanchi. 8 Po agor pale, t’aven savorazhene pe jekh gindo, te hatyaren jekhkaveres, lashe jileske, tele bandyarde, thaj sikaven le phralengo kamipo. 9 Te na potyinen palpale o nasulimo nasulimasa, haj chi o kushlimo kushlimasa, feder aldimo te phenen, ke pe kodo akhardiline tumen, ke kade vi tumen aldashi te xutyilen. 10 Ke „kon lossh kamel te rakhel ando trajo, haj baxtales kamel te trajil, te inkrel palpale peski shib, haj peske mujesa te na xoxavel khanyikaske. 11 Te boldelpe kathar o nasul, thaj te kerel lasho. Te rodel e pacha, haj te kerel kodo. 12 Ke le Jehovaske jakha pe chache si, thaj lesko kan shunel lenge pharo rudyimo, de o Jehova na dikhel pe kodola, kon nasul keren.” 13 Chaches, kon shaj azbal tumen, ke jilesa te keren o lashimo? 14 De inke dukha trajinen perdal anda o chachipe, losshake sanle. Na daran kathar kodo, kathar le manusha daran, thaj tumaro jilo te na avel bipachako. 15 Feder len sama anda tumaro jilo kodo, ke o Kristush o Raj, thaj voj sunto. T’aven gata pe kodo, ke vorba te zhanen te den sakoneske, kon pa kodo pushen, tume sostar zhukaren shukara dyesa. De pachasa, thaj patyivales den palpale vorba lenge. 16 Sar kon pala o Kristush zhan, te inkren uzhes tumaro jilo, haj keren, so lashoj. Ke kana xoxamne vorbi phenen pe tumende, te lazhardyon kodola, kon pe tumende vorbin. 17 Ke majmishtoj, ke anda kodo te trajinen perdal dukh, ke lashimo keren, – kana o Del mukhel kodo – sar anda kodo, ke nasul te keren. 18 Vi o Kristush jekhar mulas anda bezexa, thaj kado pe sako vrama dostaj, jekh chacho manush anda le bichache, kaj o Del te ingrel tume. Ande maseste mudarde les, de ando duxo ushtyilas opre. 20 Kadala varikana chi patyande muj, kana o Del zhukarelas ande Noeske dyesa, zhi kaj kerdyilas e barka, ande soste cerra manusha, oxto zhene gele perdal pachasa po paji. 21 O bolipe, so akanak tumen muntul (so na le teshtosko thovipo, feder kodo, ke uzho jilo mangen kathar o Del) perdal pa le Jezush Kristushesko opre ushtyipe. 22 Voj pe le Devleski chachi rig si, ke anda o cheri gelas, haj tala pesko rajipe las le andyalon, haj le baren, haj le zora.