Mate

15 Atunchi le farizeushura gelinetar, haj avri gindisarde, ke sar shaj cirdel les angla e kris anda leski vorba. 16 Bishalde leste penge sityarden, vi kodolen, kon pasha o Herodesh sas, te phenen kodo: „Sityardo, zhanas, ke chachimo phenes, thaj o chachimo sityares pa kodo, so kamel o Del, thaj chi dikhes kodo, sar dikhen avri le manusha. 17 Phen avri amenge: So gindis, slobodoj te potyinas le chasaroske, vaj na?” 18 De o Jezush zhanglas lengo nasulipe, anda kado, kado phendas: „Sostar zumaven man, tume charde makle? 19 Sikaven mange kodo love, sosa potyinen le themeske, so trubul.” Kothe andine leske jekh denaro. 20 Haj pushlas lendar: „Kasko muj haj iskiripe si pe leste?” 21 Kado phende leske: „Le chasareskoj.” Atunchi o Jezush kado phendas: „Potyinen palpale le chasareske, so le chasareskoj, haj le Devleske, so le Devleskoj.” 22 Kana kado shunde, zurales chudinaspe, thaj kothe mukhline les. 36 „Sityardo, savo si o majbaro vorba ande Krisi?” 37 Voj kodo phendas leske: „»Te kames le Jehovas, tyire Devles tyire intrego jilesa, intrego duxosa, thaj intrego godyasa.« 38 Kado si o majbaro, thaj e angluni vorba. 39 O dujto pale: »Te kames le manushen, sar tut.« 40 Pe kadala duj vorbi tordyol e intrego Krisi, thaj le Profeti.” 41 Kana le farizeusha kothe sas, O Jezush pushlas lendar: 42 „So gindinen pal o Kristush? Kasko shavo si?” Kado phende leske: „Le Davidesko.” 43 Pe kado pushlas lendar: „Atunchi sar si, ke o David tela sunto duxo peske Rajaske akharel les, thaj kado phenel: 44 »Kado phendas o Jehova mure Rajeske: ’Besh pe muri chachi rig, zhi kaj tye xojarden tela tye punre shav.’« 45 Kana o David peske Rajeske akharel les, sar shaj avel lesko shavo?” 46 Pe kadi khonyik chi zhanglas te phenel leske khanchi, haj kathar kodo dyes khonyik chi tromalas te pushel les.