Lukach

10 Pala kadi o Raj avri uladas kaver eftavardesh, thaj angla peste bishaldas len dujto penca, ando sako foro, thaj than, kaj vi voj kamelas te zhal. 2 Kodo phendas lenge: „Ova, e butyi bari, de le butyara cerraj. Mangen apol le butyako Rajes, te bishalel butyaran ande leski butyi. 3 Zhan! Kade bishavav tumen, sar bakren mashkar le ruva. 4 Na ingen tumenca bufari, haj trasta, haj chi papuchi, haj po drom khanyikaske te na den dyes. 5 Te andre zhana ande jekh kher, majanglal kado phenen: »Pacha t’avel kadale khereske!« 6 Te si kothe varikon, kon kamel e pacha, pe leste hurela tumari pacha. De te naj, palpale hurela pe tumende. 7 Ashen kothe ande kodo kher, haj xan, haj pen kodo, so den tumen, ke trubul o potyinipo le butyareske. Na phiren pa jekh kher, po kaver. 8 Te andre zhan anda jekh foro, thaj von lashe jilesa dikhen tumen, xan, so angla tumende shona, 9 sastyaren kothe le nasvalen, haj phenen lenge: »Aba pashe si karing tumende le Devlesko krajipo!« 10 Te andre zhana ande jekh foro, thaj chi dikhena tumen lasho jilesa, zhan avri pe peski bulhe vuljice, thaj phenen: 11 »Te len sama pe kodo, inke vi o praxo tele maras, so anda tumaro foro si p’amare punre. De zhanen, ke aba pasha si le Devlesko krajipo.« 12 Phenav tumenge, ke la Sodomake majlasho avla kodo dyes, sar kodole foroske. 13 Chorro Korazino! Chorro Betsaida! Ke te ando Tirusi, haj ando Sidoni pelesaspe kodola chudi, so ande tumende pelepe, von aba dulmut bununaspe, haj ande goneste, haj ande praxoste beshenas. 14 Anda kado majlasho kris avla le Tiruseske, thaj le Sidoneske, sar tumenge. 15 Haj tu, Kaparnaumo! Zhi kaj o cheri vazdina opre tut? Zhi kaj e gropa peresa! 16 Kon tumen shunela, kodo vi man shunela. De kon tumen shudeltar, kodo vi man shudeltar. Thaj kodo kon shudeltar man, vi kodoles shudeltar, kon bishaldas man.” 17 Le eftavardesh sityarde losshasa avile palpale, thaj kado phende: „Raja, pe tyo anav, inke vi le demonura muj patyan amenge.” 18 Thaj voj kado phenas lenge: „Dikhlom le Benges, ke sigo, sar e jag, aba tele pelas anda cheri. 19 Dem zor tumen, pe sapa, haj pe skorpiovura te phiren, haj majbari zor dem tumen, sar kodolenge si, kon xojajven pe tumen, haj khanchi chi zhanela te azban tumende. 20 De na anda kado losshan, ke le duxura mukhenpe tumenge, feder anda kado losshan, ke tumaro anav opre si iskirime ando cheri.” 21 Ande kodo chaso, perdal pa sunto zor, bari lossh pherdyardas le Jezushes, thaj kado phandas: „Angla sakoneste asharav tut, muro Dad, le cheresko, haj la phuvako Raj, ke garadan kadal angla le godyavera, haj angla kadala, kon but sityile, de sikadan le cinenge. Ova, Dade, ke kade sas lasho angla tute. 22 Sogodi pherdal das mange muro Dad. Khonyik chi zhanel, ke kon si o Shavo, feri o Dad, haj ke kon si o Dad, feri o Shavo zhanel kodo, haj kaske o Shavo avri kamel te sikavel.” 23 Pala kado karing le sityarde boldaspe, haj numa lenge phendas: „Baxtalej kodola, kon dikhen, so tume dikhen. 24 Ke chaches phenav tumenge, but profeti, haj kraja kamle te dikhen kodo, so tume dikhen, de chi dikhle, haj te shunen kodo, so tume shunen, de chi shunde. 25 Atunchi opre tordyilas jekh krisako manush, avri te zumavel les, haj kade das duma: „Sityardo! So te kerav, te biagoresko trajo te resav?” 26 O Jezush kodo phendas leske: „So si iskirime ande e kris? Sar hatyares les?” 27 Kado phendas: „»Kam le Jehovas, tye Devles anda tyo intrego jilo, anda tyo intrego duxo, anda tyo intrego zor, haj anda tyo intrego godyi«, thaj »tye amales, kade sar tut.«” 28 O Jezush kado phendas: „Mishto vorbisardan! Vi majdur ker kado, haj trajisa.” 29 Ke o mursh, kamelas te chacharelpe, ke voj chachoj, kodo phendas le Jezusheske: „Kon si muro amal?” 30 O Jezush kado phendas: „Jekh manush kathar o Jeruzhalem ando Jeriko zhalas tele, thaj chordine les. Ande khancheste mukhleles, mardeles, geletar, thaj kothe mukhleles dopash mules. 31 Jekh rashaj gelas tele pe kodo drom, de kana dihklas les, majdur gelas pe kaver rig. 32 Vi kade jekh levita, kana kothe reslas, dikhlas les, majdur gelas pe kaver rig. 33 Jekh samariako, kon pe kodo drom phirdas, kothe reslas leste, dikhlas les, thaj sunundas les. 34 Kothe gelas leste, opre shordas pe leske phugnya, ulej thaj mol, thaj andre phanglas les. Pala kodo opre shutas les pe pesko magari, ingerdas les ande kirchima, thaj grizhindas pe leste. 35 Pe kaver dyes angle las duj denara, kothe das le kirchimareske, thaj kado phendas: »Grizhin pe leste, thaj so pa kado opral avla, potyinav les tuke, kana palpale avav.« 36 Sar dikhes, mashkar le trin, savo sas le chorro manusheske amal?” 37 Voj kade phendas: „Savo lasho sas lesa.” O Jezush pe kado, kodo phendas leske: „Zha, thaj vi tu ker kade.” 38 Kana majdur geline, andre gelas ande jekh gav. Kathe, jekh romnyi, kaske anav Marta sas, andre akhardas les ande pesko kher. 39 Sasla jekh pheny, kasko anav Maria sas. Voj kothe beshlas kaj le Rajeske punre, haj ashunelas leski vorbi, 40 e Marta pale lelas-sholas peski butyi. Jokhar angla o Jezush tordyarilas, haj kado phendas: „Raja, chi grizhis pe kodo, ke muri pheny mukhel man, haj me korkori slugij? De duma lake, te zhutil mange!” 41 De o Raj kadi phendas lake: Marta, Marta, pe butende si tut gindo, haj naj pacha anda tyo jilo. 42 Apol, feri cerra butya trubul, vaj feri jekh. E Maria o majlashi alosardas, haj kado chi xasarela.”