2Timoteus

1 O Del kamlas, te kerdyol o Pal le Jezush Kristushesko aposhtolo, kethane kodole trajosko shinaipo, so kathar kodo avel, ke varikon zhal pala o Kristush Jezushes. 2 Le Timoteusheske, o kamado shaveske: kasavo kamipo, so chi perelpe, jertipe, thaj pacha t’avel tut kathar o Del, kathar o Dad, thaj kathar o Jezush Kristush, kon amaro Raj! 3 Najisarav le Devleske, kaske sunto slugipo kerav, sar mure dulmutane dada, anda uzho jilo, ke vi dyese, vi ratyi, gindinav pa tute anda muro rudyimo. 4 Kana palpale serav pe tye asva, kamos te dikhavtu, thaj kade muro jilo pherdo avla losshasa. 5 Ke serav tyo patyamo, so naj xoxamno, thaj kodo patyamo anglunes ande tyi mami, ande Lois sas, thaj ande tyi dej, ande Eunike sas, de me zhanav, ke vi ande tute si. 6 Anda kado phenav tuke, trajar opre ande tute le Devlesko davipe, sar e jag, so kade lan, ke pe tute shutem muro vast. 7 Ke o Del na le daraimasko duxo das amenge, feder la zorako, le kamipesko thaj le godyaverimasko. 8 Na lazha te vorbistu p’amaro Raj, thaj chi man na lazha, kon xutyildo som anda leste, thaj vi tu tordyuv avri o choripe anda e lashi vorba, kade, ke mukhes, ke le Devleski zor te zhutil tut. 9 Voj muntusardas ame, thaj suntes akhardas ame, na anda kodo, so ame keras, feder anda kodo, so voj kamel, thaj kodale kamipesa, so chi phirelas. Kado kamipe aba dulmut avri sikadas karing amende, perdal pa o Jezush Kristush, 10 akanak zhanas, kon muntusardas ame, kana Jezush Kristush sikadyilas, kon khoslas o meripo, thaj anda e lashi vorba, kham shordas po trajo, thaj pe kodo, so chi zhanel te rumusarel. 11 Apol mange kadi butyi dine, te ingrav e lashi vorba, thaj te avel aposhtoli, thaj sityari. 12 Vi anda kado choripe sima, de chi lazhavma. Ke pinzharav le Devles, kaske patyav, thaj zhanav, so kaj leste mukhlem, pe kodo sama lela, zhikaj kodo dyes. 13 Vi majdur inkertu kaj e saste vorbi, so mandar ashundan, sar so avri sikaves tyo patyamo, thaj tyo kamipe, so ande kodo sikadyol, ke kethane san le Jezush Kristushesa. 14 Perdal pa o sunto duxo le sama pe kado kuch mukhlipe, so ande amende beshel. 15 Kodo zhanes, ke ande Azhia, sakono boldaspe mandar, mashkar lende o Figelus, thaj o Hermogenes. 16 Te grizhinel dragimosa o Raj po Oneziforusko familija, ke voj butivar zor andas pema, thaj kathar mure sastri chi lazhalaspe. 17 Thaj kana ande Roma sas, zurales rodelasma, thaj vi rakhlasma. 18 Te jertisarel leske o Raj, o Jehova pe kodo dyes. Ke tu mishto zhanes, ke voj ande but butya zhutindas man ando Efezushi.