Heberenge

11 O patyamo kodoj, ke zhanas ke avla kodo, so zhukaras, thaj vi kodo zhanas, ke so chi dikhas, vi kodo chachoj. 2 Ke vi dulmut fajilas le Devleske kodola manusha, kon patyanas. 3 O patyamo zhutindas te hatyaras, ke la luma, so pe jekh, vaj kaver vrama sas, kathar le Devleski vorba kerdyilas. Ke so dikhas, anda kodo kerdyile, so chi dikhas. 4 O Abel anda pesko patyamo das majkuch le Devles, sar o Kain. Ke o Del hutyildas lestar, so voj das, kado kodo sikavel, ke o Abel chachoj. Thaj inke o Abel mulas, de lesko patyamo vorbil. 5 O Enok patyalas, anda kodo ingerdas les o Del, ke meripe tena dikhel: thaj chi rakhline les, ke o Del las les. Angla kado o Del avri sikadas, ke o Enok fajil leske. 6 Bipatyamosko nashtig avel varikon pe le Devleski voja, ke kon angla leste ashel, kodoleske si te patyal, ke voj si, thaj palpale potyinel kodolenge, kon chachikanes roden les. 7 Andar patyamo darajlas o Noe le Devles, thaj kerdas e barka, te muntul peski familija, pala kodo o Del pa kasave butya vorbindas, so inke khonyik chi dikhlas. Thaj peske patyamesa krisardas e luma, thaj chachimo azhukarel, so andar o patyamo si. 8 Anda pesko patyamo o Abraham muj patyalas, kana akharde les, thaj avri gelas pe kasavo than, so leske shinade. Avri gelas, de chi pinzhardas o than, kaj so zhal. 9 Anda pesko patyamo anda cerhi beshelas, sar streno, pe kodi phuv, so leske shinade, kethane le Izhakesa, thaj le Jakobosa, ke vi von kado shinaipo xutyilde. 10 ke zhukardas le foros, savo po zuralo fundo tordyol, thaj so o Del gindil avri, thaj vi voj cirdel opre kado. 11 Anda pesko patyamo las zor e Sara, karing kodo phari te kerdyol, inke vi kade ke aba phuri sas, ke patyivaleske inkerlas kodoles, kon kado shinadas. 12 Anda kado si kodo, ke kathar jekh kasavo manush, kon pasha sas kaj o merimo, shavora rakhadyilas les, kasave but zhene, sar le chereske cherhaja, thaj sar le kishaj, so pasha o baro paji si, so chi shaj te ginavel. 13 Von savorazhene ando patyape muline, inke atunchi, ke anda lengi vrama chi pherdyardas andre, so lenge shinade, de dural dikhenas, thaj losshasa zhukarde kodolen, thaj avriphendine, ke kado phuv na lengoj, thaj feri skurto vrama beshena kothe. 14 Ke kon kade vorbin, kodola uzhes sikaven, ke von kasavo than roden penge, so lengo avla. 15 Von butivar palpale te gindisardinesas pe kodo than, so mukhle, avilosas len vrama, palpale te zhan. 16 De von ando pengo jilo po majlasho than kamen te pashadyon, so kathar o cheri kerdyol. Anda kado o Del chi lazhal len, kana sar Devleske, karing leste boldenpen te zhutil len, ke jekh foro kerdas lenge. 17 O Abraham patyalas, kana anda zumaipe sas, thaj anda kado gata sas kothe te del le Izhakes. O mursh, kon losshasa xutyildas, so o Del shinadas leske, zumadas kothe te del peske korkoro shaves, 18 kana kodo phendine leske: „Tyo shavo, kas shinade tuke, perdal pa o Izhak avela”. 19 De o Abraham kado gindindas, ke o Del vi anda le mule opre zhanel te ushtyavel le Izhakes, thaj sar jekh sikadyimo, pale xutyildas les. 20 Anda pesko patyamo aldindas o Izhak le Jakobos, thaj le Ezhauvos, thaj phendas lenge, so avla. 21 Anda pesko patyamo aldindas o Jakob, kon po meripo sas, le Jozhefesko selduj shaven, thaj pesko rovjako agor xutyildas, kana rudyindas karing o Del. 22 O Jozhef, kana pe lesko trajesko agor sas, patyamesa vorbindas pa kado, kana le Izraeliti avri avile ando Edyiptomo, thaj phendas, so te keren leske kokalenca. 23 Anda pengo patyamo, le Mozeshesko dad haj dej zhi kaj trin shona garade les, kana rakhadyilas, ke dikhline, ke voj shukar shavoro, thaj von chi daranas kathar le krajeski kris. 24 Ando patyamo phendas palpale o Mozesh, kana aba opre barilas, ke le faraovoske shejake shaveske te phenen les. 25 Feder kodo kerdas, ke le Devleske niposa kethane te azban les, sar pe jekh cini vrama mishto te hatyarelpe ando bezex, 26 ke butesa majkuch sas leske sar le Edyiptomosko barvalimo, ke sar opre makhlo zhungales te vorbin lesa, ke po potyinipe dikhelas. 27 Ando patyamo mukhlas o Edyiptomo, na anda kodo, ke darajlas kathar le krajeski xoji, ke zuralo ashilas, sar te dikhlo kodoles, kas nashtig dikhen. 28 Anda patyamo inkerdas e paska, thaj rat makhlas po vudar, ke kodo, kon mudarel, te na mudarel kodolen, kon angules rakhadyile lenge. 29 Anda pengo patyamo geline perdal po Lolo baro-paji, kade sar pe shuki phuv, de kana le Edyiptomicka kamlen perdal te zhan, nakhadas len. 30 Anda patyamo rumusardine tele le Jerikoveski zidura, pala soste efta dyes krujal phirdine kodo. 31 Anda pesko patyamo e Rahab, e lubnyi, ke pachasa xutyildas le murshen, kon chordanes geline pe phuv, chi mulas, sar kodola manusha, kon chi mukhle pen. 32 Haj inke, so te phenav? Avri zhav anda e vrama, te vorbinav pa o Gedeon, pa o Barak, pa o Samson, pa o Jefte, pa o David, haj pa o Shamuel, thaj pa e majbut profeti. 33 Von anda patyamo krajipe marde tele, kris shinende, shinaipe xutyilde, ande phandade le bari mucengo muj, 34 mudarde e jagaki zor, muntunde kathar o xanro, zurarde len, ke kovle sas le, anda maripe bare manusha kerdyile, thaj nashade le but ketanen. 35 Romnya perdal pa opre ushtyimo palpale xutyilde lenge mulen. Kaveren azbaden, ke khanchi na kamlen te xutyilde, sar parujimo anda pengo slobodimo, anda kodo, ke majlasho opre ushtyimo te resen. 36 Ova, kaverenge kodo sas lengo zumaipe, ke prassanas len, thaj marde len, ando sastro anda robija phandade len. 37 Barrenca shudenas len, anda zumaipe shude len, kethane shinde len, xanresa mudarde len, ande bakrenge thaj buznyange morcha phirde, kikidyipe, dukha trajinde perdal ando baro chorripe. 38 E luma nas dosta lasho pe lende. Ande pusti, ande plaja, thaj thana pe phuv, thaj ande gropa garadyude. 39 De o Del savorazhenen zurardas pa kodo, ke voja rakhel ande lengo patyamo, von chi dikhle, kana pherdyol andre o shinaipo, 40 ke o Del anglal dikhlas, ke amenge variso majlasho kamel te del, ke von bi amendar chi zhanen te resen o bidoshalipo.