Marko

10 Pala kodo pe la Judeake phuva gelastar, pe le Jordanoski kaver rig, thaj pale but zhene line les krujal. Thaj voj pale, sar so sityilas, sityarelas len. 2 Vi farizeusha avile, kodolesa te zumaven les, thaj pushle lestar, ke slobodoj jekhe romeske te mukhel peska romnya. 3 Kade das palpale vorba: „So phendas tumenge o Mozesh?” 4 Kodo phende: „O Mozesh mukhlas kodo, lil te iskrinas, thaj te mukhas ame.” 5 O Jezush kodo phendas lenge: „Anda kodo iskirindas kado tumenge, ke tumaro jilo kasavoj, sar o barr. 6 De anglunes, kana le manushen kerdas, »voj mursheske thaj zhuvjake kerdas len. 7 Anda kadi o mursh mukhel peske dades, thaj peska deja, 8 thaj le dujzhene jekh avena«, kade aba von aba na duj, feri jekh si. 9 So o Del kethane phanglas, chi jekh manush te na shinel les.” 10 Kana pale ando kher sas le, le sityarde pushenas lestar pa kado. 11 Voj kado phendas lenge: „Kon mukhelpe kathar peski romnyi, thaj kavera lel, colax phagel, thaj bezex kerel karing late. 12 Thaj kana jekh romnyi te mukhelpe kathar pesko rom, thaj kaver romes lel, vi voj colax phagel. 13 Atunchi le manusha shavoren ingerde leste, te unzol lende, de le sityarde pale xanaspe le manushenca. 14 Kana o Jezush dikhlas kado, xojariko kerdyilas, thaj kado phendas lenge: „Mukhen te aven mande le shavora. Na xutyilen le palpale, ke kasavengoj le Devlesko krajipo. 15 Phenav tumenge, kon na kade lel le Devlesko krajipo, sar jekh shavoro, chi sar chi zhala andre ande kodo.” 16 Thaj le shavoren ande peski angaji las, pe lende sutas pesko vast, thaj aldisardas len. 17 Kana po drom sas, kothe nashlas leste jekh manush, changa das angla leste, haj kado pushlas lestar: „Lasho Sityardo! So te kerav, te rakhav o biagoresko trajo?” 18 O Jezush kodo phendas leske: „Sostar phenes man lasheske? Khonyik naj lasho, feri o Del. 19 Pinzhares so phenel e kris: »Na mudar!«, »Na phag colax!«, »Na chor!«, »Na phen xoxaimata pe kaver manusha!«, »Khanyikas na xoxav!«, »Patyivin tye dades, haj tya deja«! 20 Kodo kado phendas leske: „Sityardo! Kadal sa andre inkerdom aba zhi kathar muro ternipe!” 21 O Jezush pe leste dikhlas, thaj anda lesko jilo kamipo hatyardas, thaj kado phendas: „Inke jekh variso trubul te keres: zha bikin sogodi, so si tut, haj de kothe le chorrenge, haj kade kuchimo avla tut ando cheri. Pala kado, av pala mande!” 22 Pe kado, kodo brigako kerdyilas, haj gelastar, ke baro barvalipe sas les. 23 Atunchi o Jezush krujal dikhlas, haj kodo phendas peske sityardenge: „Che pharo avla andre te zhan anda le Devlesko krajipo kodolenge, kas si love!” 24 Le sityarde chudinaspe pe leske vorbi. O Jezush pale duma das, haj kado phendas: „Mure shavora! Che pharoj andre te zhal ande le Devlesko krajipo! 26 Kade, von inke majfeder chudinaspe, haj kado phendas leske: „Atunchi kon shaj te muntusardyol?” 27 O Jezush vorta pe lende dikhlas, haj kado phendas: „Le manushenge nashtig shaj kodo, de le Devleske shaj, ke le Devleske sogodi shaj.” 28 O Peter kodo phendas leske: „De ame sogodi mukhlam, thaj pala tute gelam!” 29 O Jezush kodo phendas: „Phenav tumenge, ke khonyik chi mukhlas khera, phralen, phenyan, daden, dejan, shavoren, phuva andar mande, thaj andar e lashi vorba, 30 kas chi dena shelvar kattyi akanak anda kadala vrami - khera, phralen, phenyan, dejan, shavoren thaj phuva, nashajimasa kethane -, ande nyevi luma pale trajo so chi nachola. 31 Anda but anglune avna palune, thaj anda palune anglune.” 35 O Jakab thaj o Janosh, le Zebedeusheske shave, kothe gele kaj leste, thaj kado phende: „Sityari, kamasas te keres anda amende, so feri mangas tutar.” 36 Voj kado phushlas kathar lende: „So kamen, so te kerav anda tumende?” 37 Kodola kado phende: „De amenge, ke jekh mashkar amende pe tyo chacho, thaj o kaver pe tyo stungo vast te beshel ande tyo asharimasko rajipeski vrama.” 38 O Jezush kado phendas lenge: „Chi zhanen, so mangen. Avri zhanen te pen o pohari, so me avri pav, vaj zhanen te bolen, sar me bolav?” 39 Kado phende leske: „Ova, zhanas te keras.” Thaj o Jezush kado phendas lenge: „O pohari, so me avri pav, vi tume avri pena, thaj la bolimatasa, sosa me bolav man, vi tume bolardyona.” 40 De ke kon beshel pe muro chacho vast, haj pe muro stungo vast, kodo na me phenav. Kodola beshena kothe, kaske kerde kodola thana.” 45 Ke chi le Manushesko Shavo na anda kado avilas, ke leske te sluginen, feder anda kodo avilas, ke voj te slugil kaveren, thaj pesko trajo te paruvel ande butende.”