Mate

8 Kana tyo vast, vaj punro ingrel tut ande bezex, shin les, thaj shude tutar. Majmishtoj te bi vastesa, vaj bi punrosa te les o trajo, sar duje vastenca, vaj duje punrenca ande kasavi jag te shuden tut, so mindig phabol. 9 Kana tyi jakh ingrel tut ande bezex, shinla avri, thaj shudela tutar. Majmishtoj feri dopash jakhasa te les o trajo, sar kodo, ke duje jakhenca te shuden tut ande le phabalo Gehenna. 10 Len sama, na dikhen tele chi jekhes mashkar kadala shavora. Ke phenav tumenge, lenge andyala ando cheri mindig dikhen muro Dadesko muj. 12 So gindinen? Te si jekh manushes shel bakra, thaj jekh xasajvel, chi mukhel kothe le ijjavardesh thaj ijjan pe plaja, thaj chi rodel le xasardes? 13 Thaj kana rakhel les, chaches phenav majbari avla leski lossh, sar anda le ijjavardesh thaj ijja bakra, save chi xasajline. 14 Vi kade, muro cheresko Dad chi kamel kodo, ke inke jekh te xasajvel mashkar kadal cine. 15 Thaj te bezex kerel tyiro phral, korkori zha leste, thaj sikav pe leski dosh. Te shunel pe tute, atunchi palpale zhutisardan les po lasho drom. 16 De kana chi ashunel pe tute, atunchi le pasha tute inke jekh, vaj duje manushen, ke sako butyi duj vaj trin manushengi vorba te chacharel. 17 Te chi ashunel pe lende, de vorba la khangerake. Te inke chi pe khangeri chi ashunel, atunchi t’avel angla tute kasavo, sar varikon andar le nipura, vaj kon love kidel le themeske. 18 Chaches phenav tumenge, sa kodo, so pe phuv phandena, kodo aba vi ando cheri phanglo si, haj so putrena pe phuv, kodo aba vi ando cheri puterdo si. 19 Pale, chaches phenav tumenge, te dujzhene mashkar tumende pe phuv jekh te hatyaren ande kodo, ke te mangen variso baro gindo, muro cheresko Dad dela lenge kodo. 20 Ke kaj dujzhene, vaj trinzhene kethane aven anda muro anav, atunchi kothe som mashkar lende.” 21 Atunchi o Peter kothe gelas, haj kodo pushlas lestar: „Raja! Sodivar shaj bezexarel mange muro phral kade, ke trubuj te jertisarav leske? Inke 7-var?” 22 O Jezush kado phendas leske: „Phenav tuke, na 7-var, feder inke vi 77-var. 23 Anda kado le cheresko krajipo kasavoj sar jekh kraj, kon kodo kamlas, ke leske slugi te potyinen palpale leske love. 24 Kana las te kerel kodo, kothe ingerdine leste jekhes, kon 10 000 talentum trubundas palpale te potyinel leske. 25 Ke nas les anda soste te del le, lesko raj kado manglas, te biknen les, leska romnya, leske shavoren, haj sakofalo, so siles, haj kade te potyinel. 26 E sluga pe kado zhi kaj e phuv bandyilas, haj kade mangelas les: »De jekh cerra vrama mange, haj sakofalo palpale potyinav tuke.« 27 Sunusardyilas le rajes lesko sluga, bishaldas les, haj inke vi e love mukhlas leske. 28 Kado sluga apol, kana avri gelas, rodas jekh kaver sluges, kon 100 denaro trubundas palpale te potyinel leske. Xutyildas les, las te tasavel les, haj kade cipilas: »De palpale mange mure love.« 29 Kado sluga zhikaj e phuv bandyilas, haj mangelas les: »De jekh cerra vrama mange, haj palpale te potyinav tuke.« 30 De kodo chi mukhelas leske, feder ingerdas les, haj ande temlica shudas les, zhikaj palpale chi potyinel e love. 31 Kana le majbut slugi dikhle kado, zurales brigake kerdyine, thaj gele haj phende sakofelo penge rajeske, ke so pecisajlas. 32 Atunchi o raj peste akharadas les, haj kado phendas leske: »Tu nasul sluga! Me mukhlom tuke e intregi love, kana mangesas man. 33 Chi trubusardino vi tuke te perel tyo jilo po kaver sluga, sar vi me lasho somas tusa?« 34 Haj o raj ande peski xoji perdal das les ande temlica, zhikaj chi potyinel palpale e intregi love. 35 Kade kerla vi muro Dad tumenca, te anda jilo chi jertisarena tumare phraleske.”