Le Palesko tromako phral

Sittyu pal o terno shavo, kon muntusardas peske baches. Le shavesko bachi o Pal aposhtol sas. Chi zhanas le shavesko anav, de zhanas hoj tromako sas. Kames te zhanes, so kerdas? (. . .)

O Pal ande robija sas, ando Jeruzhalemo. Anda kodo phande les, ke vorbindas pal o Jezush. Sas kon kade xolyajline po Pal, hoj kamle te azban les. Kodo mangle kathar o ketaniko raj, hoj te ingren le Pales kaj le mujalesko kher. Kamle te garadyon pasha o drom, hoj kana o Pal kothe zhal, te mudaren les.

Le Palesko phral shundas pal kadi vorba. So kerdas? Gelastar ande robija, thaj le Paleske phendas, so shundas. O Pal sigo bishaldas les kaj le ketanengo raj. So gindines, pharo sas le shaveske te vorbil le ketanenege rajesa? (. . .) Kodo sas, ke le ketanenego raj baro manush sas. De o shavo tromako sas, thaj vorbisardas lesa.

Le ketanengo raj zhanglas, so te kerel. Kethane akhardas, majna 500 ketanen, te len sama pe o Pal. Pe kodi ratyi sigo bishaldas le ketanen le Palesa te zhan ande Cezarea. So gindines, muntusajlas o Pal? (. . .) Ova, le nasula manusha chi zhangle te azban les.

So shaj sityos anda kado pecipe? (. . .) Vi tu shaj aves kasavo tromako, sar le Palesko phral. Tromake trubul te avas, kana vorbisaras pal o Jehova. Vi tu tromako avesa, kana vorbis pal o Jehova? (. . .) Tromako te avesa, vi tu shaj muntusa varikas.