Sar shaj patyivinas chachikanes le Devles?

1. Feri korkoro kon zhanel te phenel amenge, sar te patyivinas le Devles?

ANDE majbut patyaimo kodo phenen, ke o chachimo sityaren pal o Del. De kado nashtig avel chacho, ke sako patyaimo kaver sityaren pa kodo, ke kon si o Del, thaj sar te patyivinas les. Kathar shaj zhanas, sar te patyivinas chachikanes le Devles? Kado feri korkoro o Jehova zhanel te phenel amenge.

2. Anda soste shaj zhanes, sar shaj patyivis chachikanes le Devles?

² O Jehova e Biblia das amenge, te shaj zhanas, sar shaj patyivinas les chachikanes. Sityuv e Biblia, thaj o Jehova zhutila tuke, te hatyares leski vorba, ke grizhil pe tute (Izaiash 48:17).

3. So kamel o Del, so te keras?

³ Si manusha, kon kade gindin, ke angla o Del sako patyaimo lashoj. De o Jezush na kado sityardas. Avri phendas: „Na sakon zhala andre ande le cheresko krajipe, kon kodo phenel mange: »Raja, Raja«, numa kodo, kon kerel so muro cheresko Dad kamel.” Trubul te zhanas, ke so kamel o Del, thaj vi kade si te keras. Kadi jekh bari vorbaj, ke o Jezush kodo phendas, ke phagen e krisi kodola, kon chi mukhenpe le Devleske (Mate 7:21–23).

4. So phendas o Jezush, so avla, te kerasa kodo, so o Del kamel?

⁴ O Jezush aba dulmut zhanglas, ke pharo avla, te kamasa te keras kodo, so o Del zhukarel. Kado phendas: „Zhan andre pe o sano vudar, ke o bulho thaj o lungo drom ando meripe ingrel, thaj butzhene zhan andre pe kodo. De sano si o vudar, thaj o drom, so pe o trajo ingrel, thaj cerra zhene rakhena les” (Mate 7:13, 14). O sano drom, kana chachikanes patyivinas le Devles, po lungo trajo ingrel. O bulho drom pale, kana na kade patyivinas le Devles, sar so trubul, po meripe ingrel. De o Jehova chi kamel, te merel varikon, ke sakoneske zhutil te pinzharel les (2Peter 3:9).

SAR SHAJ PATYIVINAS CHACHIKANES LE DEVLES?

5. Sar shaj pinzharas opre kodolen, kon chachikanes patyivin le Devles?

⁵ O Jezush opre sikadas, sar shaj pinzharas kodolen, kon chachikanes patyivin le Devles: si te dikhas, ande soste patyan, thaj so keren. Kado phendas: „Pa lenge fruktura pinzharena len opre.” Pashe shutas: „sako lasho kasht lasho frukto anel” (Mate 7:16, 17). Anda kado te na hatyaras kodo, ke kon patyivin le Devles, bidoshakej. De le Devleske manusha mindig kodo kamen te keren, so lashoj. Dikhas, so zhutil opre te pinzharas kodolen, kon chachikanes patyivin le Devles.

6–7. Sostar trubul pe Biblia te tordyol o chacho patyaimo? So shaj sityuvas kathar o Jezush?

⁶ Kade trubul te patyivinas le Devles, sar tele iskiravadas ande Biblia. E Biblia kado phenel: „O intrego Iskirimo kathar o Del si, thaj lashij te sityarel, thaneste te shol, te lasharel, palpale te xutyilel, kodo te keras, so chachoj. Kade le Devlesko manush zuralo avla, thaj pe sako lasho gata avla” (2Timoteus 3:16, 17). O Pal aposhtol pale kado iskirindas le kristianonge: „kana pe Devleski vorba shunde amendar, na kade line la so manushendar si, kodolake so vi chaches si, le Devleska vorbake” (1Tessalonika 2:13). O chacho patyaimo pe Biblia tordyol, na pe le manushengo gindimo, tradicija vaj kaver variso.

⁷ Le Jezushesko sityarimo mindig pe Biblia tordyolas. (Ginav: Janosh 17:17!) Butivar vorbilas andar late (Mate 4:4, 7, 10). Le Devleske chache manusha kade keren sar o Jezush. Lengo intrego sityaripo pe Biblia tordyol.

8. So sityardas o Jezush pa le Jehovasko chacho patyaimo?

⁸ Feri le Jehovas shaj patyivinas. Ando Asharimata 83:18 kado iskiril: „Te zhanen le manusha, ke tu, kasko anav Jehova, korkori san, o Majbaro pe intrego phuv.” O Jezush kodo kamlas, ke le manusha mishto te pinzharen le chache Devles, thaj sityardas lenge le Devlesko anav. (Ginav: Janosh 17:6!) Kado phendas: „Le Jehovas, tye Devles patyivin, thaj feri leske ker sunto slugipe” (Mate 4:10). Ke le Devleske slugi sam, kade keras, sar o Jezush. Feri le Jehovas patyivinas, phenas lesko anav, thaj vi kaverenge sityaras ke soj lesko anav, thaj so kerla anda amende.

9–10. Sar sikavas kamipe karing jekhavreste?

⁹ Andar amaro jilo trubul te kamas le manushen. O Jezush pe kodo sityardas peske manushen, te kamenpe. (Ginav: Janosh 13:35!) Sajekh si, kathar avas, soskij amare kultura, chorre sam, vaj barvale. O kamipe, so karing jekhavereste hatyaras, sikavel ke phrala sam (Kolosse 3:14). Anda kado chi marasame, thaj chi mudaras khanyikas. E Biblia kado iskiril: „Ande kadala shaj pinzharen opre, ke kon si le Devlesko shavoro thaj kon si le Bengesko shavoro: kon na o chachipe kerel, na kathar o Del si, thaj chi kodo, kon chi kamel peske phrales.” Thaj pashe shutas: „te kamas jekhkaveres. Na kade, sar o Kain, kon kathar o nasul sas, thaj mudardas peske phrales” (1Janosh 3:10–12; 4:20, 21).

¹⁰ Pe kodo boldas amari vrama, zor, thaj love, te zhutinas, thaj te zuraras jekhavres (Heberenge 10:24, 25). Sakonesa lasho keras (Galacia 6:10).

11. Sostar te mukhasame le Jezusheske?

¹¹ Trubul te mukhasame le Jezusheske, ke feri perdal pe leste shaj muntunasame. E Biblia avri phenel: „khanyikastar naj muntusarimo, ke o Del chi das kaver anav tela cheri mashkar le manusha, sosa shaj muntunasame” (Aposhtola 4:12). Ando 5. kotor aba sas vorba pe kodo, ke o Jehova bishaldas le Jezushes, te del pesko trajo anda le patyivale manusha (Mate 20:28). O Jehova le Jezushes shutas krajeske, te rajil pe phuv. Anda kado phenel e Biblia, ke te kamas lungo trajo te trajinas, trubul te mukhasame le Jezusheske. (Ginav: Janosh 3:36!)

12. Sostar chi zhas andre ande politika?

¹² Te krujinas avri e politika. O Jezush nas andre ande politika. Kana leski krisi sas, kado phendas le Pilatusheske, kon jekh baro manush sas mashkar le romaicka: „Muro krajipe na ande kadi lumaj.” (Ginav: Janosh 18:36!) Sar o Jezush, vi ame patyivale sam karing le Devlesko krajipe, thaj ande kado chi zhas andre ande politika, sajekh si kaj trajinas. E Biblia kodo phenel amenge, te mukhasame „le bare rajenge”, la themake krisake (Roma 13:1). Mukhasame la themake krisake, kaj so beshas. De kana varisavi krisi kaver phenel, sar le Devleski krisi, atunchi kade keras sar le aposhtola, kon avri phende: „Sar rajeske, le Devleske trubul majfeder te mukhasame, sar le manushenge” (Aposhtola 5:29; Marko 12:17).

13. So sityaras pa le Devlesko krajipe?

¹³ Patyas, ke feri le Devlesko krajipe zhanel te lasharel la lumake gindura. O Jezush avri phendas, ke le „krajipeski lashi vorba” pe intrego phuv ingrena. (Ginav: Mate 24:14!) Chi jekh manushengo rajipe chi zhanel te kerel kodo, so le Devlesko krajipe kerla anda amende (Asharimata 146:3). O Jezush pe kodo sityardas amen, te rudyinas anda le Devlesko krajipe. Kado phendas: „Te avel tyiro krajipo. Te kerdyol so tu kames, sar ando cheri, kade vi pe phuv” (Mate 6:10). Andar e Biblia shaj zhanas, ke le Devlesko krajipo sako manushengo rajimo pustitila, thaj „feri kado krajipe ashel mindig” (Daniel 2:44).

14. Tu so gindis, kon patyivin chachikanes le Devles?

¹⁴ Pala soste kadala sityilan, gindintu: „Kasko sityaripe tordyol pal e Biblia? Kon vorbin kaverenge pal le Devlesko anav? Kon kamen anda jilo jekhavres, thaj kon patyan, ke o Del anda kodo bishaldas le Jezushes, te muntul amen? Kon chi zhan andre ande politika? Kon ingren e vorba, ke feri le Devlesko krajipe zhanel te lasharel le gindura?” Feri le Jehovaske Chache Manusha (Izaiash 43:10–12).

SO KERESA?

15. Kana lela andre o Del amaro patyamo?

¹⁵ Naj dosta feri te patyas, ke o Del si. Inke vi le demonura patyan ande kado, de von chi mukhenpe le Devleske (Jakab 2:19). Te kamasa, ke o Del andre te lel amaro patyamo, na feri kodo trubul te patyas ke voj si, vi trubul te keras kodo, so phenel.

16. Sostar trubul te mukhas o xoxamno patyaimo?

¹⁶ Pasha kodo, ke o Del andre te lel amaro patyamo, trubul te mukhas o xoxamno patyamo. O Izaiash profeta kado iskirindas: „Aven avri ande leste, ashen uzhe” (Izaiash 52:11; 2Korintus 6:17). Ande kado sakofelo trubul te shinas, so kaj o xoxamno patyamo phandel amen.

17–18. So si o „Baro Babilono”, thaj sostar trubul sigo te mukhes les?

¹⁷ So si o xoxamno patyaimo? Sako kasavo patyaimo, so pe kodo sityarel, kade te patyivinas le Devles, so naj andre ande le Devleski Vorba. E Biblia sako xoxamne patyaimaske kade phenel ke Baro Babilono (Sikadyimaski 17:5). Sostar? Pala le Noeske shordyimasko paji, but xoxamne sityaripe kerdyile ando Babilono, so pala kodo pe intrego phuv avri gele. Le manusha ando Babilono kasave devlen patyivinde, kon trin del si ande jekh. Ande amare dyesa but patyaimo kodo sityarel, ke o Del Trin Del si. De e Biblia uzhes iskirindas, ke feri jekh chacho Del si, o Jehova, thaj o Jezush si lesko Shavo (Janosh 17:3). Le manusha ando Babilono vi ande kodo patyande, ke si ando manush variso, so majdur trajil pala o meripe, thaj dukh si les ande jag. De kado naj chaches. (Dikh: Informaciovo 14, O xoxamno sityaripe, ke Trin Del si, 17, Dyi thaj 18, Duxo.)

¹⁸ O Del aba anglal phendas, ke na butara sako xoxamno patyaimo pustitime avla (Sikadyimaski 18:8). Dikhes, sostar trubul sigo te mukhes o xoxamno patyaimo? O Jehova Del kodo kamel, ke inke angla kodo ker variso, te na nashes avri ande vrama (Sikadyimaski 18:4).

19. Sar grizhila pe tute o Jehova, kade te gindisa ke les slugis?

¹⁹ Kade te kames, ke mukhes o xoxamno patyaimo, thaj le Devles slugis, shajke tye amala thaj tye nipura chi hatyaren jekh tusa, thaj inke vi pharimo shaj keren tuke. De o Jehova chi mukhel tut korkoro. Pasha kasavi familija shaj tordyos, kaj so but milliova manusha, ande pengo jilo kamen jekhavres. Thaj angla tute shaj avel kodo, ke shaj trajis ande le Devleski nyevi luma, thaj chi meresa (Marko 10:28–30). Shajke tye amala vaj ande tyo nipo varikon, kon chi hatyarel tusa jekh, ke le Jehovas kames te slugis, kade gindila ke sityola e Biblia.

20. Sostar trubul chachikanes te patyivis le Devles?

²⁰ O Del sigo nacharela o nasulimo, thaj lesko krajipo rajila pe phuv (2Peter 3:9, 13). Sosko shukar avla! Sako manush kade patyivila le Jehovas, sar voj kamel. Anda kado aba akanak trubul te keres variso, thaj chachikanes te patyivis le Devles!