1–3. Soske pushajipe aven opre ande manusha pa meripo, thaj sar den vorba pe kadala kaver patyaimata?

E BIBLIA kodo shinavel, ke avela kodo dyes, ke „chi avla majbut meripo” (Sikadyimaski 21:4). Andar o 5. kotor zhanglam, ke le parujimaske shaj najisaras, ke shaj trajinasa, thaj chi merasa. Adyes inke meren le manusha (Predikator 9:5). Anda kado si jekh baro pushajipo: kaj zhasa kana merasa?

² Inke majfeder kamas te zhanas vorba pe kado pushajipo, kana merel amen varikon, kas kamas. Pe kadala gindisaras: „Kaj gelas? Dikhel amen? Si les dukh? Shaj zhutil amenge? Pale shaj dikhasa les?”

³ Sako patyamo kaver vorbi del palpale pe kadal pushajipe. Si savo kodo sityarel, lasho manush te san, ando cheri zhas, nasul manush te san, ande jag zhas. Si patyamo, kaj so kodo phenen, ke pala amaro meripo duxo kerdyuvas, thaj amara familijasa trajinas majdur, kon aba mule. Kavera kodo phenen, pala soste meras, krisi shinen pe amende, thaj pale shaj trajinas, vaj ande jekh kaver manush, vaj ande jekh allato.

4. So sityaren but patyaimo po meripe?

⁴ But patyaimo kade mezil, ke kaver sityaren po meripe, de anda jekh gindo aven avri. Kodo sityaren, ke kana merel o manush, si les variso, so inke majdur trajil. Kado chacho si?

KAJ ZHAS PALA AMARO MERIPE

5–6. So avla amenca, kana meras?

⁵ O Jehova zhanel, ke so avla amenca, kana meras, thaj phenel amenge, ke kana varikon merel, lesko trajo nacholtar. O meripo, thaj o trajo kaver si, thaj dur si jekhavrestar.a Anda kado kana varikon merel, chi hatyarel khanchi, naj les gindura, thaj chi trajil pe kaver than.

⁶ O Salamon kraj kodo iskirindas, ke „le mule khanchi chi zhanen”. Chi zhanen te kamen, chi te xojajven, thaj „ande gropa. . . naj butyi, gindo, pinzharimo vaj godyaverimo.” (Ginav: Predikator 9:5, 6, 10!) Ande Asharimata 146:4 pale kodo iskiril e Biblia, ke kana varikon merel, „nachontar leske gindura”.

SO PHENDAS O JEZUSH PA MERIPO?

7. So phendas o Jezush pa meripo?

⁷ O Jezush kodo phendas le sityardenge, kana lesko amal, o Lazar mulas: „O Lazar, amaro amal sovel”. Feri o Jezush na pe kodo gindisardas, ke o Lazar pe jekh cerra vrama tele daspe, vi pashe sutas: „O Lazar mulas” (Janosh 11:11–14). Thaj kadalesa kodo phendas, ke o meripe kasavoj, sar kana varikon sovel. Na kodo phendas, ke o Lazar ando cheri si, vaj peska familijasa si, kon aba mule. Thaj chi kodo chi phendas, ke dukh si les ande jag, vaj pale rakhadyilas manusheske vaj allatoske. Na, o Lazar kasavo sas, sar kon zurales sovel. Vi kaver Bibliake vorbi kodo phenen, ke o meripo kasavoj, sar kana varikon zurales sovel. Kana o Jezush opre ushtyardas le Jairusheska sheja, kodo phendas, ke o meripo kasavoj, sar kana varikon sovel. Kado phendas: „Chi mulas, feri sovel” (Lukach 8:52, 53).

8. Kathar zhanas ke o Del na kade kerdas amen, te meras?

⁸ O Del kade kerdas le Adamos thaj la Eva, ke jokhar te meren? Nichi. Ke o Jehova kade kerdas len, ke bidoshale, saste t’aven, thaj lungo trajo te trajin. Kana kerdas len, ande lengo jilo das o lungo trajo (Predikator 3:11). Chi jekh dad, vaj dej chi kamel, ke leske shavora te phuron, thaj te meren. Vi o Jehova kade hatyarel karing amende. De kana o Del po lungo trajo kerdas amen, atunchi sostar meras?

SOSTAR MERAS?

9. Sostar sas lashi kodi vorba, so o Jehova le Adameske, thaj la Evake das?

⁹ O Jehova kado phendas le Adameske ando Edeno: „Pe la barako sako kasht shaj xas, zhi kaj chajos. De po lasho, thaj nasul zhanimasko kasht, te na xas, ke savo dyes xasa pa leste, vi meresa” (1Mozesh 2:9, 16, 17). Nas pharo kadi vorba ande te inkren. Thaj feri lestar pelaspe te phenel le Adameske, thaj la Evake, ke so si o lasho, thaj so si o nasul. O Adam, thaj e Eva kodo te kerdo, so o Jehova phendas, kodolesa pengi patyiv sikado avri karing leski bari zor. Thaj vi kodo avri shaj sikado, ke sar najisaren sa kodola, so voj das len.

10–11. a) Sar xoxadas o Beng le Adames, thaj la Eva, te na mukhenpe le Devleske? b) Sostar naj jertisaripe pe kodo, so o Adam, thaj e Eva kerdas?

¹⁰ De o Adam, thaj e Eva chi mukhlepe le Jehovaske. O Beng kado pushlas la Evatar: „Vi chaches kodo phendas o Del, ke chi pe jekh kasht nashtig xan?” E Eva kado phendas: „Shaj xas pal le kashtengo frukto. De pe kodo kasht so mashkaral si ande bar, pe kodolesko frukto, o Del kado phendas: »Te na xan, chi te na unzon leste, ke merena«” (1Mozesh 3:1–3).

¹¹ O Beng kado phendas: „Chi merena. Ke zhanel o Del ke savo dyes xana pe leste, avri puterdyon tumare jakha, thaj kasave avena sar o Del, zhanena so si o lasho, thaj so si o nasul” (1Mozesh 3:4–6). O Beng kodo kamlas te patyavavel ke vi e Eva shaj phenel so si o lasho, thaj so si o nasul. Majdur xoxadas lake, ke so avla, te na mukhelape le Devleske. Kodo phendas, ke e Eva chi merela, kade e Eva xalas andar o frukto, thaj das vi peske romeske. O Adam thaj e Eva zhangle, ke o Jehova chi mukhlas lenge te xan andar o frukto. Anda kodo ke xale andar leste, von zhangle so keren, ke kadalesa rigate shon le Devleski vorba, thaj kade nas patyivale karing pengo Dad. Naj khanchi jertisaripe pe kado!

12. Sostar si briga, ke o Adam thaj e Eva chi patyande le Devlesko muj?

¹² Soski brigaj, ke o Adam thaj e Eva chi patyande le Devlesko muj! So hatyaresas, te bararesas tye shaves, vaj tya sheja, de von pala kodo chi patyanas tyo muj, thaj kodo kerenas, so von kamen, thaj na kodo, pe soste sityardan len. Kadalesa kethane phagenas tyo jilo.

13. Pe soste gindisardas o Jehova, kana kodo phendas, ke „palpale zhasa ando praxo”?

¹³ Kana o Adam thaj e Eva chi mukhlepe le Devleske, xasarde o lungo trajo. O Jehova kado phendas le Adameske: „praxo san, thaj palpale zhasa ando praxo.” (Ginav: 1Mozesh 3:19!) Kadalesa kodo phendas, ke pale praxo avla, sar te na trajindo soha (1Mozesh 2:7). Pala soste o Adam bezex kerdas, mulas, thaj chi trajindas majdur.

14. Sostar meras?

¹⁴ O Adam thaj e Eva muj te patyando le Devleske, vi adyes trajinas. De kodolesa, ke chi mukhlepe leske, bezex kerde, thaj mule. O bezex kasavoj, sar jekh zhungalo nasvalipe, so kathar o Adam thaj kathar e Eva lam perdal. Sa bezexales rakhadyilam, thaj anda kado trubul te meras (Roma 5:12). De o Del na kado kamel le manushenca. Soha chi kamlas, ke le manusha te meren, thaj vi e Biblia kodo phenel, po meripo, ke xojako (1Korintus 15:26).

O CHACHIPE SLOBODISAREL

15. Sostar slobodisarel amen o chachipe pe le mule?

¹⁵ O chachipo pa meripo, kathar but xoxamno gindo slobodisarel amen. E Biblia kodo sityarel pa mule, ke chi hatyaren dukh, thaj briga. Chi zhanas te vorbisaras lenca, thaj chi von chi zhanen te vorbin amenca. Chi zhanas te zhutinas lenge, thaj chi von chi zhanen te zhutin amenge. Chi zhanen te azban amen, anda kado chi trubul te daras lendar. But patyaimo kodo sityarel, ke le mule trajin, thaj zhanas te zhutinas lenge, te dasa love le rashajen, vaj kodole manushen, kon sunti kerenpe. De kana pinzharas o chachipe, chi zhanen rigate te ingren amen kasave xoxajimasa.

16. Soske xoxajimata sityaren but patyaimo pe mule?

¹⁶ O Beng le xoxamne patyaimasa kamel rigate te ingrel amen, te patyas, ke le mule vi majdur trajin. Si patyaimo, kaj so kodo sityaren, ke kana meras, andar amende variso majdur trajil varikaj. Vi tyo patyaimo kado sityarel? Vaj kodo, so e Biblia phenel pa mule? O Beng le xoxajimasa kamel te boldel le manushen kathar o Jehova.

17. Sostar anel lazhavo e jagali gropako sityaripe po Jehova?

¹⁷ Lazhavoj, so ande but patyaimo sityaren. Si savo patyaimo kodo sityarel, ke le nasula mindig ande jag phabona. Kado xoxajimo lazhavo anel po Jehova. Soha chi mukhelas, ke le manushen kasave dukha t’aven! (Ginav: 1Janosh 4:8!) So gindisas pa kodo manush, kon kade sityarel peske shavores, ke lesko vast ande jag shol? Kodo gindisas, ke zurales nasul manush si, thaj chi kamesas te pinzhares les. O Beng kodo kamel, kade te gindinas pa Jehova.

18. Sostar chi trubul te daras kathar le mule?

¹⁸ Si patyaimata, kaj so kodo phenen, kana le manusha meren duxo kerdyon. Kodo sityaren, ke kadale duxon trubul te patyivinas, thaj te daras lendar, ke bare amalaj, de vi xojake shaj aven. Butzhene patyan kado xoxajimo. Daran kathar le mule, thaj anda kado le mulen patyivin, na le Jehovas. Na bister, ke le mule khanchi chi hatyaren, anda kado chi trubul te daras lendar. O Jehova kerdas amen. Voj si o chacho Del, thaj feri les trubul te patyivinas (Sikadyimaski 4:11).

19. Sar zhutil amen o chachipo pa le mule?

¹⁹ Te pinzharasa o chachipe pa meripe, slobodisajvas kathar o xoxamno patyaimo. Kado chachipe vi ande kodo zhutil, ke majfeder te hatyaras, so shinadas o Jehova, ke opre ushtyona le mule.

20. Pe soste avla vorba ande kaver kotor?

²⁰ Le Devleski jekh sluga, o Job bute bershenca angla kadi kado pushlas: „Te merela o manush, shaj trajil pale?” (Job 14:14). Shaj avel kasavo, ke kon mulas, kodo pale shaj trajil? E vorba, so o Del ande Biblia phendas, pacha del amen. Ando kaver kotor pe kado avla vorba.

1–3. Kaj sam andre phandade savorazhene, thaj sar slobodisarela amen o Jehova?

GINDIN, ke andre phandaven tu ande temlica zhi kaj chi meres, anda kodo bezex, so chi kerdan! Nashtig slobodis tu. Nashtig keres khanchi, thaj so angla tute si, kodo naj shukar. De kana aba opre dan sakofelo, zhanesa, ke si varikon, kas si zor pasha kodo, te mukheltu slobodo, thaj kado vi shinadas tuke. So hatyaresas?

² Savorazhene andre sam phandade ando meripe. Sa jekh si so keras, nashtig nashastar. De le Jehovas si zor pasha kodo, ke te slobodisarel amen kathar o meripe. Thaj kado vi shinadas, ke „nachola o paluno xojako, o meripe” (1Korintus 15:26).

³ Gindin andre, sosko mishto avla, kana chi trubul aba te daras kathar o meripe! De o Jehova na feri o meripo khosela, inke vi le mulen opre ushtyarela. Gindin andre, so si kado! O Jehova kodo shinavel, ke „le mule, kon khanchi chi zhanen te keren” pale trajina (Izaiash 26:19). Pe kado phenel e Biblia, ke opre ushtyimo.

KANA MEREL VARIKON, KAS KAMES

4. a) Sar shaj las zor, kana merel amen jekh pashal nipo vaj jekh amal? b) Kon sas le Jezusheske pashal amala?

⁴ Kana merel amen jekh pashal nipo vaj jekh lasho amal, e dukh thaj e briga zurales pharoj. Kade hatyaras, ke khanchi chi zhanas te keras. Chi zhanas palpale te das lesko trajo. De andar e Biblia chachi zor shaj las. (Ginav: 2Korintus 1:3, 4!) Dikhas jekh pelda, ke o Jehova thaj o Jezush sar kamen palpale te den amare mulengo trajo. Kana o Jezush pe phuv sas, butivar zhalas kaj o Lazar thaj kaj leske phenya, kaj e Marta thaj kaj e Maria. Seltrinzhene le Jezusheske lashe amala sas. E Biblia kado iskiril: „O Jezush. . . kamelas la Marta, thaj la Martaka phenya, thaj le Lazares.” De pala kodo o Lazar mulas (Janosh 11:3–5).

5–6. a) So kerdas o Jezush, kana dikhlas le Lazareske niposki dukh? b) Sostar zurarel amen, ke zhanas, ke so hatyarel o Jezush kana merel varikon?

⁵ O Jezush gelas, te zurarel la Marta thaj la Maria. Kana e Marta zhanglas, ke o Jezush aba pashal si, angla leste gelas, avri anda foro. Losshajlas, ke dikhel le Jezushes, de kado phendas leske: „te avilanas kathe, chi mulo muro phral.” E Marta kade gindindas, ke o Jezush pe but vrama avilas. Pala kado, o Jezush dikhlas, ke e Maria rovel (Janosh 11:21, 33, 35). Perdal hatyardas kodi bari dukh, so atunchi hatyaras, kana xasaras varikas, kas kamas.

⁶ Zurarel amen, ke o Jezush kodo hatyarel kana merel varikon, sar ame. Voj pale kasavoj, sar pesko Dad (Janosh 14:9). Le Jehovas si zor, te khosel o meripe, thaj kado na pa buteste vi kerela.

„LAZAR, AV AVRI!”

7–8. Sostar chi kamelas e Marta, te len o barr angla than, kaj so le Lazares praxonde, de so kerdas o Jezush?

⁷ Kana o Jezush kothe reslas, kaj so le Lazares praxonde, dikhlas, ke jekh baro barr sas angla kodo, kaj andre shute les. Kado phendas: „Len kothar o barr!” De e Marta kado chi kamelas, ke o Lazar aba shtar dyes mulo sas (Janosh 11:39). E Marta chi zhanelas, ke so kamel te kerel o Jezush.

⁸ O Jezush kado phendas le Lazareske: „av avri!” So pala kado pelas, kodolestar e Maria thaj e Marta zurales chudindepe. „O mulo manush. . . avri avilas, leske vast, thaj leske punre andre sas phangle” (Janosh 11:43, 44). O Lazar pale trajindas! Pale kethane sas peska familijasa, thaj peske amalenca. Shaj unzhude leste, shaj xutyilde les pende, thaj shaj vorbinde lesa. O Jezush opre ushtyadas le Lazares. Soski bari chuda pelas!

„SHEJORI, PHENAV TUKE, USHTYI OPRE!”

9–10. a) Kon das zor le Jezushes, te ushtyarel opre le manushen? b) Sostar si lasho te pinzharas so pelas kodolenca, kas opre ushtyarde?

⁹ O Jezush peska zorasa ushtyardas opre le manushen? Na. Angla soste opre ushtyardas le Lazares, karing o Jehova rudyindas, o Jehova pale das les zor opre te ushtyarel le Lazares. (Ginav: Janosh 11:41, 42!) O Jezush ne feri le Lazares ushtyardas opre. E Biblia vorbil pe kodo, ke jekh 12 bershengi shejori zurales nasvali sas. Lako dad, o Jairush ande peski bari briga kodo manglas kathar o Jezush, te sastyarel la. Voj sas leski jekh shej. Kana le Jezushesa vorbindas, kothe gele leste thaj kado phende: „Tyi shej mulas! Sostar khinyaresas majdur le sityardes?” De o Jezush kado phendas le Jairusheske: „Na dara, feri patya!” Pala kodo o Jezush ande le Jairushesko kher gelas. Sar majpashal resle kaj o kher, o Jezush dikhlas thaj shundas, ke roven le manusha. Kade das duma lende: „E shejori chi mulas, feri sovel.” Lako dad thaj laki dej pe kodo gindinde, pe soste shaj gindindas o Jezush. Pala kodo o Jezush sakones avri bishaldas, thaj le dadesa, thaj la dejasa ande gelas kothe, kaj so e shejori pashjolas. Shukares xutyildas la shejorako vast, thaj pe kodo mangas la: „Shejori, phenav tuke, ushtyi opre!” Shaj gindis, sar losshalas lako dad thaj laki dej, ke lengi shejori opre ushtyilas, thaj las te phirel! O Jezush opre ushtyardas lenga shejora (Marko 5:22–24, 35–42; Lukach 8:49–56). Kathar kado dyes, kana feri pe pengi cini shej dikhenas, ande lengi godyi delas, ke so kerdas anda lende o Jehova le Jezushesa.a

¹⁰ Kodol, kas o Jezush opre ushtyardas, pale mule. De mishtoj, te pinzharas so lenca pelas, ke zor den amen. O Jehova opre kamel te ushtyarel le manushen, thaj kado vi kerela.

SO SHAJ SITYUVAS ANDA KODOLA VORBI, KANA OPRE USHTYARDE LE MANUSHEN?

11. Sar ando Predikator 9:5 si, so sas le Lazaresa, pala soste mulas?

¹¹ E Biblia uzhes avri phenel, ke „le mule khanchi chi zhanen”. Kado vi po Lazar chacho sas (Predikator 9:5). Sar o Jezush phendas, o Lazar kasavo sas, sar kon sovel (Janosh 11:11). Kana ande gropa sas, chi zhanelas pe khancheste.

12. Kathar zhanas, ke o Lazar vi chaches opre ushtyilas?

¹² But manusha dikhle, ke o Jezush opre ushtyardas le Lazares. O Lazar pale trajindas, thaj kado sikadas, ke vi chaches opre ushtyilas. Butzhene maladyile le Lazaresa, thaj kade patyajle, ke le Jezushes o Del bishaldas (Janosh 11:47). Inke vi kodol, kon xojajvenas po Jezush, zhangle pa kadi chuda. Von chi losshajle kadaleske, anda kado, kodo kamenas, te mudaren le Jezushes, thaj vi le Lazares (Janosh 11:53; 12:9–11).

13. Sostar shaj zhanas, ke o Jehova opre ushtyarela le mulen?

¹³ O Jezush kodo phendas, ke „sakono, kon ande serimaski gropa si”, opre ushtyona (Janosh 5:28). Sakono, pe kaste o Jehova serol, pale trajina. De pasha kodo, ke o Jehova opre te ushtyarel varikas, pe sakofelo trubul te serol, ke sosko sas o manush. Zhanel te kerel kado? But milliardura cherhaja si. E Biblia kodo phenel ke o Jehova sako cherhajen pe lengo anav akharel. (Ginav: Izaiash 40:26!) Kana zhanel sako cherhajengo anav, atunchi chi kodo naj pharo leske, palpale te serol pe sakofelo pe kodola, kas opre ushtyarel. Thaj so inke majbaroj: o Jehova kerdas sakofelo, kade vi si les pashe zor, palpale te anel ando trajo le mulen.

14–15. Sar zhutin amen le Jobeske vorbi?

¹⁴ O patyivalo Job zhanglas, ke le mule opre ushtyona. Kado pushajipo shutas opre: „Te merela o manush, shaj trajil pale?” Thaj kado phendas le Jehovaske: „Akharesa man, thaj me palpale dav tut vorba. Kames te dikhes kodoles kas kerdan.” Ova, o Job patyalas, ke o Jehova aba zurales zhukarel e vrama, kana opre ushtyarela le mulen (Job 14:13–15).

¹⁵ So hatyares, ke zhanes, ke le mule opre ushtyona? Gindindan aba pe kodo, ke ande tyi familija, thaj ande tye amala avla varikon? Zor del amen, ke o Jehova palpale kamel te anel ando trajo le mulen. Dikhas, ke so phenel e Biblia, kaj trajina kodol, kon opre ushtyona, thaj kon ushtyona opre.

„SHUNENA LESKI VORBA, THAJ AVRI AVEN”

16. Sosko avla kodolengo trajo, kon pe phuv ushtyona opre?

¹⁶ Kon dulmut ushtyile opre, pale kethane trajinde penga familijasa, thaj penge amalenca. Vi kade avla, thaj inke majlasho avla! Sostar? Kodol, kon opre ushtyona pe phuv, lungo trajo shaj trajina, thaj chi trubul pale te meren. Thaj ande jekh kaver luma shaj trajin, sar ande soste ame trajinas akanak. Chi avla maripe, nasulimo thaj nasvalimo.

17. Kon ushtyona opre?

¹⁷ Kon ushtyona opre? O Jezush kodo phendas ke „sakono, kon ande serimaski gropa si, shunena leski vorba, thaj avri aven” (Janosh 5:28, 29). Ande Sikadyimaski 20:13 kado si: „O baro paji. . . avri das le mulen, so ande leste si, thaj vi o meripe thaj e gropa avri das so ande leste si mule”. Kade but milliardura manusha opre ushtyona. O Pal aposhtol pale kodo phendas, ke „opre ushtyona vi le chache, vi le nasula”. (Ginav: Aposhtola 24:15!) So sikavel kado?

18. Kon si le chache, kon opre ushtyona?

¹⁸ Mashkar le chache si le Jehovaske kodola patyivale slugi, kon angla kodo trajinas, kana o Jezush pe phuv phirelas. O Noe, o Abraham, e Sara, o Mozesh, e Ruth, thaj e Ester pe phuv trajina pala soste opre ushtyon andar o meripe. Pe kasave manusha shaj ginaves ando Heberenge 11. kotor. Thaj so si kodole patyivalenca, kon ande amare dyesa meren? Vi von chachej, kade vi von opre ushtyona.

19. Kon si le bichache? So avla lenca?

¹⁹ Le bichache kodol milliardura si, kon chi zhangle te pinzharen le Jehovas. Anda kodo ke mule, o Jehova chi bisterdyilas pa lende. Vi len opre ushtyarela, shaj pinzharena le Devles, thaj shaj slugisarena les.

20. Sostar chi avla sakono opre ushtyardo?

²⁰ Atunchi sakono opre avla ushtyardo, kon mulas? Na. O Jezush kodo phendas, ke avna kasave, kon chi ushtyona opre (Lukach 12:5). Kon phenela, ke kon avla opre ushtyardo vaj na? E majbari krisi o Jehova shinela, de vi le Jezushes das zor pe kodo, te shinel krisi pe mule, thaj pe zhuvinde (Aposhtola 10:42). Pe kaste kasavi krisi shinen ke nasulaj, thaj chi kamen te bolden pengo trajo, kodol chi ushtyona opre. (Dikh: Informaciovo 19, Gehenna.)

OPRE USHTYIPO ANDO CHERI

21–22. a) Sosa phirel kodo, varikon ando cheri te ushtyola opre? b) Kon ushtyilas opre majanglal ando cheri?

²¹ E Biblia vi kodo phenel, ke si manusha, kon ando cheri trajina. Kon ando cheri ushtyola opre, kodo na sar manush pe phuv trajila, ke kodo duxo avla.

²² O Jezush sas o angluno, kon ando cheri ushtyilas opre (Janosh 3:13). Pala soste mulas, po trito dyes, o Jehova opre ushtyardas les (Asharimata 16:10; Aposhtola 13:34, 35). De na ande maseste, ushtyilas opre. O Peter aposhtol kado phendas: „Ande maseste mudarde les, de ando duxo ushtyilas opre” (1Peter 3:18). O Jezush sar zuralo duxo ushtyilas opre (1Korintus 15:3–6). E Biblia vi kodo phenel, ke na numa o Jezush si, kon kade ushtyilas opre.

23–24. Kon si ande cerra bakre, thaj sodezhene si?

²³ O Jezush angla pesko meripo kado phendas peske patyivale sityardenge: „zhavtar, than te kerav tumenge” (Janosh 14:2). Pe kado kodo hatyardas, ke avna mashkar leske sityarde, kon kana opre ustyona, lesa avna ando cheri. Sodezhene avna kothe lesa? O Jezush cerra bakrenge akharelas len, kado sikavel, ke cerrazhene avna (Lukach 12:32). O Janosh aposhtol iskirindas tele, sodezhene avna, kana dikhlas, ke o Jezush „kothe tordyol pe Shionosko plaj, thaj lesa le 144 000” (Sikadyimaski 14:1).

²⁴ Kana avna opre ushtyarde le kristianura, kon andre si ando 144 000? Vi kado zhanas andar e Biblia: pala kodo avla, kana o Kristush rajila ando cheri (1Korintus 15:23). O Kristush aba akanak rajilpe, thaj kon ando 144 000 si, majbutzhene aba opre ushtyile. Kon inke pe phuv si mashkar lende, thaj ande amare dyesa meren, sigo opre zhan ando cheri. De le majbut manusha pala kadi avna opre ushtyarde, ande nyevi luma te trajin.

25. Pe soste avla vorba ando kaver kotor?

²⁵ Na butara o Jehova slobodisarel le manushen kathar o meripo, thaj o meripo nacholatar. (Ginav: Izaiash 25:8!) De so kerena ando cheri kodol, kon kothe ushtyona opre? E Biblia phenel, ke kraja avna le Jezushesa. Ando kaver kotor pe kado avla vorba.