Матфеё
16 Котэ каринг о Исусо поджылэ и фарисеёря и садукеёря и, кай тэ випушэн лэс годятар, манглэ лэс тэ сыкавэл лэнди чуда па небо. 2 Во ԥэндя лэнди: «Кала поджал о вечеро, тумэ ԥэнэн: „Авэла лащи поӷода, важ кода кай о небо лоло“, 3 ай тэсара ԥэнэн: „Адес авэла шудро и жала брышын, важ кода кай о небо лоло, но зацырдо тученца“. Тумэ ӷанэн, сар тэ ӷатярэн па небо, сави авэла поӷода, но не можэте тэ полэн, сави время щас жал. 4 Кадэла времяко миро, саво найлашо и найкандино лэ Дэвлэсти, вся и время мангэл чуда, но во на диқэла нисави чуда — кати лэ Ёнастири чуда». Во ашадя лэн и жылятар.
5 Лэстирэ ученикоря пэрэплывисардэ пэ лодка пэ авэр береӷо, но бистэрдэ тэ лэн пэса марно. 6 О Исусо ԥэндя лэнди: «Диқэн, фэринпэ, кай тэ на римой тумэн лэ фарисеёнэндири и лэ садукеёнэндири опара». 7 Вонэ линэ тэ ԥэнэн ек еқэсти: «Наверно, во ԥэндя кадя важ кода, кай амэ на лям пэса марно». 8 О Исусо ашундя када и ԥэндя: «Васо тумэ ԥэнэн, кай тумэндэ нинай марно? Васо тумэ парашэлэ тэ патян*? 9 Сар тумэ идоси на полэн? Хэба тумэ на сэрэн, сар мэ правардэм панчже марнэнца 5 000 муршэн и скати корзины тумэ кода разо стидэ́? 10 И хэба тумэ на сэрэн, сар мэ лэм семь марнэ и правардэм лэнца 4 000 муршэн и скати барэ корзины тумэ кода разо стидэ́? 11 Сар тумэ на полэн, кай мэ ԥэнавас тумэнди най пала марно? Тумэ трэбуй тэ фэринпэ, кай тэ на римой тумэн лэ фарисеёнэндири и лэ садукеёнэндири опара». 12 Тоди вонэ полинэ, кай во ԥэнэнас лэнди най пала лэ марнэстири опара, ай пала кода, кай вонэ тэ фэринпэ кодэлэстар, сости сытярэн и фарисеёря и садукеёря.
13 Кала о Исусо авеля андэ гавора паша Филиповско Кеса́рия, во пушля лэ учениконэндар: «Со о миро дэл дума пала лэ манушэско Шаво? Со вонэ гиндон пала лэстэ?» 14 Вонэ ԥэндэ: «Дэсавэ ԥэнэн, кай во — о Иоа́но Крестителё, авэр ԥэнэн — о Илья, ай инке ԥэнэн — о Ереми́я или авэр лэ Дэвлэско особо мануш». 15 Тоди во пушля лэндар: «Ай тумэ сар гиндон, ко мэ?» 16 О Си́мано Пётро ԥэндя: «Ту — Христос, лэ жундэ Дэвлэско Шаво». 17 О Исусо ԥэндя лэсти: «Бахтало ту, Си́мано, лэ Ёнаско шаво, важ кода кай тути поможысардя када тэ полэс най о миро, ай мэрно небесно Дад. 18 Мэ ԥэнав тути: ту Пётро, и пэ кадэва бар* мэ ваздава мэрно ӷурто, и ла моӷилкатирэ* вороты на бирона лэс. 19 Мэ дава тути тии па небесно Царство, и вся, со ту сԥандэса пэ ԥув, ужэ авэла сԥангло по небо, и вся, со ту росԥандэса пэ ԥув, ужэ авэла росԥангло по небо». 20 Посли када во запретисардя лэ учениконэнди тэ ԥэнэн аврэнди, кай во Христос.
21 Кодэла времятар о Исусо ля тэ обисний лэ учениконэнди, кай во трэбуй тэ жал андо Иерусалимо, кай во пэрэандярэла бут бида лэ барэдэрэндар, лэ барэ рашандар и лэ закониконэндар и кай лэс умарэна и по трито дес во жундёла. 22 Тоди о Пётро одындярдя лэ Исусос андэ риг и ля тэ уԥэнэн лэсти: «На́ дэ дума кадя*, Учителё! Никала кацаво туса на авэла!» 23 Но о Исусо одбанделя лэстар и ԥэндя: «Вижа мандар*, Сатана! Ту змарэс ман па правильно дром, важ кода кай гиндос най пала лэ Дэвлэстири время, ай пала лэ манушэндири время».
24 Тоди о Исусо ԥэндя лэ учениконэнди: «Ко камэл тэ ԥирэл пала мандэ*, мэк отԥэндёл пэстар, лэл пэско ԥаро столбо* и ԥирэл пала мандэ*. 25 Ко камэл тэ спасый пэстири жызня, во хасарэла ла, ай ко хасарэла пэстири жызня важ мандэ, во упалэ лэла тэ жувэл. 26 И чаче, саво лашымос авэла лэ манушэсти, если лэстэ андэ вас авэла вся и люма, но во хасарэла и жызня? Или со о мануш отдэла, кай тэ получий пэстири жызня? 27 Важ кода кай лэ манушэско Шаво авэла пэстирэ Дадэстирэ зорэса* и лэ анӷелонэнца и спушэла кажнонэстар важ лэстири дила. 28 Чаче ԥэнав тумэнди: дэсавэ анда кодэла, ко тердёл катэ, на мэрэна, пока на диқэна лэ манушэстирэ Шавэс сар царёс*».