Матфеё

3 Андэ кодэла деса о Иоа́но Крестителё заля тэ ԥирэл тэ росԥэнэн андэ Иудейско пустыня. 2 Во ԥэнэнас: «Каинпэ, важ кода кай о небесно Царство пашэ!» 3 Када пала лэстэ сас ԥэндо через лэ Дэвлэско особо мануш о Иса́я: «Андэ пустыня ашундёл ӷромко ӷолосо: „Стерэн о дром важ о Иегова*! Вировнин важ лэстэ и дрома!“». 4 О Иоа́но ԥиравэлас ӥда анда верблюжо шэрсть и ӷаравлицко кущик, во халас кузнечиконэн* и дыко ядин. 5 Каринг лэстэ авэнас и мануша анда Иерусалимо, па вся Иуде́я и анда всаворэ фороря и гава паша лэн Ярда́но. 6 Вонэ англа всаворэ каинаспэ андэ пэстирэ бэзэха, и во болэлас* лэн андо Ярда́но.

7 Кала о Иоа́но додиқля, кай интя, кай во болэл, авэн бут фарисеёря* и садукеёря*, во ԥэндя лэнди: «Лэ сапэндирэ* бэяцэ, ко ԥэндя тумэнди, кай тумэ можэте тэ фэринпэ сындостар? 8 Сыкавэн диласа, кай каинпэ*. 9 И дажэ на́ ԥэнэн корко пэсти: „Амаро дад — о Авраамо“. Ԥэнав тумэнди, кай о Дэл можэт тэ стерэл бэятонэн важ о Авраамо анда кадэла бара. 10 Акэ, паша ла виткако корнё ужэ пашлёл о товэр. Если пэ витка на барёл нисо лашо, ла сшынэна и сԥабарэна. 11 Мэ болав тумэн паеса, важ кода кай тумэ каисайлэ, но кодэва, ко жал пала мандэ, май зорало мандар, и мэ на ашав дажэ тэ злав и сандали па лэстирэ пэрнэ. Во лэла тэ болэл тумэн свынтонэ зорэса и ягаса. 12 Лэстэ андо вас лэ зэрностири лопата*. Во вужарэла пэстири площадка важ о зэрно* и стидэла и пшэница андо складо, ай и шэлуха* сԥабарэла андэ вечно яг».

13 О Исусо авеля анда Галиле́я каринг о Ярда́но, кай о Иоа́но лэс тэ болэл. 14 Но о Иоа́но ля тэ тердярэл лэс: «Васо ту авелян каринг мандэ? Када ту трэбуй тэ болэс ман!» 15 Но о Исусо ԥэндя лэсти: «На́ тердяр ман, важ кода кай кадя амэ стераса вся, со ԥэндя о Дэл*». И о Иоа́но соӷласисайля. 16 Кала о Исусо болделя, во сразу жэ вазгляпэ* анда паи. Тоди ԥэрнаделя о небо, и о Иоа́но додиқля, кай по Исусо, сар ӷолубо, змэкляпэ лэ Дэвлэско зор. 17 И упрал* ашунделя ӷолосо: «Када мэрно любимо Шаво, саво уӷодно манди».