Марко
14 Кала сас инке дуй дес жы каринг и Патради и жы каринг лэ Преснонэ марнэско празнико, и барэ рашая и законикоря гиндонас, сар хытрияса тэ хутилэн лэ Исусос и тэ умарэн лэс. 2 Но вонэ ԥэнэнас: «Кати най по празнико, кай о миро тэ на зваздэлпэ».
3 Кала о Исусо сас андэ Вифа́ния и бэшля тэ хал андо цэр кай о Си́мано, саво варикала сас дерало, интя авеля ек манушни. Латэ андэ вас сас ӷипсово бутылочка, андэ саво сас ароматно вулей (када фартэ кучутно и вужо вулей, пэ саво ԥэнэн нардо). Вой отԥагля о кырлоро пэ бутылочка и ля тэ шол о вулей лэсти по шэро. 4 Но дэсавэ линэ тэ холявэн. Вонэ ԥэнэнас ек еқэсти: «Состэ тэ пэрэвэдий кацаво вулей? 5 Лэс жэ можно сас тэ битинэн важ и 300 дина́рии* и тэ роздэн и ловэ лэ чорорэнди!» Лэнди фартэ на чалеля, со вой стердя*. 6 Но о Исусо ԥэндя: «На́ ӷулен латэ. Состэ тумэ латэ лэнпэ? Вой стердя важ мандэ лащи дила. 7 Важ кода кай и чорорэ вся и время авэна паша тумэндэ, и тумэ сможэте тэ стерэн важ лэндэ лащи дила, кала закамэна, ай мэ най вся и время авава тумэнца. 8 Вой стердя важ мандэ, со моӷла: вишутя о вулей пэр мандэ и кадэлэса подӷотовила, кай ман тэ притидэн. 9 Чаче ԥэнав тумэнди: па вся и люма котэ, кай ашундёла и лащи новость, на бистрэна пала кадэя манушни и росԥэнэна, со вой стердя».
10 Ай о Иу́да Искарио́то, ек анда 12 апосталоря, жыля каринг и барэ рашая, кай тэ здэл лэ Исусос. 11 Кала вонэ виашундэ лэ Иудас, вонэ залошайлэ и солахадэ тэ дэн лэсти ловэ*. И во ля тэ родэл лашо маменто, кай тэ здэл лэ Исусос.
12 По пэрво дес андэ лэ Преснонэ марнэско празнико, кала обычно анэнас ла Патрадятири жэртва, и ученикоря пушлэ лэ Исусостар: «Кай амэнди тэ стас важ тутэ ла Патрадятири мисяйля?» 13 Тоди во бишалдя дуе учениконэн и ԥэндя лэнди: «Жан андо форо. Котэ тумэ додиқэна манушэс, саво андярэл о кувшыно лэ паеса. Жан пала лэстэ 14 и котэ, кай во зажала, ԥэнэн лэ цэрэстирэ хуласти: „О Учителё пушэл: ‚Кай о цэроро важ и ӷостёря, андэ саво мэ тэ справисарав и Патради пэстирэ учениконэнца?‘“. 15 Во сыкавэла тумэнди баро цэр упрэ, кай авэла вся, со трэбуй. Котэ и стерэн вся важ амэндэ». 16 И ученикоря жылэ андо форо, и вся сас кадя, сар во лэнди ԥэндя. И вонэ стердэ каринг и Патради вся, со трэбуй.
17 Вечером о Исусо авеля интя лэ 12 апосталонэнца. 18 Кала вонэ бэшлэ тэ хан, о Исусо ԥэндя: «Чаче ԥэнав тумэнди: ек андар тумэндэ, анда кодэла, ко хал манца, придэла ман». 19 Лэнди по ди ашэля найдраго, и кажно ля тэ пушэл: «Када жэ най мэ?» 20 Во ԥэндя лэнди: «Када ек анда 12, кодэва, ко болэл пэско марно андэ ек чаро манца. 21 Важ кода кай лэ манушэско Шаво ужалтар, сар пала лэстэ пистромэ, но бида кодэлэсти, ко лэс придэл! Фэдэр кодэва мануш тэ на авелоп пэ люма».
22 Кала вонэ ханас, о Исусо ля о марно, мангляпэ*, ԥагля лэс, дя лэ учениконэнди и ԥэндя: «Алэн. Кадэва марно сыкавэл мэрни тила». 23 Потом во ля о стакано, поблаӷодарисардя лэ Дэвлэс и дя лэнди, и вонэ всаворэ пэнас андар лэстэ. 24 Во ԥэндя лэнди: «Кадэва вино сыкавэл мэрно „рат важ о доӷоворо“, саво питяла важ бут мануша. 25 Чаче ԥэнав тумэнди: мэ ужэ на пава о вино, пока на авэла о дес, кала мэ пава о тэрно вино андэ лэ Дэвлэско Царство». 26 Посли када вонэ дилабае диля*, андэ савэ хвалин лэ Дэвлэс, и жылэ по Масли́чно плай.
27 О Исусо ԥэндя лэнди: «Тумэ всаворэ ман ашавэна*, важ кода кай пистромэ: „Умарава лэ пастухос, тоди и бакрэ порознашэнапэ“. 28 Но кала мэ жундювава, тоди жава андэ Галиле́я и аштярава тумэн котэ». 29 Но о Пётро ԥэндя: «Дажэ если всаворэ тут ашавэна, мэ на ашавава!» 30 Пэ када о Исусо ԥэндя: «Чаче ԥэнав тути: адес, андэ кадэя жэ рят, англа кода сар дувар процыпия о башно, ту тривар отԥэндёса мандар». 31 О Пётро тердёлас пэ пэско: «Дажэ если манди прижалапэ туса тэ мэрав, мэ никала тутар на отԥэндювава!» И авэр линэ тэ ԥэнэн кода жэ.
32 Потом вонэ авелэ каринг о ҭан, пэ саво ԥэнэн Гефсима́ния. О Исусо ԥэндя лэ учениконэнди: «Побэшэн катэ, пока мэ лава тэ мангавпэ». 33 Во ля пэса лэ Петрос, лэ Иаковос и лэ Иоанос. Лэ Исусости ашэля ԥарэс по ди, и во фартэ запережывал. 34 Во ԥэндя лэнди: «Манди фартэ ԥарэс, кадя ԥарэс, кай аж тердёл оди. Ашэнпэ катэ и на́ совэн». 35 Во оджыля чуть май дур, пэля пэ чанга, тэлеля жы каринг и ԥув и ля тэ мангэлпэ, кай, если можно, вся када тэ обжал лэс ригаса. 36 Во ԥэнэнас: «А́ва*, Дадэ, важ тутэ вся возможно. Улэ мандар кадэва стакано. Но авря ригатар, мэк авэл най сар мэ камав, ай сар камэс ту». 37 Кала о Исусо рисайля каринг и ученикоря, во додиқля, кай вонэ совэн. Тоди во ԥэндя лэ Петрости: «Си́мано, ту совэс? Хэба ту не моӷ тэ на совэс хоть ек часо? 38 Отшон и линдра и на́ парашэн тэ мангэнпэ, кай тэ на подэнпэ лэ бэзэхэсти. Оди цырдэлпэ*, ай и тила би зорэстири». 39 Посли када во упалэ оджыля и ля тэ мангэлпэ пала кода жэ. 40 Кала во рисайля, во додиқля, кай вонэ упалэ совэн, важ кода кай лэн ля и линдра. И вонэ на ӷанэнас, со лэсти тэ ԥэнэн. 41 Кала во до трито авеля, во ԥэндя лэнди: «И андэ кацави время тумэ совэн и отцыён! Хутила! Поджыля и время, кала лэ манушэстирэ Шавэс отдэна лэ бэзэхэстирэ манушэнди андэ вас. 42 Ущен, авэн. Мэрно здимари ужэ пашэ».
43 Во инке на додя дума, сар авеля о Иуда, ек анда 12. Лэса сас толпа миро барэ шурянца и рувлянца. Лэн бишалдэ и барэ рашая, и законикоря и барэдэра. 44 О здимари доԥэнделя лэнца пала знако: «Хутилэн кодэлэс, кас мэ чуминдава, андярэн лэс и драго следин пала лэстэ». 45 Во сразу поджыля каринг о Исусо, ԥэндя: «Учителё*!» — и чуминдя лэс. 46 Тоди лэ Исусос хутилдэ. 47 Но ек анда кодэла, ко котэ тердёлас, хутилдя и бари шури, дядап лэ ӷлавнонэ рашастирэ рабос и отшындя лэсти о кан. 48 О Исусо жэ ԥэндя кодэлэнди, ко авеля пала лэстэ: «Хэба мэ чордэӷари, кай тумэ авелэ пала мандэ барэ шурянца и рувлянца? 49 Кажно дес мэ сымас тумэнца андэ қандири и сытяравас, и тумэ мандэ на ӷуленас. Но вся када терэлпэ, кай тэ ашэл кадя, сар пистромэ андэ Свынти Лила».
50 Тоди всаворэ ученикоря ашадэ лэс и унашлэ. 51 Но ек тэрно мануш жыля пала лэстэ. Пэр лэстэ сас кати ӥда анда сано лёно, сави сас пэ нанги тила. Лэс камлэ тэ хутилэн, 52 но во ашадя и ӥда и унашля нанго*.
53 Лэ Исусос андярдэ каринг о ӷлавно рашай, савэстэ стидэ́пэ всаворэ барэ рашая, барэдэра и законикоря. 54 Ай о Пётро жалас чуть май дур лэстар жы каринг лэ ӷлавнонэ рашаско цэр. Во зажыля андэ града, бэшля лэ слуӷонэнца и ля тэ татёл паша бари яг. 55 И барэ рашая и всаворэ сындомаря анда Ӷлавно иудейско сындо* родэнас кодэлэн, ко моӷ тэ ԥэнэн варисо против о Исусо, кай тэ виандярэн лэсти смэртно приӷоворо, но нисо не моӷли тэ виарақэн против лэстэ. 56 Бут мануша авэнас и хохавэнас пэр лэстэ, но кода, со вонэ ԥэнэнас, на зжаласпэ. 57 Кадяжэ дэсавэ ущенас и, кай тэ хохавэн пэр лэстэ, ԥэнэнас: 58 «Амэ ашундям, сар во ԥэнэнас: „Мэ розмарава кадэя қандири, сави построисардэ и мануша, и важ трин дес ваздава авэр, и стерава када най лэ манушэндирэ вастэнца“». 59 Но и андэ када лэндирэ алава на зжанаспэ.
60 Посли када ущеля о ӷлавно рашай и пушля лэ Исусостар: «Тути найсо тэ ԥэнэс? Ашунэс, андэр со тут дошалярэн?» 61 Но о Исусо ашэлас мулком и нисо на ԥэнэнас пэ када. О ӷлавно рашай упалэ лэстар пушля: «Ту Христос, лэ Дэвлэско Шаво?» 62 О Исусо ԥэндя: «Када мэ, и тумэ диқэна лэ манушэстирэ Шавэс, саво бэшэл па право вас лэ Зоралэстар* и жал па небесни тучи». 63 Тоди о ӷлавно рашай росшындя пэр пэстэ и ӥда и ԥэндя: «Состэ амэнди авэр свидетеля? 64 Тумэ ашундэ, кай во найпативалэс ԥэндя по Дэл. Со тумэ ԥэнэна пэ када?*» И всаворэ прижанглэ лэ Исусос дошалэса и виандярдэ лэсти смэртно приӷоворо. 65 Тоди дэсавэ линэ тэ шунгардэн пэр лэстэ, вонэ затидэнас лэсти о муй, марэнас лэс лэ кулаконэнца и ԥэнэнас: «Если ту лэ Дэвлэстар*, ԥэн, ко тут дядап!» Посли када и халавдэ линэ тэ марэн лэс пар мостэ, ай потом ундярдэ.
66 Андэ кодэя время о Пётро сас тэлэ андэ града. Кордэ авеля ек лэ ӷлавнонэ рашастири служанка. 67 Кала вой додиқля лэ Петрос, саво татёлас паша яг, вой внимательно подиқля пэр лэстэ и ԥэндя: «Ту тожэ санас кадэлэ Исусоса анда Назаре́то». 68 Но во ля тэ отԥэндёл кадэлэстар: «Мэ лэс на ӷанав и нащи полав, пала со ту дэс дума» — и вижыля каринг и вороты. 69 И служанка, кала додиқля лэс котэ, упалэ ля тэ ԥэнэн кодэлэнди, ко сас паша латэ: «Во анда лэнго круӷо». 70 О Пётро упалэ ля тэ отԥэндёл кадэлэстар. Через дэсави время и мануша, савэ котэ тердёнас, упалэ линэ тэ ԥэнэн лэсти: «Ту точно ек андар лэндэ, ту жэ анда Галиле́я». 71 Но во упалэ ля тэ отԥэндёл*: «Мэрамэ, мэ на ӷанав лэ манушэс, пала саво тумэ ԥэнэн!» 72 И сразу посли лэстирэ алава о башно зацыписайля до дуйто, и лэ Петрости авелэ по гиндо лэ Исусостирэ алава: «Англа кода сар дувар процыпия о башно, ту тривар отԥэндёса мандар». Во на виритярдя и заровья.