Иоано

15 Мэ — чачуни виноӷрадно витка, ай мэрно Дад — барярэл о виноӷрадо. 2 Кажно виточка пэр мандэ, пэ сави нисо на барёл, во опшынэн, ай и лащи виточка* вужарэл, кай пэр латэ тэ барёл инке май бут. 3 Тумэ ужэ ашэлэ вужэ, важ кода кай ашундэ о алав, саво мэ тумэнди ԥэндэм. 4 Мэк тумэндэ авэл ек гиндо манца, и тоди мандэ авэла ек гиндо тумэнца. Пэ виточка нисо на барёла, если вой отшынди ла виткатар. Кадя и тумэндар на авэла нисави польза, если тумэндэ на авэла ек гиндо манца. 5 Мэ — витка, ай тумэ — виточки. Кастэ ек гиндо манца и каса мандэ ек гиндо, лэстар исин баро толко. Би мэрно тумэ нисо не можэте тэ терэн. 6 Кодэва, кастэ ужэ най ек гиндо манца, шолпэ пэ виточка, сави опшынэн и сави потом зашутёл. Кацавэ виточки стидэн, шон андэ яг, и вонэ сԥабон. 7 Если тумэндэ идоси ек гиндо манца и тумэ ритярэн мэрно законо, тоди мангэн вся, со камэн, и тумэнди када авэла дино. 8 Кала тумэндар исин баро толко и тумэ доԥэнэн, кай тумэ андярэн мэрни время*, кадэлэстар мэрно Дад ашэл май ашунгло. 9 Сар о Дад любий ман, кадя и мэ любисарав тумэн; жувэн кадя, кай мэ тумэн тэ любисарав. 10 Если тумэ лэна тэ ритярэн мэрно законо, мэ вся и время лава тэ любисарав тумэн, кадя жэ сар мэ ритярав лэ Дадэско законо и во никала на парашэла ман тэ любий.

11 Мэ ԥэнав тумэнди када, кай тумэ па чачимастэ тэ радуинпэ кадя жэ, сар радосавав мэ. 12 Акэ мэрно законо: любин ек еқэс, кадя жэ сар мэ любисарав тумэн. 13 Нико на любий май фартэ кодэлэстар, ко ӷотово тэ мэрэл важ пэстирэ чаче*. 14 Тумэ мэрнэ чаче, если терэн кода, со мэ тумэнди ԥэнав. 15 Мэ ужэ на ԥэнав пэр тумэндэ раборя, важ кода кай о рабо на ӷанэн, со терэл лэско хулай. Мэ ԥэнав пэр тумэндэ мэрнэ чаче, важ кода кай дэм тэ ӷанэн вся, со ашундэм мэрнэ Дадэстар. 16 Най тумэ витидэ́ ман, ай мэ витидэм тумэн. Мэ ԥэндэм тумэнди тэ жан и тэ терэн дила, сави анэна лашымос, — кадэва лашымос авэла вся и вечность. И тоди о Дад дэла тумэнди вся, со тумэ мангэна лэстар через мэрно алав.

17 Мэ ԥэнав тумэнди када, кай тумэ тэ любин ек еқэс. 18 Если и люма вэрыцый тумэн, ӷанэн, кай май данглал вой завэрыцысардя ман. 19 Тэ авелоп тумэ кадэла люматирэ, и люма любисардоп тумэн сар пэстирэн. Тумэ най кадэла люматирэ, но мэ витидэм тумэн и отделисардэм латар, кочай и люма и вэрыцый тумэн. 20 На́ бистрэн, со мэ тумэнди ԥэндэм: о рабо най май баро пэстирэ хуластар. Если ӷонинас ман, лэна тэ ӷонин и тумэн. Если мэрнэ алавэнди приритярдёнас, тоди лэна тэ приритярдён и тумарэ алавэнди. 21 Но и мануша лэна кадя тэ обжанпэ тумэнца через кода, кай тумэ андярэн мэрни время*, важ кода кай вонэ на ӷанэн кодэлэс, ко бишалдя ман. 22 Тэ на авелоп мэ и тэ на ԥэндоп лэнди нисо, вонэ на авелоп дошалэ андо бэзэх. Но акана вонэ никаринг на терэнапэ пэстирэ бэзэхэстар. 23 Ко вэрыцый ман, во вэрыцый и мэрнэ Дадэс. 24 Тэ на стердоп мэ англа лэндэ и дила, сави нико авэр на тердя, вонэ на авелоп дошалэ андо бэзэх. Но вонэ диқлэ ман и всаек завэрыцысардэ и ман, и мэрнэ Дадэс. 25 Када тердяпэ, кай тэ ашэл кадя, сар пистромэ андэ лэнго законо: „Вонэ ни васо вэрыцынас ман“. 26 Мэ бишалава тумэнди лэ Дадэстар помошникос* — када лэ чачимаско зор. Во авэла лэ Дадэстар и лэла тэ потвердий о алав пала мандэ. 27 И тумэ кадяжэ лэна тэ потвердин о алав пала мандэ, важ кода кай тумэ сас манца кодэла времятар, кала мэ лэм тэ росԥэнав важ о Дэл.