Марко
5 Вонэ потплывисардэ каринг авэр ла моряко береӷо интя, кай жувэн и гераси́нцоря. 2 Сар кати о Исусо виӷульдя анда лодка, каринг лэстэ па мулэ випрастая ек мануш, андэ саво сас о найвужо. 3 Во жувэлас машкар моӷилки, и инке никастэ на вижылясас лэс тэ сԥандэл, дажэ цэпонэнца. 4 Бут разоря лэсти пэ вас и пэ пэрнэ шонас цэпоря, но во лэн росшынэлас, и нико не моӷ лэс тэ уприй. 5 Вся и время, о дес и рят, во рэвияс андэ плая и пэ мулэ и марэлас пэс барэнца. 6 Кала во дурал додиқля лэ Исусос, во поднашля каринг лэстэ и тэлеля. 7 Потом во фартэ зацыписайля: «Со тути трэбуй мандар, Исусо, лэ Барэ Дэвлэско Шаво? Солахав пэр тутэ англа Дэл, кай на лэса тэ мучис ман!» 8 Во ԥэндя кадя, важ кода кай о Исусо приԥэндя: «Найвужо, вижа анда кадэва мануш!» 9 О Исусо пушля лэстар: «Сар тут ақарэн?» Во ԥэндя: «Ман ақарэн Лигионо, важ кода кай амэн бут». 10 И во фартэ мангэлас лэ Исусос тэ на видаравэл лэн па кодэла краёря.
11 Котэ по плай пасыяспэ бут балэ. 12 И найвужэ линэ тэ мангэн лэ Исусос: «Бишал амэн андэ балэ, мэк амэн тэ зажас андэр лэндэ!» 13 И во домэкля лэнди. Тоди и найвужэ вижылэ анда мануш и зажылэ андэ балэ, и вся о стадо — варикай 2 000 балэ — дя па обрыво андэ моря и потасыля. 14 И пастухоря прастае и росԥэндэ пала када андо форо и андэ пашутнэ гава. И мануша жылэ тэ диқэн, со тердяпэ. 15 Кала вонэ авелэ каринг о Исусо, вонэ додиқлэ, кай о мануш, андэ саво сас фартэ бут найвужэ*, бэшэл утидо и састо по шэро, и тоди пэрэдарайлэ. 16 Тай инке, кодэла, ко када диқля, росԥэндэ лэ мирости, со тердяпэ лэ манушэса, андэ саво сас и найвужэ, и лэ балэнца. 17 Тоди о миро ля тэ мангэл лэ Исусос тэ ужал па лэндирэ краёря.
18 Кала о Исусо ля тэ бэшэл андэ лодка, о мануш, андэ саво сас и найвужэ, ля тэ мангэл, кай во тэ лэл лэс пэса. 19 Но о Исусо на ля лэс. Во ԥэндя: «Жа цэрэ каринг пэстирэ, и росԥэн лэнди пала вся, со стердя важ тутэ о Иегова*, и пала кода, кай во сас одяло каринг тутэ». 20 Кодэва мануш жыля и ля тэ росԥэнэн андэ область Десятигра́дия пала вся, со стердя важ лэстэ о Исусо, и всаворэ удивинаспэ.
21 О Исусо упалэ лагля пэ лодка пэ авэр береӷо. Кала во сас инке паша моря, каринг лэстэ стидяпэ бут миро. 22 Интя авеля ек барэдэр пэ синагога, савэс ақарэнас Яи́ро. Кала во додиқля лэ Исусос, во пэля каринг лэстирэ пэрнэ 23 и ля тэ мангэл лэс: «Мэрни бэятица фартэ насвали. Хамэлэс, ав и стов пэр латэ и вас, кай вой тэ ашэл зорали и тэ жувэл». 24 Тоди о Исусо жыля лэса. Пала Исусо жалас бут миро, саво толпияспэ паша лэстэ всаворэ ригэндар.
25 Котэ сас ек манушни, савятэ 12 бэрш на парашэлас тэ жал па гад. 26 Вой бут со пэрэандярдя лэ врачонэндар и потратисардя всаворэ пэстирэ ловэ, но лати нисо на поможысардя. Наоборот, лако зор ашэля инке май вэрыто. 27 Кадэя манушни ашундя пала Исусо, важ када вой поджыля каринг лэстэ палал андэ толпа и ляпэ каринг лэстири ӥда. 28 Вой ԥэнэнас корко пэсти: «Если лавапэ хоть каринг лэстири ӥда, тоди вилечисавава». 29 И латэ андэ кодэва жэ маменто парашэля тэ жал па гад, и вой поля, кай исцэлисайля пэстирэ ԥарэ насвалимастар.
30 О Исусо сразу поля, кай лэстар вижыля о зор. Во обрисайля и пушля: «Ко ляпэ каринг мэрни ӥда?» 31 Но лэстирэ ученикоря ԥэндэ лэсти: «Ту диқэс, кай круӷом тутэ бут миро. Васо жэ ту пушэс: „Ко ляпэ каринг мандэ?“». 32 Во лэ яқэнца родэлас кодэлэс, ко када стердя. 33 И манушни поля, кай исцэлисайля, и вой, хоть и тинояспэ даратар, поджыля каринг лэстэ, пэля пэ чанга и вся лэсти росԥэндя. 34 Во ԥэндя лати: «Мэрни щей, ту патяян, и када тут исцэлисардя*. Жа Дэвлэса! Тути будэр на авэла ԥарэс кадэлэ насвалимастар».
35 Кала во инке дэлас дума, авелэ и мануша анда цэр, кай жувэлас о барэдэр пэ синагога, и ԥэндэ: «Тири бэята муля. На трэбуй будэр тэ одлэс и время лэ Учителёстар». 36 Но о Исусо ашундя кадэла алава и ԥэндя лэ барэдэрэсти пэ синагога: «На́ дар, кати патя!» 37 И во мэкля, кай лэса тэ жал кати о Пётро, о Иа́ково и о Иоа́но, лэ Иаковоско ԥрал, и будэр нико.
38 Кала вонэ авелэ кай о барэдэр пэ синагога, всаворэ котэ сас умардэ бидаса. И мануша ровэнас и ӷолосынас. 39 Кала о Исусо зажыля андо цэр, во ԥэндя лэнди: «Со тумэ кадя умардён? Состэ тумэ ровэн? И бэята на муля — вой совэл». 40 Тоди лэс линэ па асамастэ. Но во ԥэндя всаворэнди тэ вижан анда цэр, ля пэса ла бэятатирэ дадэс и латиря да, ай кадяжэ пэстирэ учениконэн и зажыля интя, кай пашлёлас и бэята. 41 О Исусо ля ла бэята вастэстар и ԥэндя: «Талифа́ ку́ми», со пэрэандярдёл «Бэята, ԥэнав тути: ущи!». 42 И бэята сразу ущеля и ля тэ ԥирэл. (Лати сас 12 бэрш.) Кала када всаворэ додиқлэ, вонэ фартэ залошайлэ. 43 О Исусо най еқвар* лэнди приԥэндя никасти пала када тэ на росԥэнэн и ԥэндя, кай тэ дэн ла бэятати тэ хал.