1 Каринфо
14 На́ парашэн тэ любин ек еқэс и кадяжэ терэн вся, кай тумэнди тэ випэрэл бах лэ Дэвлэстар, ай особено тэ випэрэл бах тэ пэрэдэн и дэвликунэ алава. 2 Кодэва, ко дэл дума пэ авэр шыб, взвийпэ най каринг и мануша, ай каринг о Дэл. Нико на полэл, со во дэл дума, важ кода кай во через о свынто зор росԥэнэн и свынти тайны. 3 Ай кодэва, ко пэрэдэл и дэвликунэ алава, пэстиря думаса подритярэл, придэл зор и терэл май вушэро по ди лэ манушэнди. 4 Кодэва, ко дэл дума пэ авэр шыб, придэл зор корко пэсти, ай кодэва, ко пэрэдэл и дэвликунэ алава, придэл зор лэ ӷуртости. 5 Мэ камлоп, кай тумэ всаворэ тэ дэн дума пэ разни шыба, но авелоп фэдэр, кай тумэ тэ пэрэдэн и дэвликунэ алава. Если кодэва, ко дэл дума пэ авэр шыба, на пэрэандярэл пэстири дума, кай тэ придэл зор лэ ӷуртости, тоди фэдэр во тэ пэрэдэл и дэвликунэ алава. 6 Ԥрала, если мэ авава и лава тэ дав дума тумэнца пэ разни шыба, поможыя када тумэнди? Кай тэ поможысарав тумэнди, манди трэбуй тэ росԥэнав кода, со дя тэ полав о Дэл, или тэ поделисавав кодэлэса, со ӷанав, или тэ пэрэдав и дэвликунэ алава, или тэ сытярав.
7 Када жэ можно тэ ԥэнас и пала музыкальни инструменторя, например пала флейта или пала арфа. Если и ноты вужэс на ашундён, тоди сар тэ полас, со дилабэн пэ флейта или пэ арфа? 8 Если и труба найдраго ашундёл, ко тидэлапэ тэ жал по маримос? 9 И кадя жэ, если тумари дума ԥарэс тэ полэн, тоди сар варико уӷанэна, пала со тумэ ԥэнэн? Тумэ лэна тэ дэн дума евья. 10 Андэ люма исин бут разни шыба, и кажнонатар исин толко. 11 Если мэ на полав, со сас ԥэндо, тоди важ кодэва, ко дэл дума, мэ авава сар мануш па дурутно краё, ай во кацаво авэла важ мандэ. 12 Кадя жэ и тумэ камэн, кай тумэнди тэ випэрэл лэ свынтонэ зорэстири бах, кочай терэн вся, кай тумэнди лэ Дэвлэстар тэ випэрэл бут бах, сави придэла зор лэ ӷуртости.
13 Важ када кодэва, ко дэл дума пэ авэр шыб, трэбуй тэ мангэлпэ, кай во кадяжэ и тэ пэрэандярэл пэстири дума. 14 Кала мэ мангавпэ лэ Дэвлэсти пэ авэр шыб, дэл дума о свынто зор, ай мэрни годи нисо на терэл. 15 Со тоди манди тэ терав? Мэ лава тэ мангавпэ через кодэя бах, сави випэля манди лэ свынтонэ зорэстар, но лава тэ мангавпэ и кадя, кай тэ полав, со дав дума. Мэ лава тэ хвалисарав лэ Дэвлэс андэ дили через кодэя бах, сави випэля манди лэ свынтонэ зорэстар, но кадяжэ лава тэ хвалисарав лэ Дэвлэс андэ дили кацавэ алавэнца, савэ мэ полав. 16 Если ту андярэс лашо алав по Дэл через лэ свынтонэ зорэстири бах, тоди о мануш, саво тердёл паша тутэ, на ԥэнэна «аминь», кала ту блаӷодарис лэ Дэвлэс андэ молитва, важ кода кай во на ӷанэн, пала со ту дэс дума. 17 Да, тутэ драго вижал тэ мангэспэ лэ Дэвлэсти, но аврэ манушэсти када нисо на дэл. 18 Мэ блаӷодарно лэ Дэвлэсти, кай дав дума пэ май бут шыба, чем всаворэ тумэ. 19 И всаек андо ӷурто мэ фэдэр ԥэнава панч алава, савэ мэ полав, кай тэ сытярав аврэн, чем 10 000 алава пэ авэр шыб.
20 Ԥрала, мэк тумаро гиндо авэл най сар лэ бэятонэндэ. Авэн сар бэяцэ андэ вэрыто дила, но гиндон сар взросли мануша. 21 Андо законо пистромэ: «„Мэ лава тэ дав дума кадэлэ народоса пэ чужо шыб и лэ алавэнца, савэ ӷанэн и мануша па чужи краёря, и дажэ тоди вонэ отԥэндёна тэ ашунэн ман“, — ԥэнэн о Иегова*». 22 Тэ дэн дума пэ авэр шыба — када чуда най важ кодэла, ко патял, ай важ кодэла, ко на патял, ай тэ пэрэдэн и дэвликунэ алава — када чуда най важ кодэла, ко на патял, ай важ кодэла, ко патял. 23 Если всаворэ андо ӷурто лэна тэ дэн дума пэ разни шыба и тумэндэ зажана и про́сти мануша или кодэла, ко на патял, тоди на ԥэнэна вонэ, кай тумэ зжылэ па годятэ? 24 Но если тумэ всаворэ пэрэдэн и дэвликунэ алава и зажала просто мануш или кодэва, ко на патял, тоди тумари дума поможыя лэсти тэ парудёл и во закамэла тэ росполэл пэско ди. 25 Тоди дицола, со сас згарадо лэстэ андо ди, и во пэрэла пэ чанга, тэлёла лэ Дэвлэсти и ԥэнэна: «Чаче о Дэл машкар тумэндэ!»
26 Ԥрала, со тоди тумэнди тэ терэн? Кала тумэ стидэнпэ ӷуртом, варико дилабэл дили, варико сытярэл, варико росԥэнэн, со лэсти дя тэ полэл о Дэл, варико дэл дума пэ авэр шыб, ай варико пэрэандярэл па авэр шыба. Терэн вся, кай тэ придэн зор ек еқэсти. 27 Если исин кодэла, ко дэл дума пэ авэр шыба, лэн трэбуй тэ авэн дуй или само бут трин. Мэк вонэ дэн дума пок ек, ай варико мэк пэрэандярэл. 28 Если найко тэ пэрэандярэл лэндири дума, тоди мэк вонэ ашэн мулком, кала стидэлпэ о ӷурто, и дэн дума корко пэса и лэ Дэвлэса. 29 Если исин кодэла, ко пэрэдэл и дэвликунэ алава, мэк дэн дума дуй или трин, ай авэр мэк старыинпэ тэ полэн и дума. 30 Но если варикасти о Дэл дэла варисо тэ полэл, мэк кодэва, ко пэрво дэлас дума, ашэл мулком. 31 Пэрэдэн и дэвликунэ алава пок ек мануш, кай всаворэ тэ сытён и тэ лэн зор. 32 Кодэла, ко пэрэдэл и дэвликунэ алава, трэбуй тэ диқэн, сар вонэ када терэн. 33 Важ кода кай о Дэл терэл вся, кай тэ авэл мирно, и лэстэ порядко андэ вся.
Андэ всаворэ лэ свынтонэндирэ ӷурторя терэлпэ кадя: 34 и жувля трэбуй тэ ашэн мулком, кала стидэлпэ о ӷурто, важ кода кай лэнди нащи тэ дэн дума. Вонэ трэбуй тэ кандэн, сар пистромэ и андо законо. 35 Ай если и жувли варисо на полэл, вой трэбуй тэ пушэл пала када цэрэ пэстирэ хуластар. Ла жувляти на прижал тэ дэл дума, кала стидэлпэ о ӷурто.
36 Хэба тумэ пэрэдинэ о алав лэ Дэвлэстар? Или кати тумэнди во дя лэс тэ ӷанэн?
37 Если варико гиндой, кай во пэрэдэл и дэвликунэ алава или кай лэсти випэля бах лэ свынтонэ зорэстар, тоди во трэбуй тэ прижанэн: кода, со мэ тумэнди пистросарав, — лэ Барэ Хуласко законо. 38 Но если варико отԥэндёла кадэлэстар, тоди и о Дэл отԥэндёла лэстар. 39 Ни акэ, ԥрала, стон зор, кай тумэнди тэ випэрэл бах тэ пэрэдэн и дэвликунэ алава, но кадяжэ на́ запретин аврэнди тэ дэн дума пэ авэр шыба. 40 Кати мэк вся авэл сэжо и правильно*.