Лука

9 О Исусо ақардя лэ 12 учениконэн и дя лэнди право и зор тэ видаравэн лэ найвужэн и тэ исцэлин лэ насвалимастар. 2 Во бишалдя лэн тэ росԥэнэн пала лэ Дэвлэско Царство и тэ исцэлин 3 и ԥэндя лэнди: «Нисо на́ лэн андо дром: ни рувли, ни сумка, ни марно, ни ловэ*, ни инке ек ӥда*. 4 Андэ саво цэр тумэ тэ на зажан, ашэнпэ котэ, пока на ужана па кодэва краё. 5 Ай если андэ варисаво форо о миро тумэн на лэла тэ ашунэл*, тоди, кала лэна тэ ужан, оптинон о прахо па пэстирэ пэрнэ. Кадя тумэ сыкавэна, кай динэ лэнди тэ ӷанэн пала када». 6 Посли када вонэ жылэ па всаворэ гава и росԥэнэнас и лащи новость и исцэлинас лэ мирос.

7 Пала кода, со терэлпэ, ашундя о И́радо*, саво сас барэдэр пэ область*. Во на ӷанэнас, со тэ гиндой, важ кода кай ек ԥэнэнас, кай када жунделя о Иоа́но, 8 авэр — кай авеля о Илья, ай дэсавэ — кай жунделя варико анда лэ Дэвлэстирэ особи мануша, савэ жувэнас андэ дэлмутни время. 9 О И́радо ԥэндя: «Лэ Иоаности мэ отшындэм о шэро. Ко тоди кадэва мануш, пала кастэ мэ ашунав кацаво?» И во ля тэ родэл возможность тэ диқэл лэ Исусос.

10 Кала и апосталоря рисайлэ, вонэ росԥэндэ лэ Исусости пала вся, со стердэ. Посли када во ужыля лэнца андо форо Вифсаи́да, кай вонэ котэ тэ отцыён*. 11 Но и мануша уӷанглэ пала када и жылэ каринг лэстэ. Во анда ди лэн шутя сама и ля тэ росԥэнэн лэнди пала лэ Дэвлэско Царство и тэ исцэлий кодэлэн, ко сас насвало. 12 Ай ужэ пашолас о вечеро. Тоди и 12 ученикоря поджылэ каринг о Исусо и ԥэндэ: «Одмэк лэ манушэн, кай вонэ тэ жан андэ пашутнэ гавора и тэ виарақэн пэсти тэ хан и ҭан, кай тэ ратярэн, важ кода кай катэ нисо нинай». 13 Но во ԥэндя лэнди: «Тумэ дэн лэнди тэ хан». Пэ када вонэ ԥэндэ: «Амэндэ нисо нинай, исин кати панч марнэ и дуй маще, если кати амэ на жаса и на тинаса тэ хан пэ всаворэ кадэла мануша». 14 Ай котэ сас варикай 5 000 мурша. Тоди во ԥэндя лэ учениконэнди: «Розбэшарэн лэ мирос кучкэнца по 50 мануш». 15 Вонэ кадя и стердэ. Кала всаворэ бэшлэ, 16 о Исусо ля панч марнэ и дуй маще, диқля по небо и мангляпэ*. Посли када во росԥагля о марно и ля тэ дэл лэ учениконэнди, кай вонэ тэ роздэн лэс лэ мирости. 17 Всаворэ халэ и чалелэ. Кала стидэ́ о марно, саво ашэляпэ, вижылэ 12 корзины.

18 Еқвар, кала о Исусо мангэласпэ екжэно, каринг лэстэ авелэ и ученикоря, и во пушля лэндар: «Со пала мандэ дэл дума о миро? Ко мэ важ лэндэ?» 19 Вонэ ԥэндэ: «Ек ԥэнэн, кай ту о Иоа́но Крестителё, авэр — о Илья, ай дэсавэ — кай жунделя ек анда лэ Дэвлэстирэ особи мануша, савэ жувэнас андэ дэлмутни время». 20 Тоди во пушля лэндар: «Ай тумэ сар гиндон, ко мэ?» О Пётро ԥэндя: «Ту — Христос, савэс бишалдя о Дэл». 21 Но во запретисардя лэнди пала када тэ росԥэнэн 22 и инке ԥэндя: «Лэ манушэско Шаво трэбуй тэ пэрэандярэл бут ԥаримос и бида. И барэдэра, и барэ рашая и законикоря отԥэндёна лэстар, лэс умарэна и по трито дес во жундёла».

23 Потом во ԥэндя всаворэнди: «Ко камэл тэ ԥирэл пала мандэ*, мэк отԥэндёл пэстар, кажно дес андярэл пэско ԥаро столбо* и ԥирэл пала мандэ*. 24 Важ кода кай ко камэл тэ спасый пэстири жызня, во ла хасарэла, ай ко хасарэла пэстири жызня важ мандэ, во ла спасыя. 25 Чаче, саво лашымос анэна лэ манушэсти, если лэстэ андэ вас авэла вся и люма, ай корко пэс во хала жызнятар или стерэла пэсти вэрыто? 26 Важ кода кай кодэлэстар, ко лажала мандар и мэрнэ алавэндар, лажала и лэ манушэско Шаво, кала авэла и лэстар лэла тэ марэл лэстири бах, ай кадяжэ лэла тэ марэл лэстирэ Дадэстири и лэ свынтонэ анӷелонэндири бах. 27 Чаче ԥэнав тумэнди: дэсавэ анда кодэла, ко катэ тердёл, на мэрэна, пока на диқэна лэ Дэвлэско Царство».

28 Варикай через восемь деса посли када во ля лэ Петрос, лэ Иаковос и лэ Иоанос и вазгляпэ по плай тэ мангэлпэ. 29 Кала во мангэласпэ, во* паруделя, ай лэстири ӥда ашэля кацави парни, кай аж халас и яқа. 30 Потом появисайлэ дуй мануша и линэ лэса тэ дэн дума. Када сас о Маисеё и о Илья. 31 Лэндар марэлас о свето, и вонэ дэнас дума, кай во трэбуй тэ ужалтар, — пала кода, со трэбуй тэ терэлпэ андо Иерусалимо. 32 Ай андэ кодэя жэ время о Пётро, о Иоа́но и о Иа́ково засутэ, ай, кала прошутэпэ, додиқлэ, кай лэ Исусостар марэл о свето и паша лэстэ тердён дуй мануша. 33 И кала кадэла дуй мануша ужанас лэстар, о Пётро, хоть и на полэлас, со дэл дума, ԥэндя лэ Исусости: «Учителё, амэнди катэ кадя драго! Давай амэ стаса трин катуны: ек важ тутэ, ек важ о Маисеё и ек важ о Илья». 34 Пока во ԥэнэнас када, появисайля туча и ушарадя лэн. Кала када тердяпэ, и ученикоря пэрэдарайлэ. 35 Ай анда туча ашунделя ӷолосо: «Када мэрно Шаво, савэс мэ витидэм. Ашунэн лэс». 36 Кала ашунделя кадэва ӷолосо, вонэ додиқлэ, кай паша Исусо ужэ никас нинай. Вонэ на дэнас дума пала када и андэ кодэя время никасти на росԥэнэнас пала кода, со диқлэ.

37 Пэ авэр дес, кала вонэ змэклэпэ па плай, вонэ додиқлэ фартэ бутэ мирос. 38 И ек мануш анда толпа зацыписайля: «Учителё, мангав тут, дик мэрнэ шавэс! Во мандэ ек. 39 Дэкала пэр лэстэ дэл о найвужо, и во неожыдано лэл тэ цыпий и тэ пэрэтинойпэ, и лэстэ анда муй жал и пена. О найвужо одмэкэл лэс, кати кала пошындярэл лэсти и тила. 40 Мэ манглэм тирэ учениконэн лэс тэ видаравэн, но лэндэ на вижыля». 41 Тоди о Исусо ԥэндя: «Неӷожо миро, савэстэ нинай патяимос! Скати мэ инке тэ авав тумэнца и тэ тэрписарав тумэн? Ан кардэ тирэ шавэс». 42 Кала о бэято поджалас каринг лэстэ, о найвужо шувидя лэс пэ ԥув, и лэстири тила ля тэ тинойпэ. Но о Исусо приԥэндя лэ найвужэсти тэ вижал, исцэлисардя лэ бэятос и отдя лэс лэстирэ дадэсти. 43 И всаворэ динэ наздив кодэлэстар, саво дэ баро зор кай о Дэл.

Андэ кодэва маменто сар всаворэ удивинаспэ кодэлэсти, со во терэлас, во ԥэндя лэ учениконэнди: 44 «Ашунэн и на́ бистрэн, со мэ тумэнди ԥэнава: лэ манушэстирэ Шавэс придэна и отдэна андэ вас лэ манушэнди». 45 Но вонэ на полинэ лэстирэ алава. Лэндар сас гарадо кода, со сас ԥэндо, важ када вонэ нисо на полинэ, ай тэ пушэн даранас.

46 Посли када и ученикоря линэ тэ споринпэ, ко андар лэндэ само ӷлавно. 47 О Исусо ӷанэнас, пала со вонэ гиндон, важ када во стодя паша пэстэ лэ бэятос 48 и ԥэндя: «Ко шол сама кадэлэ бэятос ради мандэ*, шол сама и ман. Ай ко шол сама ман, шол сама и кодэлэс, ко бишалдя ман. Ни акэ, ко машкар тумэндэ андярэл пэс сар цынёнё, во па чачимастэ и ашунгло».

49 О Иоа́но ԥэндя: «Учителё, амэ диқлям, сар ек мануш тирэ алавэстар видаравэл лэ найвужэн, и камлям лэс тэ тердярас, важ кода кай во на ԥирэл амэнца». 50 Но о Исусо ԥэндя: «На́ ӷулен лэстэ, важ кода кай ко най против тумэндэ, во тумэнца*».

51 Поджалас и время, кала о Дэл трэбуй сас тэ лэл лэ Исусос по небо, важ када во фартэ камля тэ жал андо Иерусалимо. 52 Во бишалдя май англэ дэсавэ учениконэн, и вонэ авелэ андо гав, кай жувэнас и самаритя́норя, и камлэ тэ стерэн вся, со трэбуй каринг кода, сар во авэла. 53 Но котэ лэс на прилинэ, важ кода кай во жалас андо Иерусалимо. 54 Кала и ученикоря о Иа́ково и о Иоа́но диқлэ када, вонэ ԥэндэ: «Учителё*, камэс, амэ ԥэнаса, кай па небо тэ зжал и яг и тэ сԥабарэл лэн?» 55 Но о Исусо обрисайля каринг лэндэ и цыписайля пэр лэндэ. 56 Потом вонэ жылэ андэ авэр гав.

57 Кала вонэ жанас па дром, ек мануш ԥэндя лэсти: «Мэ лава тэ ԥирав пала тутэ, каринг ту тэ на жас». 58 Но о Исусо ԥэндя лэсти: «Кай и лисицы исин норы и кай и чирикля исин ӷниздоря, ай лэ манушэстирэ Шавэсти най кай тэ притулий о шэро». 59 Посли када во взвисайля каринг авэр мануш и ԥэндя лэсти: «Ԥир пала мандэ». Кодэва мануш мангля лэстар: «Учителё*, дэ мэ спэрва жава и притидава мэрнэ дадэс». 60 Но о Исусо ԥэндя: «Мэк и мулэ притидэн лэ мулэн, ай ту жа и всаворэнди росԥэн пала лэ Дэвлэско Царство». 61 И инке ек мануш ԥэндя лэсти: «Мэ лава тэ ԥирав пала тутэ, Учителё*, но дэ мэ спэрва послиднё разо диқавапэ мэрнэ ереса». 62 О Исусо ԥэндя лэсти: «Кодэва, ко пахыий и мал* и обдиқэлпэ палпалэ, на поджал важ лэ Дэвлэско Царство».