2 Каринфо

6 Сар лэ Дэвлэстирэ амала, амэ кадяжэ фартэ мангас тумэн: на́ бистрэн, состэ о Дэл здиқля пэр тумэндэ па пэско баро ковло ди. 2 Важ кода кай во ԥэнэн: «Андэ лащи время мэ ашундэм пала тутэ и, кала поджыля и время тэ спасыспэ, мэ поможысардэм тути. Ужэ щас жал и лащи время. Ужэ поджыля и время тэ спасынпэ.

3 Амэ на терас нисо кацаво, со можэт тэ змарэл аврэн, кай пала лэ Дэвлэстири дила, сави амэ терас, тэ на дэн дума найдраго. 4 Андэ вся амэ сыкавас, кай андярас лэ Дэвлэстири время: кала ашаспэ састэ андэ ԥари время, кала терэлпэ бида, кала на хутилэн ловэ, кала исин ԥаримос, 5 кала амэн марэн, кала шон андо баруно, кала рятянца на совас, кала боқалэ, 6 кала андярас пэс вужэс, кала жувас, сар уӷанглям, кала тэрписарас, кала драго обжаспэ аврэнца, кала терас, сар андярэл о свынто зор, кала вужэ одеса любисарас, 7 кала ԥэнас чачимос, кала надеисавас пэ лэ Дэвлэско зор, кала ритярас и шури и о щито андо право и андо лево вас, кай тэ зашаспэ пала правильно дила, 8 кала амэ ашас ашунглэ и кала амэнца обжанпэ найпативалэс, кала пала амэн дэн дума найпативалэс и кала дэн дума драго. Пала амэн гиндон, кай амэ хохавнэ, но амэ ԥэнас чачимос, 9 гиндон, кай амэ найжанглэ, — но амэн ӷатярэн, гиндон, кай амэ хындювас, — но амэ жундэ, гиндон, кай амэндар спушлэ, — но амэнди на виандярдэ смэртно приӷоворо, 10 гиндон, кай амэ помэклям о муй, — но амэ вся и время лошавас, гиндон, кай амэ чорорэ, — но через амэндэ бут ашэн барвалэ, гиндон, кай амэндэ нисо нинай, — но амэндэ исин вся.

11 Кари́нфяноря, амэ ворта дасас дума тумэнца и сыкадям, кай всаворэ́ одеса любисарас тумэн. 12 Амэ любисарас тумэн анда вся ди, но васо тумэ най глаба пала амэндэ? 13 Важ када ԥэнав тумэнди, сар мэрнэ бэятонэнди: старыинпэ инке май фартэ тэ любин*.

14 На́ сԥандён* кодэлэнца, ко на андярэл лэ Дэвлэстири время. Важ кода кай со сԥандэл о лашымос лэ вэрытимаса? Или со ек машкар о свето и тэмнота? 15 И хэба можэт тэ авэл ек гиндо кай о Христос и кай о Веля́ро? Или со ек исин кай о мануш, саво андярэл лэ Дэвлэстири время, кодэлэса, ко андярэл авэр время? 16 И со ек можэт тэ авэл кай лэ Дэвлэстири қандири лэ статуэткэнца? Амэ — лэ жундэ Дэвлэстири қандири. О Дэл ԥэндя кадя: «Мэ лава тэ жував машкар лэндэ и тэ ԥирав машкар лэндэ и мэ авава лэндирэ Дэвлэса, ай вонэ авэна мэрнэ народоса». 17 «„Важ када ашавэн лэн и ритярдён май дур, — ԥэнэн о Иегова*, — будэр на́ лэнпэ каринг кода, со мэлало“», и «мэ прилава тумэн». 18 «„И мэ ашава тумэнди дад, ай тумэ ашэна манди шавэ и щея“, — ԥэнэн о Иегова, о Само Зорало Дэл».