Римо
16 Мэ фартэ мангав тумэн тэ шон сама ла Фива, амаря ԥья, вой анда ӷурто, саво андо форо Кенхре́и. 2 Анда ди шон сама ла, сар трэбуй тэ терэл када лэ Барэ Хуласко свынто народо. Дэн лати помощь, если када авэла трэбуй, важ кода кай вой екжэни поможыяс* бутэнди и дажэ манди.
3 Пэрэдэн мандар поклоно ла Прискати и лэ Акилости, мэрнэ амалэнди, савэ терэн лэ Христостири лэ Исусостири дила. 4 Вонэ на даранас тэ хасарэн и жызня важ мандэ. Лэнди блаӷодарно най кати мэ, но и ԥрала и ԥэя анда всаворэ ӷурторя, андэ савэ исин и мануша анда авэр народоря. 5 Пэрэдэн кадяжэ поклоно лэ христианонэнди анда ӷурто, саво стидэлпэ лэндэ андо цэр. Пэрэдэн поклоно мэрнэ ԥралэсти лэ Епенетости, саво сас анда пэрви, ко андэ Азия патяя андо Христос. 6 Пэрэдэн поклоно ла Марияти, сави бут со стердя важ тумэндэ. 7 Пэрэдэн поклоно лэ Андроникости и лэ Юниёсти, мэрнэ чаченди*, савэ бэшэнас манца андо баруно. Лэн драго ӷанэн и апосталоря, и вонэ патяе андо Христос май данглал мандар.
8 Пэрэдэн мандар поклоно лэ Амплиатости, мэрнэ кучутнэ ԥралэсти и лэ Барэ Хуластирэ ученикости. 9 Пэрэдэн поклоно лэ Урбаности, амарэ амалэсти, саво терэл лэ Христостири дила, и мэрнэ ԥралэсти лэ Стахиёсти. 10 Пэрэдэн поклоно лэ Апелесости, саво затердя лашо алав англа Христос. Пэрэдэн поклоно лэ Аристабулостирэ ерести. 11 Пэрэдэн поклоно мэрнэ чачести лэ Ирадионости. Пэрэдэн поклоно лэ Наркисостирэ ерести, кодэлэнди андар лэндэ, ко патяя андо Баро Хулай. 12 Пэрэдэн поклоно ла Трифенати и ла Трифосати, савэ стон бут зор андэ лэ Барэ Хуластири дила. Пэрэдэн поклоно амаря ԥьяти ла Персидати, важ кода кай вой бут со стердя важ о Баро Хулай. 13 Пэрэдэн поклоно лэ Руфости, лэ Барэ Хуластирэ рабости, ай кадяжэ лэстиря дати, сави и важ мандэ ашэля сар дэй. 14 Пэрэдэн поклоно лэ Асинкритости, лэ Флегонтости, лэ Гермесости, лэ Патровости, лэ Гермасости и лэ ԥралэнди, савэ лэнца. 15 Пэрэдэн поклоно лэ Филалогости и ла Юлияти, лэ Ниреёсти и лэстиря ԥьяти, лэ Алимпаности и всаворэ́ свынтонэнди, савэ лэнца. 16 Кала диқэнпэ, чуминдэн ек еқэс, сар ԥрала. Всаворэ лэ Христостирэ ӷурторя пэрэдэн тумэнди поклоно.
17 Ԥрала, мангав тумэн: фэринпэ кодэлэндар, ко старыийпэ тэ стерэл розладо и тэ одмарэл аврэн лэ Дэвлэстар. Кай тэ домардён када, вонэ сытярэн най кодэлэсти, андэр со тумэ патяе. Ритярдён май дур кацавэ манушэндар. 18 Кадэла мануша на камэн тэ жувэн, сар ԥэнэн амаро Баро Хулай о Христос, ай терэн кати кода, каринг со лэн цырдэл лэнго ди. Кай тэ обдилярэн лэ простонэ манушэн, вонэ старыинпэ тэ замарэн лэн думаса и тэ замалин ковлэ алавэнца. 19 Но всаворэ ӷанэн, кай тумэ кандинэ, и мэ лошало кадэлэсти. Мэ камав, кай тумэ тэ авэн годявэрнэ и тэ терэн лашымос, ай кадяжэ тэ авэн вужэ и тэ фэринпэ лэ найлашымастар. 20 Ай о Дэл, саво дэл мирно жызня, ӥто шола лэ Сатанас тумэнди тала пэрнэ и ԥаравэла лэсти о шэро. Тэ здиқэл пэр тумэндэ о Баро Хулай о Исусо па пэско баро ковло ди.
21 Пэрэдэл тумэнди поклоно мэрно амал о Тимафеё, ай кадяжэ мэрно родо о Лу́цыё, о Ясо́но и о Сасипа́тро.
22 Мэ, о Те́ртиё, запистросардэм кадэва письмо и, сар лэ Христоско ученико, тожэ пэрэдав тумэнди поклоно.
23 Пэрэдэл тумэнди поклоно о Га́ё, саво приля ман пэстэ, лэстэ андо цэр стидэлпэ вся о ӷурто. Пэрэдэл тумэнди поклоно о Ера́сто, саво диқэл пала лэ форостирэ ловэ, и лэско ԥрал о Ква́рто. 24 ——*
25 Тэ авэл ашунгло о Дэл, саво можэт тэ придэл тумэнди зор через и лащи новость, сави мэ росԥэнав, и через о алав пала Исусо Христос. Кадэя лащи новость поможый тэ полас и свынто тайна, сави бут бэрша сас згаради. 26 Но акана амэнди динэ тэ полас када, и всаворэ народоря уӷанглэ пала када через и Свынти Лила. Амаро вечно Дэл приԥэндя, кай всаворэ тэ ӷанэн, сар тэ патян андэр лэстэ и тэ кандэн лэс. 27 Мэк о Дэл, саво ек само годявэрно, авэл ашунгло о вико вечно через о Исусо Христос. Аминь.