Римо
12 Ԥрала, о Дэл сас одяло каринг тумэндэ, важ када мангав тумэн: отдэн лэ Дэвлэсти пэстири жызня* сар жунди и свынто жэртва, сави уӷодно лэсти, и годяса терэн лэстири дила. 2 Будэр на́ домэкэн, кай и люма тэ парувэл тумэн, но мэк о Дэл парувэл тумаро гиндо. Кадя тумэ уӷанэна, со ужал андэ лэ Дэвлэстири время, и пар пэстэ полэна, кай лэсти уӷодно кода, со лашо, бахтало и правильно.
3 О Дэл здиқля пэр мандэ па пэско баро ковло ди, важ када ԥэнав тумэнди: на́ гиндон пала пэстэ май бут, чем трэбуй. Но старыинпэ здраво* тэ гиндон пала пэстэ и тэ на бистрэн, кай када о Дэл поможый кажнонэсти тэ патял андэр лэстэ. 4 Андэ тила исин бут части, но вонэ терэн разно дила. 5 Точно кадя жэ и амэ, хоть амэн бут, стидэ́ андэ ек тила, кай амэндэ тэ авэл ек гиндо лэ Христоса. Но, сар ла тилатирэ части, амэ на обжасапэ ек би еқэско. 6 О Дэл здиқля пар мэндэ па пэско баро ковло ди, важ када лэстар кажнонэсти випэля пэстири бах. Если варикасти випэля бах тэ пэрэдэл и дэвликунэ алава — мэк пэрэдэл кадя, сар лэсти сас дино тэ патял. 7 Если варикасти випэля бах тэ терэл особо дила — мэк терэл. Если варикасти випэля бах тэ сытярэл — мэк сытярэл. 8 Если варикасти випэля бах тэ подритярэл — мэк подритярэл. Если варикасти випэля бах тэ делийпэ аврэнца — мэк терэл када анда ди. Ко лэлпэ хуласа — мэк терэл када хваткаса, ко одяло — мэк авэл одяло и лошавэл кадэлэсти.
9 Любин аврэн анда вся ди. Вэрыцын о найлашымос*, цырдэнпэ каринг о лашымос. 10 Любин ек еқэс, сар ԥрала, и авэн глабочка ек пала ек. Старыинпэ пэрви тэ стон патив пэ авэр. 11 Цырдэнпэ варисо тэ терэн, на́ отстон и дила*. Авэн хваткатирэ* через о свынто зор. Терэн лэ Иеговастири* дила всаворэ́ одеса. 12 Лошавэн кодэлэсти, пэр со надеинпэ. Авэн састэ андэ ԥари время. Никала на́ парашэн тэ мангэнпэ. 13 Делинпэ лэ Дэвлэстирэ манушэнца*, кала лэнди варисо трэбуй. Вся и время шон сама аврэн. 14 Драго дэн дума пала кодэла, ко тумэн ӷоний, ԥэнэн лэнди лашо алав и на́ дэн амрая. 15 Лошавэн кодэлэнца, ко лошавэл, ровэн кодэлэнца, ко ровэл. 16 Заботинпэ пала авэр кадя жэ, сар заботинпэ пала пэстэ. Старыинпэ тэ на гиндон пала пэстэ фартэ бут, но тэлярэн корко пэс. На́ гиндон, кай тумэ май годявэрнэ всаворэндар.
17 Кала авэр обжанпэ тумэнца найдраго, на́ домэкэн, кай тумэ екжэнэ найдраго тэ обжанпэ лэнца. Шон сама пэ кода, со авэла правильно важ всаворэ мануша. 18 Терэн вся, со па тумаро зор, кай тэ ладин всаворэ манушэнца. 19 Кучутнэ ԥрала, на́ спушэн* кодэлэндар, ко тердя тумэнди вэрыто, но домэкэн лэ Дэвлэсти тэ сыкавэл пэстири холи, важ кода кай пистромэ: «„Мэ спушава, мэ на приашавава када“, — ԥэнэн о Иегова». 20 И инке: «Если тиро вороӷо боқало, стов лэсти тэ хал, если камэл тэ пэл, дэ лэсти паи. Кала ту кадя терэс, тутэ вижала тэ ковлярэс лэско ди*». 21 На́ домэк, кай о найлашымос тэ победий тут, но на́ параш тэ терэс лащи дила, кай тэ победис о найлашымос.