1 Каринфо

13 Если мэ дав дума пэ шыба, пэ савэ дэн дума и мануша и анӷелоря, но на любисарав, тоди мэ сар ӷромко колакало или звонко кимвало. 2 Если манди випэля бах тэ пэрэдав и дэвликунэ алава и если мэ ӷанав всаворэ свынти тайны и вся, со кати можно тэ ӷанэн, или патяв кадя, кай моӷу тэ пэрэстав и плая, но на любисарав, тоди мэ нисо на ашав. 3 Если мэ роздава аврэнди вся мэрно мищимос и отдава пэстири жызня, кай пала мандэ тэ дэн дума драго, но на любисарав, тоди манди када нисо на дэла.

4 Кодэва, ко любий, тэрпий и драго обжалпэ аврэнца. Во на шол вэрыцыя, на путёл и на завдэлпэ. 5 Кадяжэ кодэва, ко любий, на андярэл пэс найдраго, на гиндой кати пала пэстэ, на вижал андар пэстэ и на ритярэл и холи. 6 Инке кодэва, ко любий, на лошавэл лэ вэрытимасти, но лошавэл лэ чачимасти. 7 И кодэва, ко любий, никала на здэлпэ, всаворэсти патял, вся и время надеийпэ и вся састэс пэрэандярэл.

8 Кодэва, ко любий, никала на подвэдия. Ай если тэ дас дума пала бах тэ пэрэдэн и дэвликунэ алава, тэ дэн дума пэ авэр шыба или тэ авэн бужанглэ, то када будэр на авэла. 9 Андэ кадэя время амэ ӷанас инке най вся и най вся и время полас, со сыкавэн и дэвликунэ алава. 10 Но кала амэ ласа вся тэ ӷанас и тэ полас, тоди парашэла тэ авэл кода, со амэ най до конца ӷанас и полас. 11 Кала мэ сымас бэятоса, мэ давас дума сар бэято, гиндосаравас сар бэято и полавас сар бэято. Но акана, кала вибарелэм, мэ ашадэм, со прижал лэ бэятости. 12 Пока амэ диқас найвужэс, ԥэнэса андэ саструни юнглинда, но потом ласа драго тэ диқас, ԥэнэса тердювас варикаса муй муестэ. Пока мэ ӷанав най вся, но авэла время, кала мэ лава вся тэ ӷанав, кадя жэ сар о Дэл ӷанэн ман. 13 Ни акэ, если варико патял, надеийпэ и любий, када лэла тэ дицол вся и время. Но тэ любий — со май важно анда када.