Иаково
2 Ԥрала, сар кацаво можэт тэ авэл, кай, посли кода сар тумэ патяе андэ амаро ашунгло Баро Хулай андо Исусо Христос, тумэ дэсавэ манушэнца обжанпэ пативаса, ай пэ авэр на стон патив? 2 Ԥэнаса, интя, кай тумэ стидэ́пэ вместе, авэла мануш андэ барвали ӥда и сомнакунэ янгруснянца пэ ная, ай кадяжэ о чороро андэ мэлали ӥда. 3 Сар тумэ андярэна пэс: стона патив по мануш андэ барвали ӥда и ԥэнэна лэсти: «Ту бэш кардэ, по лашо ҭан», ай лэ чорорэсти ԥэнэна: «Ай ту тердюв» или «Бэш катэ, паша мэрнэ пэрнэ*»? 4 Если када кадя, тоди хэба на обжанпэ тумэ дэсавэнца май драго, чем аврэнца, и на ашэн сар сындомаря, савэ несправедливо* сындон аврэн?
5 Ашунэн, мэрнэ кучутнэ ԥрала: хэба о Дэл на витидя кодэлэн, ко важ кадэя люма чорорэ, кай вонэ тэ авэн барвалэ андо патяимос? Во витидя лэн, кай лэнди тэ дорэсэлпэ о Царство, пала саво во дя обещания кодэлэнди, ко лэс любий. 6 Ай тумэ на стон патив пэ чорорэ. Хэба най и барвалэ тасавэн пэр тумэндэ и стидэн пэр тумэндэ сындо? 7 Хэба най и барвалэ найпативалэс дэн дума пала ашунгло алав, саво тумэ ԥиравэн? 8 Андэ Свынти Лила пистромэ: «Любин лэ манушэн, сар корко пэс». Если тумэндэ вижал тэ ритярэн кадэва особо* законо, тоди тумэ драго терэн. 9 Ай если тумэ обжанпэ дэсавэнца май драго, чем аврэнца, тоди тумэ терэн бэзэх, и о законо дошалярэл* тумэн сар кодэлэн, ко лэс ԥагэл.
10 Если о мануш ритярэл вся о законо, но дажэ варисо ек на терэл кадя, сар трэбуй, тоди во ашэл дошало андэ кода, кай на ритярэл вся о законо. 11 Кодэва, ко ԥэндя: «На́ придэ лэ хулас или ла хулая*», кадяжэ ԥэндя: «На́ умар». Важ када, если ту на придэс лэ хулас или ла хулая, но умарэс аврэн, тоди ту всаек на зритярэс о законо. 12 Дэн дума и терэн сар кодэла, кас лэна тэ сындон па законо, саво дэл свобода*. 13 Важ кода кай кодэлэс, ко най одяло каринг авэр, лэна тэ сындон найодялэс. Тэ авэн одялэ — май важно, чем тэ сындон.
14 Ԥрала, если варико ԥэнэн, кай патял, но на сыкавэл када пэ дила, тоди саво толко кадэлэстар? Хэба кацаво патяимос можэт лэс тэ спасый? 15 Если варикастэ анда ԥрала или ԥэя нинай ӥда и лэнди найсо тэ хан пэ кадэва дес, 16 ай тумэ ԥэнэн: «Жан Дэвлэса, татён и хан чалэс», но на дэн лэнди кода, со трэбуй, тоди саво толко кадэлэстар? 17 Кадя и о патяимос: би ла дилако во муло.
18 Но варико ԥэнэна: «Тутэ исин патяимос, ай мандэ исин дила. Сыкав манди тиро патяимос би ла дилако, ай мэ сыкавава пэско патяимос пэ дила». 19 Ту жэ патяс, кай исин кати ек Дэл? Када драго. И найвужэ тожэ патян и тинонпэ даратар. 20 Но хэба ту на ӷанэс, найгодявэрно мануш, кай, если о патяимос на дицол пэ дила, лэстар нинай нисаво толко? 21 Хэба най па дила о Дэл прижангля найдошалэса амарэ дадэс лэ Авраамос, кала во стодясас пэстирэ шавэс лэ Исакос по жэртвенико, кай тэ анэн лэс андэ жэртва? 22 Ту диқэс, кай о Авраамо патялас и када дицэля пэ дила и через и дила лэско патяимос па чачимастэ ашэля састо*. 23 Кадя ашэля, сар пистромэ андэ Свынти Лила: «О Авраамо патяя лэ Иеговасти*, и во прижангля лэс найдошалэса», и по Авраамо сас ԥэндо лэ Иеговаско друӷо.
24 И акэ, о Дэл прижанэн лэ манушэс найдошалэса па лэстири дила, ай най кати па лэско патяимос. 25 Кадя сас и ла шоваркаса, савя ақарэнас Раа́в. Хэба о Дэл на прижангля ла найдошаляса па латири дила, кала вой приля пэстэ цэрэ дуе манушэн, савэ авелэ тэ роздиқэн кодэя ԥув, ай потом бишалдя лэн аврэ дромэса? 26 Вижал, сар о мануш би лэ воздухоско* муло, кадя о патяимос би ла дилако муло.